ރަޝިޔާގެ ބޮޑުވަޒީރު މިޚާއިލް މިޝުއިސްތީނާ ކޮވިޑް-19 އިން ފަސޭހަވެ، ހޮސްޕިޓަލުން ދޫކޮށްލައިފި އެވެ.

ބޮޑުވަޒީރުގެ ތަރުޖަމާނު ބޮރިސް ބެލްޔަކޯފް އާއި ޙަވާލާދީ ސްޕަޓްނިކް ނޫސް އޭޖެންސީން ޚަބަރު ފަތުރާ ގޮތުގައި ކޮވިޑް-19ށް ފަރުވާ ހޯއްދަވަމުން ގެންދެވި، ބޮޑު ވަޒީރު މީޚާއިލް މިހާރު ވަނީ ބަލިން ރަނގަޅުވެ، މަޤާމުގެ ޒިންމާ އަދާކުރައްވަން ފަށްޓަވާފަ އެވެ. އެގޮތުން އަންގާރަ ދުވަހު އެޤައުމުގެ ރައީސް ވްލެޑްމިއަރ ޕޫޓިންއާއެކު ވީޑިއޯ ކޮންފަރެންސް މެދުވެރިކޮށް މަޝްވަރާ ބައްދަލުވުމެއް ބޭއްވެވި ކަމަށްވެސް ވިދާޅުވެފައި ވެއެވެ.

މިޚާއިލް މިޝުއިސްތީނާ ވަނީ ހޮސްޕިޓަލުގައި ފަރުވާ ހޯއްދަވަމުން ގެންދެވި އިރު ހޯމަ ދުވަހުގެ ވަގުތެއްގައި، ކޮވިޑް-19ގެ 'އިންފެކްޝަން ރެސްޕޮންސް ކޯރޑިނޭޝަން ކައުންސިލް' ގެ ވީޑިއޯ ކޮންފަރެންސް ބައްދަލުވުމެއްގެ ރިޔާސަތުވެސް ބަލަހައްޓަވާފަ އެވެ.

މިޚާއިލް މިޝުއިސްތީނާގެ މަޤާމުގެ ޒިންމާ ރައީސްގެ ޤަރާރަކުން އަންގާރަ ދުވަހު ވަނީ އިޔާދަކުރައްވާފަ އެވެ. އަދި ރައީސް އޮފީހުގެ ރަސްމީ ވެބްސައިޓުގައި ޝާއިޢު ކުުރުމާއެކު، އެއަށް ޢަމަލުކުރަން ވަނީ ފަށްޓަވާފަ އެވެ. މިޚާއިލް ކޮވިޑް-19ށް ޕޮޒިޓިވްވުމާއި ގުޅިގެން އެޕްރީލް މަހުގެ 30 ވަނަ ދުވަހު ރައީސް ވްލެޑްމިއަރ ޕުޓިންގެ ޚާއްޞަ ޤަރާރަކުން ބޮޑު ވަޒީރުގެ މަޤާމުގެ ޒިންމާއާއި މަސްއޫލިއްޔަތުތައް ވަގުތީ ގޮތުން ބޮޑުވަޒީރުގެ ނައިބު އެންދްރެއި ބެލޫސޯ އާއި ޙަވާލު ކުރައްވާފަ އެވެ.

ރަޝިޔާގައި ކޮވިޑް-19ށް ޕޮޒިޓިވްވީ އިސް މަސްއޫލުވެރިންގެ ތެރެއިން، އެޤައުމުގެ ކަލްޗަރ މިނިސްޓަރ އޮލްފާ ލިޔޫބިމޯފާ ވަނީ ބަލިން ފަސޭހަވެ، މަޤާމުގެ ޒިންމާ އުފުއްލަވަން މިދިޔަ ބުރާސްފަތި ދުވަހު ފަށްޓަވާފަ އެވެ. އަދި ރަޝިޔާ ސަރުކާރުގެ ތަރުޖަމާނު ދިމިތުރީ ޕެސްކޯފް ގެންދަވަނީ ހޮސްޕިޓަލުގައި ފަރުވާ ހޯއްދަވަމުން ގެންދަވާއިރު، އެޤައުމުގެ ކޮންސްޓްރަކްޝަން މިނިސްޓަރ ވްލެޑްމިއަރ ޔަކުޝޭފް ގެންދަވަނީ ގޭގައި ފަރުވާ ހޯއްދަވަމުންނެވެ.