އެމެރިކާގެ ރައްޔިތުކަން ސްރީލަންކާގެ ރައީސް ގޮތަބަޔަ ރާޖަޕަކްސައަށް ގެއްލިވަޑައިގެންފިއެވެ.
އެމެރިކާގެ ސަރުކާރުން އެޤައުމުގެ ރައްޔިތުކަން ދީފައިވާ އެހެނިހެން ޤައުމުތަކުގެ މީހުންގެ ލިސްޓު މުރާޖަޢާކޮށް ހުކުރު ދުވަހު އެޤައުމުން ޢާންމު ކުރި އުނި ކުރ މީހުންގެ ނުވަތަ ފެޑެރަލް ރެޖިސްޓްރީ ލިސްޓުގައި ސްރީލަންކާ ރައީސްގެ ނަންފުޅު ހިމަނާފައިވެއެވެ.
އެމެރިކާގެ އިންޓަރނަލް ރެވެނިއު ސަރވިސްގެ މަޢުލޫމާތައް ރިޢާޔަތްކުރުމަށްފަހު، ކޮންމެ އަހަރަކު ތިން ފަހަރު މި ލިސްޓު އެމެރިކާ ސަރުކާރުން ދަނީ ހާމަކުރަމުންނެވެ. މީގެތެރޭގައި ރުހުމުން ރައްޔިތުކަން ދޫކޮށްލާ މީހުންނާއި، އެމެރިކާ ސަރުކާރަށް ފެނިގެން ރައްޔިތުކަމުން އުނިކުރާ މީހުން ފެޑެރަލް ރެޖިސްޓްރީގައި ހިމަނައެވެ.
އެހެންކަމުން މި ލިސްޓުގައި ހިމެނުމުން ސްރީލަންކާގެ ރައީސް ގޮތަބަޔަ ރާޖަޕަކްސައަށް އެމެރިކާގެ ރައްޔިތުކަން ގެއްލި، ރައްޔިތަކަށްވީތީ ލިބެމުން އައި ހުރިހައި މަންފާއެއް ކެނޑިގެން ދާނެއެވެ. އަދި ޑުއަލް ޕާސްޕޯޓުވެސް އުވިގެންދާނެއެވެ.
ސްރީލަންކާގެ ޤާނޫނު ބުނާ ގޮތުންނަމަ އެހެން ޤައުމެއްގެ ރައްޔިތަކަށް ނުވަތަ އެހެން ޤައުމެއްގެ ޑުއަލް ޕާސްޕޯޓް އޮންނަ ފަރާތަކައް ސްރީލަންކާގެ ރިޔާސަތައް ވަޑައިނުގެންނެވޭނެއެވެ. އަދި ރިޔާސީ އިންތިޚާބުގައި ވާދަވެސް ނުކުރެއްވޭނެއެވެ.
ސްރީލަންކާގެ ރައީސް ސްރީލަންކާގެ ރައްޔިތުކަމުން ވަކިވުމަށް އެދިވަޑައިގެންފައިވަނީ މިދިޔަ އަހަރުގެ ނޮވެންބަރު މަހު އެޤައުމުގައި ބޭއްވި ރިޔާސީ އިންތިޚާބުގައި ބައިވެރިވެ ވަޑައިގެންނެވުމަށެވެ. އެމަނިކުފާނު ވަނީ އިންތިޚާބު ބޮޑު އަޣްލަބިއްޔަތަކުން ކާމިޔާބު ކުރައްވާ ވެރިކަމަށް ވަޑައިގެންފައެެވެ.
