ރ. އަތޮޅު އިފުރުގައި ތަރައްޤީކޮށްފައިވާ އިފުރު އެއަރޕޯޓާއި، ރިސޯޓު ވިއްކާލުމަށް ހުޅުވާލައިފި އެވެ.

65 މިލިއަން ޑޮލަރު (އެއް ބިލިއަން ރުފިޔާ) ގެ އަގަކަށް، މި ތަންތަން ވިއްކާލަން ނިންމާފައިވާއިރު، މި ރަށުގެ ވެރިފަރާތް ދި ސްމޯލް މޯލްޑިވްސް އައިލެންޑް ކޯ އިން ވަނީ އިތުރު ފަޅު ރަށެއް (ބ. ފުނަދޫ) މި އޮފަރގައި ހިމަނާފަ އެވެ. މި ފަޅު ރަށަކީ އިފުރުގައި އެއަރޕޯޓެއް ތަރައްޤީކުރަން އިފުރު އިންވެސްޓްމަންޓްސްއާއެކު ވެވުނު އެއްބަސްވުމުގައި ހިމަނާފައިވާ ރަށްތަކުގެ ތެރެއިން ރަށެކެވެ.

އިފުރުގައި ޤާއިމުކޮށްފައިވާ ރިސޯޓަށް މިހާތަނަށް ފަތުރުވެރިން އައިސްފައެއް ނުވެއެވެ. ނަމަވެސް އިފުރުގައި ހުންނަ ޕްރޮޕަރޓީގައި 150 ވިލާ ތަރައްޤީކޮށް ވަނީ ނިމިފައެވެ. އަދި ރިސޯޓު ގަންނަ ފަރާތަކަށް އިތުރު 90 ވިލާ އެޅޭނެ ކޮންސެޕްޓް، ވިއްކާލުމުގެ އެއްބަސްވުމުގައި ހިމަނާފައިވެއެވެ.

އެއަރޕޯޓް ތަރައްޤީކުރަން ސަރުކާރާއެކު އެއްބަސްވުން ހަދާފައިވަނީ 2011 ވަނަ އަހަރުގައެވެ. އެ މަސައްކަތް ޙަވާލުކުރެވުނީ އިފުރު އިންވެސްޓްމަންޓްސްއާ އެވެ. މި އެއްބަސްވުމުގެ ތެރެއިން ފަތުރުވެރިކަމުގެ ބޭނުންތަކަށް ތަރައްޤީކުރުމަށް އެ ކުންފުންޏަށް ތިން ރަށެއް ދީފައިވެއެވެ.

އެއަރޕޯޓް ތަރައްޤީކުރުމުގެ މަސައްކަތް ކޮށްފައިވަނީ ކޯސްޓްލައިން ކުންފުނިންނެވެ. މަޢުލޫމާތު ލިބިފައިވާ ގޮތުގައި، އިފުރު އިންވެސްޓްމަންޓްސްގެ މިހާރުގެ މައި ހިއްސާދާރުންނަކީ ކޯސްޓްލައިން ގްރޫޕެވެ. އިފުރު އިންވެސްޓްމަންޓްސްއަކީ ދައުލަތުގެ ހިއްސާއެއް ހިމެނޭގޮތަށް އެގްރޯ މެރިން ނަމަކަށް ކިޔާ ކުންފުންޏަކާއެކު އުފެއްދި ކުންފުންޏެކެވެ.

ރިސޯޓްގެ ލީސް ރައިޓްސް މި ވަގުތު އޮތީ ދި ސްމޯލް މޯލްޑިވްސް އައިލެންޑް ކޯ ކުންފުނީގެ ނަން މަތީގައެވެ. މި ކުންފުންޏަކީވެސް ކޯސްޓްލައިން ގްރޫޕް އޮފް ކޮމްޕެނީޒް އާއި އޮސްޓްރޭލިއާގެ ހޮސްޕިޓާލިޓީ ސްޓްރެޓެޖީޒް ގުޅިގެން 2012 ވަނަ އަހަރު އުފައްދާފައިވާ ކުންފުންޏެކެވެ. އެ ކުންފުނީގެ ނަން މަޝްހޫރު ރިސޯޓުތަކުގެ ތެރޭގައި އަމިއްލަފުށްޓާއި، އަފި ފިނޮޅު ހިމެނެއެވެ.

އަމިއްލަފުށި 2014 ވަނަ އަހަރު ހުޅުވިއިރު، ފިނޮޅު ހުޅުވާފައިވަނީ 2016 ވަނަ އަހަރުއެވެ. މި ދެ ރިސޯޓަކީ ވެސް ބ. އަތޮޅުގައި އޮންނަ ދެ ރިސޯޓެވެ. މީގެ ތެރެއިން ފިނޮޅު ވަނީ މިދިޔަ އަހަރުގެ ތެރޭގައި 90 މިލިއަން ޑޮލަރު (1.3 ބިލިއަން ރުފިޔާ) އަށް ޖަރުމަނުވިލާތުގެ ސީސައިޑްސް ހޮޓެލްސް އެންޑް ރިޒޯޓްސްއަށް ވިއްކާލާފައެވެ.

މިއީ ރާއްޖޭގައި ރިސޯޓް ތަރައްޤީކުރަން ފަޅު ރަށްތަކާއެކު ދޫކުރެވުނު ތަނެއްގައި އެއަރޕޯޓެއް ތަރައްޤީކުރުމަށް ފަހު ވިއްކާލަން މަސައްކަތްކުރާ ފުރަތަމަ ފަހަރެވެ. މި ވަގުތު އެއަރޕޯޓްގެ މެނޭޖްމަންޓާ ޙަވާލުވެގެން އުޅެނީ އައިލެންޑް އޭވިއޭޝަން ސަރވިސަސް އިންނެވެ. މި އެއަރޕޯޓް ހުޅުވާފައިވަނީ 2015 ވަނަ އަހަރު އެވެ.