އެމެރިކާގެ ނައިބް ރައީސް މައިކް ޕެންސްގެ ޕްރެސް ސެކްރެޓަރީ ކޭޓީ މިލަރ ކޮވިޑް-19 އަށް ޕޮޒިޓިވްވެއްޖެ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

މީޑިއާގައި ރިޕޯޓުކޮށްފައިވާ ގޮތުގައި ޓްރަމްޕް މިހެން ވިދާޅުވެފައިވަނީ ވައިޓް ހައުސްގައި ރިޕަބްލިކަން ޕާޓީ މެމްބަރުންނާއެކު ބޭއްވި ބައްދަލުވުމެއްގަ އެވެ. މިލަރއާ ޓްރަމްޕް ބައްދަލުވެފައިނުވި ނަމަވެސް ނައިބް ރައީސް ޕެންސް އާ ޑައިރެކްޓް ކޮންޓެކްޓް ވެފައިވާ ކަމަށް ރިޕޯޓުތަކުން ބުނެއެވެ.

ކޭޓީ މިލަރ ވަނީ ޕްރެސްގެ ގިނަ ބަޔަކާ ބައްދަލުވެފައި ކަމަށާއި، އެހެންކަމުން ގިނަ ނޫސްވެރިންތަކެއް ޓެސްޓު ކުރެވޭނެ މަގު ފަހިކޮށްދިނުމަށް ސީއެންއެންގެ ވައިޓް ހައުސް ކޮރެސްޕޮންޑެންޓް ޖިމް އަކޯސްޓަރ ގޮވާލާފައި ވެއެވެ.

ކެޓީ މިލަރ ކޮވިޑް-19 އަށް ޕޮޒިޓިވް ވެފައިވާއިރު، ޓްރަމްޕް ގެ ޕަރސަނަލް ބޮޑީގާޑުންގެ ތެރެއިން މީހަކު ވަނީ ޕޮޒިޓިވްވެފަ އެވެ. މިކަމާއި ގުޅިގެން ޓްރަމްޕް ވަނީ އަނެއްކާ ވެސް ކޮވިޑް-19 އަށް ޓެސްޓުކޮށްފަ އެވެ. މިހާތަނަށް އެ ޓެސްޓުގެ މައުލޫމާތު ހިއްސާކޮށްފައެއް ނުވެ އެވެ.