ޓެލެ ކްލާސްތައް ފެށުމަށް ފުރިހަމައަށް ތައްޔާރުވެފައިވާ ކަމަށާއި، އަންނަ އަންގާރަ ދުވަހު ޓެލެ ކްލާސްތައް ފަށާނެ ކަމަށް އެޑިއުކޭޝަން މިނިސްޓްރީން ބުނެފި އެވެ.

ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއުއެއްގައި މިނިސްޓަރު އައިޝަތު އަލީ ވިދާޅުވީ މިނިސްޓްރީގެ ވިސްނުން ހުރީ ދަރިވަރުންގެ ކިޔެވުން މެދުނުކެނޑި ކުރިއަށް ގެންދެވޭނެ ގޮތަށް ކަންކަން އިންތިޒާމު ކުރުމަށް ކަމަށެވެ.

އެގޮތުން ލޮކްޑައުންގެ ކުރިން ވެސް ޓެލެ ކްލާސްތައް ކުރިއަށް ގެންދިޔަ ކަމަށާއި، ގޫގަލް ކްލާސް ރޫމް މެދުވެރިކޮށް ދަރިވަރުންނަށް ކިޔަވާ ދިނުމުގެ ކަންކަން ކުރިއަށް ގެންދިޔަ ކަމަށް މިނިސްޓަރު ވިދާޅުވި އެވެ. ނަމަވެސް މާލެ ސިޓީ ލޮކްޑައުން ކުރުމާ ގުޅިގެން ދިމާވި ބައެއް ދަތިތަކުގެ ސަބަބުން މެދުކަނޑާލި ނަމަވެސް ބައެއް ސްކޫލުތަކުގައި ގޫގަލް ކްލާސް މެދުވެރިކޮށް ފިލާވަޅުތައް ނަގާދިނުމުގެ މަސައްކަތްތައް ކުރިއަށް ގެންދިޔަ ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ މިހާރު ޓެލެ ކްލާސްތައް ފެށުމަށް ތައްުޔާރުވެފައިވާ ކަމަށާއި، ފިތުރު އީދަށް ފަހު ކްލަސްތައް ފެށޭނެ ކަމަށެވެ. އަދި ވަރަށް އަވަހަށް ކިޔަވާދެވޭނެ ގޮތުގެ ޓައިމްޓޭބަލް އާންމުކުރާނެ ކަމަށް މިނިސްޓަރު ވިދާޅުވި އެވެ.

ޚާއްސަ އެހީއަށް ބޭނުންވާ ދަރިވަރުންނަށް ކްލާސްތައް ކުރިއަށް ގެންދިއުމާ ބެހޭ ގޮތުން މިނިސްޓަރު އައިޝަތު ވިދާޅުވީ އެ ދަރިވަރުންނަށް ދެގޮތަކަށް ފިލާވަޅުތައް ނަގައި ދިނުމުގެ ކަންކަން ސްކޫލުތަކުން ކުރިއަށް ގެންދާ ކަމަށެވެ.

މިނިސްޓަރު އައިޝަތު ވިދާޅުވީ ޚާއްސަ އެހީއަށް ބޭނުންވާ ދަރިވަރުންނަށް ވެސް ލޮކްޑައުންއަށް އައުމުގެ ކުރިން ޓެލެ ކްލާސްތައް ކުރިއަށް ގެންދެވިފައިވާ ކަމަށެވެ. އަދި އެހެން ދަރިވަރުންނަށް ވުރެ ޚާއްސަ އަހައްމިއްޔަތު ކަމެއް އެފަދަ ދަރިވަރުންނަށް ދެމުން ގެންދާކަން ވެސް މިނިސްޓަރު ފާހަގަކުރެއްވި އެވެ.