ރައީސް އޮފީހުގެ ބިއްލޫރި ގަނޑު ތަޅާލި ކަމަށް ތުހުމަތު ކުރެވޭ މީހާގެ ބަންދަށް އިތުރު 15 ދުވަސް ޖަހައިފިއެވެ.
ރައީސް އޮފީހުގެ ބިއްލޫރި ގަނޑު ތަޅާލި ކަމުގެ ތުހުމަތުގައި ހައްޔަރު ކޮށްފައި ވަނީ އުމުރުން 43 އަހަރު ދިވެހި ފިރިހެނެކެވެ.
ފުލުހުން މީޑިއާ އޮފިޝަލް ވިދާޅުވީ ދެވަނަ ފަހަރަށް އޭނާގެ ބަންދުގެ މުއްދަތު އިތުރުކޮށްފައި ވަނީ އެންމެ ފުރަތަމަ އޭނާގެ ބަންދަށް ޖެހި މުއްދަތު ހަމަވުމާ ގުޅިގެން ބަންދަށް ގޮތެއް ނިންމުމަށް ކްރިމިނަލް ކޯޓަށް ގެންދިއުމުން ކަމަށެވެ.
މަންޒަރު ދުށް މީހަކު ބުނީ ރައީސް އޮފީހުގެ ކުޑަ ދޮރެއްގެ ބިއްލޫރިގަނޑު ތަޅާލާފައިވަނީ ގާބުރިއަކުން ޖަހައި ކަމަށެވެ. އަދި އެ މީހާ ބިއްލޫރިގަނޑާ ދިމާލަށް ގާބުރި އެއްލީ ހުރަވީ ބިލްޑިންގ ކައިރީގައި ހުރެ ކަމަށް ވެސް އެ މީހާ މައުލޫމާތު ދިނެވެ. ތަޅާލާފައިވަނީ ރައީސް އޮފީހުގެ އަމީރު އަހުމަދު މަގާވީ ފަޅީގައި ހުރި ކުޑަދޮރެއްގެ ބިއްލޫރިގަނޑެވެ.
ރައީސް އޮފީހުގެ ބިއްލޫރިގަނޑު ތަޅާލި މައްސަލަ ފުލުހުން ދަނީ ތަހުގީގު ކުރަމުންނެވެ.
