ތުރުކީވިލާތުގެ ސަރުކާރުން ޞިއްޙީ އާލާތްތައް އެކްސްޕޯޓުކުރުން މަނާކޮށްފައި އޮތްއޮތުން ނިމުމަކަށް ގެނެސްފި އެވެ.

މިކަން އިޢުލާނުކޮށް، އެޤައުމުގެ ސަރުކާރުން ޢާންމުކުރި ޤަރާރުގައިވަނީ މިފަދައިން ނިންމީ ވިލާތުގެ ޤައުމުތައް ޞިއްޙީ އާލާތްތަކައް ޖެހިފައިވާތީ އެކަމަށް ލުޔެއް ގެނެސްދިނުމުގެ ގޮތުންކަމަށެވެ.

ތުރުކީ ވިލާތުގެ ކޮމަރސް މިނިސްޓްރީން ބުނެފައިވަނީ ސަރުކާރުގެ މި ނިންމުމާއި ގުޅިގެން، ރެސްޕިރޭޓަރާއި، އިންކިއުބޭޓަރ ފަދަ ޞިއްޙީ އާލާތްތަކުގެ އިތުރުން ޑިސްއިންފެކްޓްކުރުމަށް ބޭނުންކުރާ އެތަނޯލް ފަދަ ބާވަތްތައް ބޭރުގެ ޤައުމުތަކަށް އެކްސްޕޯޓް ކުރުމުގެ ފުރުޞަތު ފަހިވެގެން ދިޔަކަމަށެވެ.

މީގެކުރިން ޞިއްޙީ އާލާތްތައް އެކްސްޕޯޓުކުރުމަކީ ޤާނޫނީ ގޮތުން މަނާކަމެކެވެ. އެހެންނަމަވެސް ވަކި ޚާއްޞަ ޙާލަތްތަކެއްގައި، މައި ސަރުކާރުގެ ހުއްދައާއެކު ޞިއްޙީ އާލާތްތައް ފޯރުކޮށްދީފައި ވެއެވެ. މިފަހަރު އެޤައުމުގެ ސަރުކާރުން ޞިއްޙީ އާލާތްތައް އެކްސްޕޯޓުކުރުމަށް ހުއްދަ ދިނީ ކޮވިޑް-19 ގެ ބަލިމަޑުކަމުން އަރައިގަތުމަށް ކުރަމުންދާ މަސައްކަތުގައި އެހީތެރިވެދިނުމުގެ ގޮތުންނެވެ.

ވަގުތީ ގޮތުން ލުޔެއް ދިންނަމަވެސް، އެކްސްޕޯޓުކުރަން ހުއްދަދިން ޤަރާރު ބާޠިލުކުރާނެ ދުވަހެއް ތަރުޖަމާނު ހާމަކުރައްވާފައެއް ނުވެ އެވެ.

ތުރުކީ ސަރުކާރުން މި ނިންމި ނިންމުމާއި ގުޅިގެން، ތުރުކީ ވިލާތުގައި ފާމަސޫޓިކަލް އާލާތްތައް އުފައްދާ ކުންފުނިތަކުގެ އުފެއްދުންތެރިކަމުގެ ނިޞްބަތް ވަރަށް ބޮޑުތަނުން އިތުރުވެގެންދާނެކަމަށް ލަފާކުރެވެ އެވެ. އަދި ކޮވިޑް-19 ގެ ބަލިމަޑުކަމުން އަރައިގަތުމަށް އެހެން ޤައުމުތަކުން ކުރަމުންދާ މަސައްކަތުގައި އެންމެ ބޮޑުގޮންޖެހުމެއްގެ ގޮތުގައި ކުރިމަތިވެފައިވާ ޞިއްޙީ އާލާތްތަކައް ޖެހުމުގެ މައްސަލައަށް ވަރަށް ބޮޑު ޙައްލެއް ލިބިގެންދާނެ އެވެ. ވަކިން ޚާއްޞަގޮތެއްގައި ވިލާތު ބައްރުގެ ބައެއް ޤައުމުތަކުގައި ހިފެހެއްޓުމެއްނެތި ވައިރަސް ފެތުރެމުންދާ މިދަނޑިވަޅުގައި، އެޤައުމުތަކައް ލުއި ފަސޭހަކަމާއެކު ޞިއްޙީ އާލާތްތައް ހޯދުމަށް މަގުފަހިވެގެންދާނެ އެެވެ.

ބައިނަލްއަޤުވާމީ މުފައްކިރުން ބުނާގޮތުގައި، ކޮވިޑް-19 ބަލިަމޑުކަމުގެ ތެރޭގައި ތުރުކީން ދަނީ ސިޔާސީ ކާޑުކުޅެ، ޤައުމުތަކާއި ގުޅުން ބަދަހި ކުރަމުންނެވެ. އެގޮތުން ބައެއް ޤައުމުތަކައް ޞިއްޙީ ދާއިރާއިން އެހީތެރިކަން ފޯރުކޮށްދިނުން ހިމެނެ އެވެ. ތުރުކީވިލާތުން ވަނީ ހޮނިހިރު ދުވަހު ސޯމާލިއާއަށް ޞިއްޙީ އާލާތްތަކުގެ އެހީތެރިކަން ފޯރުކޮށްދީފަ އެެވެ. މިތަކެތި ހިފައިގެން ދިޔައީ ތުރުކީ ވިލާތުގެ އަސްކަރިއްޔާގެ ޚާއްޞަ އުޅަނދެއްގަ އެވެ.

ތުރުކީ ވިލާތުން 124,375 މީހުން ކޮވިޑް-19އަށް ޕޮޒިޓިވްވެފައިވާއިރު، 3,336 މީހުންވަނީ މި ވައިރަސްގައި މަރުވެފަ އެވެ. އަދި 58,259 މީހަކުވަނީ ފަރުވާދީގެން ރަނގަޅުކޮށްފަ އެވެ. މިހާރުވެސް، 62,780 މީހުންނަށް ފަރުވާދެމުންދާއިރު، މީގެތެރެއިން 1,445 މީހެއްގެ ޙާލަތު ގޯސްކަމަށް ރިޕޯޓުތައް ބުނެ އެވެ.