ސިވިލް ސަރވިސް މުވައްޒަފުންގެ ހިމެނޭގޮތަށް ދައުލަތުގެ ހުރިހާ މުވައްޒަފުންގެ މުސާރަތައް ކުޑަކުރުމަށް ފިނޭންސް މިނިސްޓްރީން ނިންމުމާއި ގުޅިގެން ސިވިލް ސަރވިސް ކޮމިޝަން (ސީއެސްސީ)އަށް ނުރުހުމުގެ ބަސްތައް އަމާޒުވަމުން ދާތީ، އެކޮމިޝަނުން ރައްދު ދީފި އެވެ.

ސީއެސްސީ ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ، ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ދިވެހި ޤައުމަށާއި ރައްޔިތުންނަށް ދިމާވެފައިވާ އިޤްތިޞާދީ ދަތިތަކުން އަރައިގަތުމަށް ސަރުކާރުން އަޅަމުން ގެންދާ ޚާއްޞަ ފިޔަވަޅުތަކަށް އިޙުތިރާމުކޮށް، އެފިޔަވަޅުތައް ތަންފީޒުކުރުމަށް އެކޮމިޝަނުން ކުރަމުންދާ މަސައްކަތްތަކާ މެދު ބައެއް ފަރާތްތަކުން ނުރުހުންވާ ކަމަށެވެ. އަދި ސީއެސްސީއަށް ޤާނޫނުން ލިބިދީފައި ނުވާ ބާރުތަކެއްގެ ބޭނުންކުރަމުންދާކަމުގެ ތުހުމަތު ކުރަމުންދާ ކަމަށާއި، ކޮމިޝަނުގެ މެންބަރުން ވަކިކުރުމަށް ގޮވާލަމުންދާ ގޮވާލުންތަކާ މެދު ކޮމިޝަނުން ކަންބޮޑުވެ، ހިތާމަ ކުރާކަމަށްވެސް ބަޔާނުގައި ވެއެވެ.

މީގެ އިތުރުން ސީއެސްސީ ބުނީ، އެފަދަ ދޮގު ޚަބަރުތައް ނުފެތުރުމަށާއި ކަމުގެ ދެކޮޅު ބެލުމަށާއި، ފުރިހަމަ ޙަޤީޤަތް ސާފުކުރުމަށް ފަހު، ޚަބަރު ފެތުރުމަށްވެސް ހުރިހާ ފަރާތްތަކަށް ކޮމިޝަނުން ގޮވާލާ ކަމަށެވެ.

ސީއެސްސީ ބުނީ، ސިވިލް ސަރވިސް މުވައްޒަފުން މަސައްކަތްކުރަން ޖެހޭ ގަޑިއާއި މަސައްކަތްކުރަން ޖެހޭ ރަސްމީ ދުވަސްތައް އަދި މުސާރަތައް ކަނޑައަޅަމުން ދާނީ ސަރުކާރުން ކަމަށެވެ. އަދި ސަރުކާރުން ކަނޑައަޅުއްވާ ގަޑިތަކުގައި، ކަނޑައަޅުއްވާ އުޞޫލަކުން މުވައްޒަފުން ލައްވައި މަސައްކަތް ކުރެއްވުމުގެ މަސްއޫލިއްޔަތު އަދާކުރަމުން ދާނީ ސީއެސްސީން ކަމަށްވެސް އެކޮމިޝަނުން ނެރެފައިވާ ބަޔާނުގައި ބުނެފައި ވެއެވެ.

ސީއެސްސީ މިބާޔަން ނެރެފައި ވާއިރު، ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ގަމު ދާއިރާގެ މެންބަރު މުޙައްމަދު ވިސާމް ވަނީ އެކޮމިޝަން ފެއިލްވެފައިވާ ކަމަށް ވިދާޅުވެ، އެކޮމިޝަނުގެ މެންބަރުން ވަކިކުރުމަށް ގޮވާލައްވާފަ އެވެ.

މަޤަމުގެ ޒިންމާ އަދާ ނުކުރެވޭކަމަށް ޤަބޫލު ކުރެވޭތީ ސިވިލް ސަރވިސް ކޮމިޝަނުގެ 4 މެންބަރަކު ވަކި ކުރުމަށް، މެންބަރު ވިސާމް ހިމެނިވަޑައިގަންނަވާ މިނިވަން މުއައްސަސާތަކުގެ ކޮމެޓީން މާރޗު މަހުގެ 1 ވަނަ ދުވަހު ފާސްކުރި އެވެ. ކޮމިޓީން މަޤާމުން ވަކިކުރުމަށް ނިންމާފައި ވަނީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދާއި، މެންބަރު އިބްރާހިމް ޝަހީގުގެ އިތުރުން އަލްއުސްތާޛު ޒަކަރިއްޔާ ޙުސައިނެވެ.

އެހެންނަމަވެސް، ކޮމިޝަންގެ 4 މެންބަރުން ވަކިކުރުމުގެ މައްސަލަ ކޮމިޓީން ނިންމިގޮތުގެ ރިޕޯޓު ކޮމިޓީއަށް އަނބުރާ ފޮނުވާލާފައި ވާތީ ކޮމިޓީގެ މެންބަރުންގެ މެދުގައި މަޝްވަރާ ކުރެއްވުމަށް ފަހު ކޮމެޓީން ނިންމީ 4 މެންބަރުން ވަކިކުރުމުގެ މައްސަލައިގެ ރިޕޯޓު ނިންމާއިރު، އެ ކޮމިޝަނުގެ މެންބަރު ފާޠިމަތު އާމިރާގެ މައްސަލަވެސް ބެލުމަށް ފަހު 5 މެންބަރުން ވެސް ހިމެނޭގޮތަށް ރިޕޯޓު ތައްޔާރުކޮށް ހުށަހެޅުމަށެވެ. އެ މަސައްކަތް މިހާރު ވަނީ މަޑުޖެހިފަ އެވެ.

ސީއެސްސީގެ ރައީސް ޝަމީމަކީ، ނިމިދިޔަ ރިޔާސީ އިންތިޚާބުގެ ކެމްޕެއިންގައި ކުރީގެ ރައީސް ޢަބްދުﷲ ޔާމީނުގެ ކެމްޕެއިންގައި ޙަރަކާތްތެރިވި ކަމުގެ ތުހުމަތު ކުރެވޭ ބޭފުޅެކެވެ. އޭރު ބައެއް ފޮޓޯތަކާއި ޚަބަރުތައްވެސް ދައުރުވެފައި ވެއެވެ. އަދި ސީއެސްސީގެ ނައިބު ރައީސް ޝަހީދަކީ ޤާނޫނާ ޚިލާފަށް އެކޮމިޝަނަށް ޢައްޔަނު ކުރައްވާފައިވާ މެންބަރެކެވެ. އެކަން ކޮށްފައިވަނީ ރައީސް ޔާމީނުގެ ވެރިކަމުގައި ނިމިދިޔަ 18 ވަނަ ރައްޔިތުންގެ މަޖިލީހުން ނެވެ.