ކޮވިޑް-19އާ ގުޅިގެން އައިސޮލޭޝަނަށް ދިޔަ ފުލުހުންގެ ތެރެއިން 300ށްވުރެ ގިނަ ފުލުހުން ޚިދުމަތާ ގުޅިއްޖެ އެވެ.

ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއު އެއްގައި ސީޕީ ހަމީދު ވިދާޅުވީ ކޮވިޑް-19ގެ ނުރައްކަލަށް އެންމެ ބޮޑަށް ހުށަހެޅިގެންދާ މީހުންނަކީ 'ފްރޮންޓްލައިން' ގައި މަސައްކަތް ކުރާ މީހުން ކަމަށެވެ.

އެގޮތުން މިހާތަނަށް ކޮވިޑް-19ށް 23 ފުލުހަކު ޕޮޒިޓިވްވެފައި ވާއިރު، އަދި މިއަދަދަށް ބަދަލެއް ނާންނަ ކަމަށް ސީޕީ ހަމީދު ވިދާޅުވި އެވެ.

މޯލްޑިވްސް ޕޮލިސް ސަރވިސްގައި މަސައްކަތް ކުރާ ފުލުހުންނާއި، ސްޓާފުންގެ ހާލު ރަނގަޅުކަން ފާހަގަކުރައްވައި ސީޕީ ހަމީދު ވިދާޅުވީ ޕޮޒިޓިވްވި 23 ފުލުހުންނާ ކޮންޓެކްޓްވި ފުލުހުންނާއި، ސްޓާފުންގެ ތެރެއިން 293 މީހަކު އައިސޮލޭޝަންގައި ތިބި ކަމަށެވެ.

ސީޕީ ހަމީދު ވިދާޅުވީ ޖުމުލަކޮށް މާލެ ތެރޭގައި ކޮމިއުނިޓީ ސްޕްރެޑް ފެތުރެން ފެށިފަހުން އައިސޮލޭޝަންއަށް ލީ 680 ފުލުހުންގެ ތެރެއިން 14 ދުވަސް ހަމަކުރުމަށް ފަހު 391 ފުލުހުން މިހާރު އަނބުރާ މަސައްކަތަށް ނުކުމެފައިވާ ކަމަށެވެ.

ކޮވިޑް-19ގެ މި ހާލަތުގައި އެންމެ ބުރަކޮށް 'ފްރޮންޓްލައިން' ގައި މަސައްކަތް އެއްބަޔަކީ ފުލުހުންނެވެ. މާލެ ސިޓީ މޮނިޓަރ ކުރަމުންދާއިރު، އަތޮޅު ތެރޭގައި ރަށްތަކުގައި ވެސް ފުލުހުންގެ ޓީމުތައް ދަނީ ހަރަކާތްތެރިވަމުންނެވެ. އަދި ކޮވިޑް-19އާ ގުޅިގެން ދަނީ ޚާއްސަ އޮޕަރޭޝަނެއް ހިންގަމުންނެވެ.