ވިލާތު އިއްތިހާދު (އީޔޫ) ގެ ތެރޭގައި ހިމެނޭ އެންމެ ބޮޑު ދެ އިގްތިސާދީ ބާރު ކަމަށްވާ، ފަރަންސޭސްވިލާތާއި ޖަރުމަންވިލާތުން، ކޮވިޑް ރިކަވަރީ ފަންޑުގެ ގޮތުގައި 500 މިލިއަން ޔޫރޯ ކަނޑައެޅުމަށް ތާއީދުކޮށްފި އެވެ.

މި ރިކަވަރީ ފަންޑުން އެހީއަށް އެދުމުގެ ފުރުސަތު އީޔޫ މެމްބަރު ގައުމުތަކަށް ލިބިގެންދާނެ އެވެ. އަދި މެމްބަރު ގައުމުތަކުގައި ރަޖިސްޓްރީ ކޮށްފައިވާ ވަކިވަކި ސިނާއަތްތަކަށް ވެސް މި ފަންޑުގެ ތެރެއިން ފައިސާގެ އެހީއަށް އެދި ހުށައެޅުމުގެ ފުރުސަތު ވަނީ ހުޅުވާލާފަ އެވެ.

ބެލެވޭ ގޮތުގައި، ފަރަންސޭސްވިލާތާއި ޖަރުމަންވިލާތުގެ ހުށައެޅުމަށް، މެމްބަރު އެހެން ގައުމުތަކުގެ ތާއީދު ލިބޭނެ އެވެ. އެ ދެ ގައުމުގެ ހުށައެޅުމުގައި ވަނީ ޔޫރަޕިއަން ކޮމިޝަނުން މި ފައިސާ ދަރަނީގެ ގޮތުގައި ނެގުމަށް ފަހު، 2021-2027 ވަނަ އަހަރަށް ކަނޑައަޅާފައިވާ އީޔޫގެ ބަޖެޓުގެ ތެރޭގައި ހިމެނުމަށެވެ.

މި ހުށައެޅުމަށް އިޓަލީވިލާތާއި ސްޕެއިންގެ ތާއީދުވެސް ލިބޭނެކަމަށް މުރާސިލުން އަންނަނީ ބުނަމުންނެވެ. އެ ދެ ގައުމުން އެންމެ ފުރަތަމަ ދުވަހުން ފެށިގެން މަސައްކަތްކުރަމުން އައީ އިއްތިހާދުގެ ހުރިހާ މެމްބަރުން ދަރަންޏަށް ޒިންމާވާގޮތަށް ރިކަވަރީ ފަންޑެއް އެކުލަވާލުމަށެވެ. ނަމަވެސް، އެއިރު ޖަރުމަނާއި ފަރަންސޭސްވިލާތުން ވަނީ މިހެން ފަންޑެއް އެކުލަވާލުމަށް ދެކޮޅު ހަދާފަ އެވެ.

އީޔޫގެ ކޮވިޑް ރިކަވަރީ ފަންޑުން އެހީ ލިބުމުގެ ޝަރުތުތަކުގެ ތެރޭގައި، ހަރުދަނާ އިގްތިދާސީ ސިޔާސަތުތައް އެކުލަވާލުމާއި، އިގްތިސާދީ ނިޒާމަށް ހެޔޮ ބަދަލުތަކެއް ގެނައުމުގެ އެޖެންޑާއެއް އެކުލަވާލުން ހިމެނެ އެވެ. މި އެޖެންޑާގެ މަގުސަދަކީ ތިމާވެއްޓާއި ރައްޓެހި، އުފެއްދުންތެރިކަމާއި ދިރާސާއަށް ބާރުއަޅާ، ޑިޖިޓަލް އިގްތިސާދަކަށް ގައުމުތަކުގެ މިސްރާބު އަނބުރާލުމެވެ.

މި ފައިސާ އަނބުރާ ދައްކަން ފަށާނީ 2027 ވަނަ އަހަރަށް ފަހުގަ އެވެ. ފައިސާ އަނބުރާ ދައްކާއިރު، އެ ގައުމަކުން ޒިންމާވާން ޖެހޭނީ މިހާރުވެސް އީޔޫގެ ބަޖެޓުގައި އެކަށައަޅާފައިވާ އިންސައްތައިގެ ތެރެއިންނެވެ. އެގޮތަށް ބަލާއިރު، ބަޖެޓުގެ އެންމެ ބޮޑު އިންސައެއް ހިއްސާކުރަނީ، ޖުމުލަ ބަޖެޓުގެ 27 އިންސައްތަ ހިއްސާކުރާ ޖަރުމަނުވިލާތުންނެވެ.

ފައިސާ އަނބުރާ ދައްކާނީ ނަގާ ޓެކްސްގެ އަދަދު އިތުރުކޮށްގެންތޯ ނުވަތަ އެހެން ކޮންސެޝަނަލްސްގެ ގޮތުގައިތޯ ނިންމާނީ މެމްބަރު ގައުމުތަކުގެ މެދުގައި މަޝްވަރާކުރުމަށް ފަހުގައި، އެއްބަސްވެވޭ ގޮތެއްގެ މަތިންނެވެ.