ރަޝިޔާގެ ބޮޑުވަޒީރު މީޚާއީލް މިޝުޓްސްޓިން ކޮވިޑް-19 ށް ޕޮސިޓިވް ވެއްޖެއެވެ.

ރަޝިޔާގެ ބޮޑުވަޒީރު ބައްޔަށް ޕޮސިޓިވް ވީ ކަން ހާމަ ކުރެއްވީ، ރައީސް ޕުޓިން އާ އެކު ބޭއްވެވި ވީޑިއޯ ކޮންފަރެންސެއްގައެވެ.

ކޮވިޑް-19 އަށް ޕޮސިޓިވް ވުމާއެކު އެކަރިދިރިއުޅުއްވުމެއް އުޅުއްވަން ޖެހޭތީ، ބޮޑުވަޒީރުގެ ޒިންމާތައް ބޮޑު ވަޒީރުގެ ނައިބަށް ހަވާލު ކޮށްދެއްވުމަށް ބޮޑުވަޒީރު ވަނީ ރަޝިއާގެ ރައީސްގެ އަރިހުގައި ދަންނަވާފައެވެ.

ބޮޑުވަޒީރުގެ އެދި ވަޑައިގަތުމާ އެއް ގޮތައް ބޮޑުވަޒީރުގެ ނައިބު އަންދްރޭ ބެލޫސޯވް އާ ބޮޑުވަޒީރުގެ މަސްއޫލިއްޔަތު ތައް ވަގުތީ ގޮތުން ހަވާލު ކުރެއްވުމަށް ރައީސް ޕުޓިން މިހާރު ވަނީ ގަރާރެއް ނެރުއްވާފައެވެ.

މިއީ ރަޝިއާގެ އެންމެ މަތީ ފެންވަރުގެ ވެރިއަކަށް ކޮވިޑް-19 ޕޮސިޓިވް ކަމަށް ކުރެވުނު ފުރަތަމަ ރިޕޯޓުކަން ފާހަގަ ކުރެވެއެވެ.

ބޮޑުވަޒީރު ވަނީ ބުދަ ދުވަހު ބޭއްވުނު ކޮވިޑް-19 ކޮންޓްރޯލް ކުރުމަށް ރަޝިއާ ގައި އުފައްދާފައިވާ ކޯޑިނޭޓިންގ ކައުންސިލްގައި ބައިވެރިވެ ވަޑައިގެންފައެވެ. އެ ބައްދަލު ވުމުގައި ކޮވިޑް-19 ގެ ސަބަބުން ބަންދުކޮށްފައިވާ ރަޝިއާގެ ބޯޑަރު އަލުން ހުޅުވާލެވޭނެ ދުވަހެއް އަދި އެނގިވަޑައި ނުގަންނަވާ ކަމަށް ވިދާޅުވެ ވާހަކަފުޅު ދައްކަވާފައި ވެއެވެ.

ބުރާސްފަތި ދުވަހާ ހަމައަށް ރަޝިއާގައި ކޮވިޑް-19 ޖެހުނު މީހުންގެ އަދަދު ވަނީ 100،000 (އެއް ލައްކަ) ށް ވުރެ މައްޗަށް ގޮސްފައެވެ. އަދި އެއް ދުވަހުގެ ތެރޭގައި އެންމެ ގިނަ މީހުން ބައްޔަށް ޕޮސިޓިވް ވި ދުވަސް ކަމަށް ވެސް ބުރާސްފަތި ދުވަސް ވަނީ ވެފައެވެ. ބުރާސްފަތި ދުވަހު 7099 (ހަތްހާސް ނުވަދިހަ ނުވައެއް) މީހުންނަށް ކޮވިޑް-19 ޖެހިފައިވެއެވެ.

ބަލީގައި މިހާތަނަށް 1073 (އެއްހާސް ހަތްދިހަ ތިނެއް) މީހުން ރަޝިއާގައި މަރުވެފައިވެއެވެ.