ރާއްޖޭގެ ފަތުވެރިކަމަށް މިއަހަރުގެ ފެބްރުއަރީ މަހުގެ ތެރޭގައި ކުޑަ ހީނަރުކަމެއް އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ދިވެހިރާއްޖޭގެ ފަތުރުވެރިކަމާއިބެހޭ ވުޒާރާއިން އާންމުކުރި ފެބްރުއަރީ މަހުގެ ތަފާސް ހިސާބުތަކުން ދައްކާ ގޮތުގައި، ފަތުރުވެރިކަމުގެ މާކެޓްގައި ބޮޑު ހިއްސާއެއް އަދާކުރާ ބައެއް ގައުމުތަކުން ރާއްޖެއައި ފަތުރުވެރިންގެ އަދަދުވަނީ މަދުވެފައެވެ.

އެގޮތުން މިއަހަރުގެ ފެބްރުއަރީ މަހުގެ ތަފާސް ހިސާބުތަކުން ދައްކާ ގޮތުން، މި ފަހަކަށް އައިސް އެންމެގިނަ ފަތުރުވެރިން އަންނަ ޗައިނާ އިން ރާއްޖެއައި އަދަދު ވަނީ މިދިޔަ އަހަރުގެ އެ މުއްދަތާ އަޅާބަލާއިރު 29 ޕަސެންޓްގެ ދަށްވެފައެވެ.

މިއަހަރުގެ ފެބްރުއަރީ މަހު ޗައިނާ އިން ރާއްޖެއައި ފަތުރުވެރިންގެ އަދަދު ވަނީ24،263  އަށް ދަށްވެފަ އެވެ. ޗައިނާގެ އިތުރުން ޖަޕަނާއި ސްވިޒިލޭންޑް ފަދަ ގައުމުތަކުން އައި ފަތުރުވެރިންގެ އަދަދުވެސް ދައްކަމަށް ދައްކައެވެ.

ހުޅަނގުގެ ބައެއް ގައުމުތަކުން އަންނަ ފަތުރުވެރިން މަދުވި ނަމަވެސް ރަޝިއާ އާ އެމެރިކާ އަދި އިންޑިއާ ފަދަ ގައުމުތަކުން އަންނަ ފަތުރުވެރިން މިއަހަރު ވަނީ އިތުރުވެފައެވެ.

މީގެ އިތުރުން ހުޅަނގުގެ މާކެޓަށް ބަލާނަމަ ރާއްޖޭގެ ފަތުރުވެރިކަމަށް އެންމެ މުހިންމު މާކެޓްތައް ކަމަށްވާ އިނގިރޭސިންނާއި ޖަރުމަނުން ރާއްޖެ އައި ފަތުރުވެރިންގެ އަދަދުވެސް ވަނީ މަދުވެފައެވެ.

ޖަރުމަނުން ރާއްޖެ އައި ފަތުރުވެރިންގެ އަދަދު ހަތަރު ޕަސެންޓް ދަށްވި އިރު އިނގިރޭސިވިލާތުން އައި ފަތުރުވެރިންގެ އަދަދު ދެ ޕަސެންޓަށް ދައްވެފައިވެއެވެ.

ފެބްރުއަރީ މަހުގެ ތަފާސް ހިސާބުތަކަށް ބަލާއިރު، ހުޅަނގުގެ ޤައުމުތަކުގެ ތެރެއިން އިޓަލީގެ ފަތުރުވެރިން އައި ނިސްބަތް ވަނީ އިތުރުވެފައެވެ. އެގޮތުން އެއަދަދު ވަނީ 21 ޕަސެންޓަށް އިތުރުވެފައެވެ.

މިއަހަރުގެ ފެބްރުއަރީ މަހު ރާއްޖޭގެ ފަތުރުވެރިކަމަށް ކޮންމެވެސް ވަރެއްގެ ހީނަރު ކަމެއް އައިކަމަށް ދެއްކިޔަސް ކުރީ އަހަރާ އަޅާބަލާއިރު ޖުމްލަކޮށް ފަތުރުވެރިން އައި އަދަދު އިތުރެވެ.

އެގޮތުން ފެބްރުއަރީ މަހު ރާއްޖެ އައިސްފައި ވަނީ 121،052 ފަތުރުވެރިންނެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 0.3 ޕަސެންޓްގެ ކުޑަ އިތުރުވުމެކެވެ.

މިނިސްޓްރީގެ ތަފާސް ހިސާބުތަކުން ދައްކާ ގޮތުގައި ރިސޯޓްތަކުގެ އޮކިއުޕަންސީ 10 ޕަސެންޓް ވަނީ ދައްވެފައެވެ. އަދި ގެސްޓް ހައުސްތަކުގެ އޮކިއުޕަންސީ ދެ ޕަސެންޓް ދަށްވެފައިވާ ކަމަށް ދައްކައެވެ.