މުޅި ދުނިޔެ ހަނގުރާމަ ކުރަމުންދާ ކޮވިޑް-19ގެ ވަބާގައި ޖެހި ދުނިޔޭގެ އެކިކަންކޮޅުތަކުގައި ތާށިވި އިންޑިއާގެ ހަތަރު ލައްކަ މީހުން އަނބުރާ ޤައުމަށް ގެނައުމުގެ މަސައްކަތް އިންޑިއާ ސަރުކާރުން ފަށައިފިއެވެ.

ކޮވިޑް-19 އިން ރައްކާތެރިވުމަށް ޤައުމުތަކުން އަޅަމުންދާ ފިޔަވަޅުތަކުގެ ދަށުން ގިނަ ޤައުމުތައް ފުރަބަންދުކުރުމާއި ގުޅިގެން ދަތުރުފަތުރުތައް ހުއްޓި އިންޑިއާގެ އެތައް ހާސް މީހުން ވަނީ ދުނިޔޭގެ އެކި ޤައުމުތަކުގައި ތާށިވެފައެވެ. އިންޑިއާ ސަރުކާރުން މިމީހުން ގެނައުމަށް އެޤައުމުގެ ސަރުކާރުތަކާއި ސިޔާސީ ދޭދޭ ގުޅުމުގެ ތެރެއިން މަޝްވަރާކޮށް މިހާރު ވަނީ އެމީހުން އަނބުރާ ގެނައުމަށް އެޤައުމުގެ ވައިގެ ޞަރަޙައްދުތަކައް އިންޑިޔާގެ އަސްކަރީިއްޔާގެ ބޯޓުތައް ވަނުމަށް ހުއްދަ ދީފައެވެ. އަދި ކަނޑުމަގުން ދަތުރުކުރެވޭ ޤައުމުތަކަށް އެޤައުމުގެ ކަނޑުގެ އަސްްކަރިއްޔާގެ މަނަވަރުތަކަށް އެޤައުމުގެ ކަނޑުގެ އިޤުތިޞާދީ ޚާއްޞަ ޞަރަހައްދު ހުރަސްކޮށް ވަންނަން ހުއްދަދީފައެެވެ.

ދަތުރުފަތުރުގެ އިންތިޒާމު ހަމަޖެހުމާއެކު އިންޑިއާއިން ބުރާސްފަތި ދުވަހު ވަނީ މަސައްކަތް ފަށާފައެވެ. އެންމެ ފުރަތަމަ 2 މަނަވަރު އައީ ރާއްޖެއަށެވެ. އެއީ ރާއްޖޭގައި އެކި ބޭނުންތަކުގައި ވަޒަންވެރިވެ ތިބި އިންޑިއާ މީހުން އަނބުރާ ޤައުމަށް ގެނައުމަށެވެ.

އިންޑިއާ ސަރުކާރުން ބުނެފައިވަނީ ޤައުމުތަކުގައި ތާށިވެފައި ތިބި ހަތަރު ލައްކަ މީހުން ގެނައުމަށް އެކި މަރުޙަލާތަކައް ބައިހައިގެން ފެށި މިއޮޕަރޭޝަނުގެ ދަށުން، މޭއި މަހުގެތެރޭގައި 200،000 މީހުން އަނބުރާ ގެންނާނެ ކަމަށެވެ. އަދި ރާވާފއިވާ ގޮތައް ކަންކަން ހަމަޖެހިއްޖެނަމަ، ޖޫންމަހުގެ މެދާއި ހަމަޔަށް އަންނައިރު، 400،000 މީހުން ޤައުމަށް ގެނެެސް ނިމޭނެކަމަށް އުންމީދު ކުރާކަމަށެވެ.

އިންޑިއާ ސަރުކާރުން ބުނާ ގޮތުގައި މީހުން އަނބުރާ ގެނައުމަށް އެޤައުމުގެ ޤައުމީ އެއަރލައިން "އެއަރ އިންޑިއާގެ ބޯޓުތައް ވެސް ބޭނުން ކުރާނެއެވެ. އެގޮތުން އެމެރިކާއާއި، އިނގިރޭސި ވިލާތާއި، މެދުއިރުމަތީ ޤައުމުތަކުގެ އިތުރުން، ސިންގަޕޫރުގައި ތާށިވެފަ ތިބި މީހުން ގެންނާނީ އެއަރ އިންޑިއާގެ ބޯޓުތަކުގައި ކަމަށް ރިޕޯޓުތައް ބުނެއެވެ.

އިންޑިއާއިން މަރޗް މަހު އިޢުލާނު ކުރި ފުރަބަންދު މިހިނގާ މެއި މަހުގެ 17 ވަނަ ދުވަހައި ހަމަޔަށް ދިގު ދަންމާލުމާއި ގުޅިގެން، ދުނިޔޭގެ އެހެން ޤައުމުތަކުގައި ވަޒީފާއަށާއި، ތަޢުލީމު ޙާޞިލުކުރުމަށާއި، ވިޔަފާރީގެ އެކި ބޭނުންތަކައް އެނބުރި ދިޔަ މީހުންވެސް ތާށިވީ މީހުންގެ ތެރޭގައި ހިމެނެއެވެ. އިންޑިއާގެ ޚާރިއްޖިޔާއިން ބުނީ "ތާށިވީ މީހުން ގެނައުމަށް ހިންގާ އޮޕަރޭޝަން" ގައި އެންމެ އިސްކަމެއް ދޭނީ ތާށިވުމާއި ގުޅިގެން ޙާލުގައިޖެހި ދަތިދުވަސްތައް ތަޙައްމަލު ކުރަމުންދާ މީހުންނާއި، މާލީ އަދި ނަފުސާނީ އުދަނގޫތަކާއި ކުރިމަތިވެފައިވާ މީހުންނާއި، ބަލި ޙާލުގައި އުޅޭ ޢާއިލާގެ މެންބަރުންނާއި ބައްދަލުކުރަން ބޭނުންވާ މީހުންނާއި، މާބަނޑު މީހުންނާއި، ޖަނާޒާގައި ބައިވެރިވާން ބޭނުންވެފައިވާ މީހުންނަށް ކަމަށެވެ. އަދި ވަޒީފާ ގެއްލި ދިރިއުޅުމުގެ ޒަރީރީ ބޭނުމަށް ޖެހިފައިވާ މީހުންނަށް ކަމަށެވެ.

ޙާލުގައި ޖެހުނު މީހުންގެ ތެރޭގައި ގިނައީ ގަލްފް ޞަރަހައްދާއި މެދުއިރުމަތީ ޤައުމުތަކުގައި ދިރިއުޅެމުން އަންނަ މީހުންނެވެ. ޤައުމަށް އެނބުރި އަންނަން ފުރުޞަތު ހުޅުވާލުމުން 300،000 މީހުން ރަޖިސްޓަރީކޮށްފައިވާ ކަމަށް އިންޑިއާގެ އޮފިޝަލުން ބުނެއެވެ. މިއޮޕަރޭޝަނުގެ ދަށުން އާދައިގެ ފެއަރއެއްގައި އެމީހުން ގެނައުމަށް ވަނީ ނިންމާފައެެވެ. ދުބާއީގައި ހުންނަވާ އިންޑިއާގެ ކޮންސިއުލޭޓް ޖެނެރަލް ވިދާޅުވީ ހަފުތާއެއްގެ ތެރޭގައި 10 ފްލައިޓެއް އޮޕަރޭޓް ކުރާގޮތައް ތާވަލު ކުރެވިފައިވާ ކަމަށާއި، ބުރާސްފަތި ދުވަހު ހަތަރު ފްލައިޓެއް ދަތުރު ކުރާނެ ކަމަށެވެ. މިފްލައިޓުތައް ކުރާނީ ދުބާއީ، އަބޫދާބީ، ރިޔާދު އަދި ދޯހާއަށް ކަމަށެވެ. އަދި އެޤައުމުތަކުން އަންނަ މި ފްލައިޓުތައް ޖައްސާނީ އިންޑިއާގެ ކެރެލާ ސްޓޭޓުގެ ވައިގެ ބަނދަރުތަކުގައި ކަމަށެވެ. މި ފްލައިޓްތަކުން ޖާގަދިނުމުގައި އިސްކަން ދިނީ އުމުރުން ދުވަސްވީ މީހުންނާއި، މާބަނޑު އަންހެނުންނާއި، ބޮޑެތި ބަލިތަކުގައި ދިގު މުއްދަތަކައް ބޭސްކުރަމުން އަންނަ މީހުންނާއި، ކޮވިޑް-19ގެ ޙާލަތާއި ގުޅިގެ ދަތި އުނދަގޫ ދުވަސްތައް ތަޙައްމަލުކުރަމުން ދާ މީހުންނަށް ކަމަށެވެ.

މި ދަތުރުތަކާ ބެހޭ ގޮތުން އިންޑިއާގެ ސިވިލް އޭވިއޭޝަން މިނިސްޓަރ ހަރްދީޕް ޕޫރީ ވިދާޅުވީ، މިއީ އެމަނިކުފާނު އޭވިއޭޝަން ދާއިރާގައި ހަރާކްތެރި ވެވަޑައިގަންނަވަން ފެށިފަހުން، ތާރީޚުގައިވެސް ކުރިމަތިވި އެންމެ ގޮންޖެހުން ބޮޑު، އުދަނގޫ ޕްރޮގުރާމު ކަމަށެވެ. އޭނާ ވިދާޅުވީ ގަލްފުންނާއި، މެދުއިރުމަތިގެ ޤައުމުތަކުން މި ހަފުތާތެރޭގައި ގެންނަ ހުރިހައި އެންމެން އެއަރޕޯޓުން ދޫކުރާނީ ކޮވިޑް-19އަށް ސްކްރީން ކުރުމަށްފަހު ކަމަށެވެ. އަދި އިންޑިއާއަށް އެތެރެ ވުމަށް ފަހު ދެހަފުތާގެ މުއްދަތަކަށް އެންމެން ކަރަންޓީނު ކުރާނެކަމަށެވެ.

މިއޮޕަރޭޝަނާއި ގުޅޭގޮތުން ކެރަލާ ސްޓޭޓުގެ ޗީފް މިނިސްޓަރ ވިދާޅުވީ، އެމީހުން އިންޑިއާއަށް ގެނައުމުގެ ކުރިން ކޮވިޑް-19އަށް ޓެސްޓް ނުކުރާތީ އެކަމާއި ކަންބޮޑުވެ ވަޑައިގަންނަވާ ކަމަށެވެ. އަދި މިއިން ކޮންމެ ފްލައިޓެއްގައި 200 މީހުން ދަތުރު ކުރާއިރު، އޭގެ ތެރޭގައި އެންމެ ދޭއް ނުނަތަ ތިން މީހަކު ވައިރަސް ޖެހިފަ ހުއްޓަސް، ހުރިހައި ދަތުރުވެރިންނަށް އޭގެ ނުރައްކަލާއި ކުރިމަތިވާނެކަމަށެވެ.

ބޭރުގެ ޤައުމުތަކުގައި ތާށިވެފައި ތިބި އިންޑިއާގެ ހަތަރު ލައްކަ މީހުން ގެނައުމަށް އިންޑިއާއިން ކުރިޔަށް ގެންދާ އޮޕަރޭޝަން ކާމިޔާބުވެއްޖެނަމަ، މި އޮޕަރޭޝަން ވެގެންދާނީ ގަލްފް ހަނގުރާމައަށް ފަހު އިންޑިއާގެ ރައްޔިތުންތަކެއް އަނބުރާ ޤައުމަށް ގެންނަން ހިންގި އެންމެ ބިޔަ އޮޕަރޭޝަނަށެވެ.

1990 ހިނގި ޤަލްފު ހަނގުރާމައިގައި ކުވައިތުގައި ތާށިވި މީހުން ގެނައުމަށް ހިންގި ރެސްކިއު އޮޕަރޭޝަނުގައި 170،000 މީހުން އަނބުރާ ޤައުމަށް ގެނައެވެ.