ކޮވިޑް-19އާ ގުޅިގެން އަފްޣާނިސްތާން ޖަލުގައި ތިބި ކުށްވެރިން ދޫކޮށްލަން އެޤައުމުގެ ސަރުކާރަށް މަޖުބޫރު ވެއްޖެއެވެ.
އަލްޖަޒީރާގައި ރިޕޯޓުކޮށްފައިވާ ގޮތުގައި ކުށްވެރިން ދޫކޮށްލަން މަޖުބޫރުވީ ޖަލުތަކުގައި އާދަޔާ ޚިލާފަށް ގިނަ ޢަދަދެއްގެ ކުށްވެރިން ބަންދުކޮށްފައި ތިބުމާ ގުޅިގެންނެވެ. އަދި މިކަމުގެ ސަބަބުން ޖަލުގައި ވައިރަސް ފެތުރިއްޖެނަމަ، ޖަލުގައި ތިބި ގިނަ ބަޔަކަށް ކޮވިޑް-19 ޖެހުމުގެ ފުރުޞަތު ބޮޑުވެފައިވާތީއެވެ.
އަފްޣާނިސްތާންގެ ޞިއްޙީ ނިޒާމު އޮތީ ވަރަށް ބޮޑަށް ހީނަރުވެފައެވެ. އެޤައުމަކީ އަބަދު ވެސް ދާޚިލީ ހަނގުރާއާއި، ސިޔާސީ ހަމަނުޖެހުން ވަރަށް ބޮޑަށް އޮންނަ ޤައުމެއް ކަމަށްވާތީ، ޞިއްޙީ ނިޒާމުގެ އިތުރުން އެހެން ދާއިރާތަކުން ތަރައްޤީ ކުރުމަށް ކުރަމުންދާ މަސައްކަތައް ވަނީ ބޮޑެތި ގޮންޖެހުންތަކާއި ކުރިމަތިލާންޖެހިފައެވެ.
އަފްޣާނިސްތާނުގައި ކޮވިޑް-19 ހަލުވިމިނެއްގައި ފެތުރެމުންދާއިރު، މިހާރު ވެސް އެޤައުމުގެ ހޮސްޕިޓަލްތައް ވަނީ ފުރިބާރުވެފައެވެ.
