ދިވެހި ދައުލަތަށް އެންމެ ގިނައިން ފައިސާ ވައްދާ އެއް ބަޔަކީ ހދ. އަތޮޅަށް ނިސްބަޔްވާ ރައްޔިތުން ކަމަށާއި ނަމަވެސް ހދ. އަތޮޅުގައި ބޮޑު އެއްވެސް މަޝރޫއެއް ނުހިންގާ ކަމަށް ހދ. ވައިކަރަދޫއަށް ނިސްބަތްވާ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު މުހައްމަދު ނާޒިމް ވިދާޅުވެއްޖެ އެވެ.
މެއި މަހު ހަ ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލްގެ އިންތިހާބަށް އެމްޑީޕީންއާއި އިދިކޮޅު އިއްތިހާދު, މޯލްޑިވްސް އުނައިޓެޑް އޮޕޮޒިޝަން (އެމްޔޫއޯ) އިން ހިންގަމުންދާ ކެމްޕެއިން ހަރަކާތްތަކުގެ ތެރެއިން ހދ އަތޮޅުގެ ބައެއް ރަށްރަށް ކުރައްވާ ކެމްޕެއިން ދަތުރުގެ ތެރެއިން ވައިކަރަދޫގައި ބުރާސްފަތި ދުވަހުގެ ރޭ ބޭއްވި ހާއްސަ ޖަލްސާގައި ވާހަކަ ދައްކަވަމުން ނާޒިމް ވިދާޅުވީ ބޮޑު ބިޔަ މަޝްރޫއެއް ނުހިނގާ އެއްވެސް ރަށެއް ނޯންނާނެކަމަށް ރައީސް އަބްދުﷲ ޔާމީންގެ މިސަރުކާރުގެ ބައެއް މިނިސްޓަރުން ވިދާޅުވި ނަމަވެސް އެއީ ހަގީގަތެއް ނޫން ކަމަށެވެ.
ނާޒިމް ވިދާޅުވީ މިސަރުކާރުން ހދ. އަތޮޅުގެ އެއްވެސް ރަށެއްގައި ބޮޑު މަޝްރޫއެއް ހިންގާފައިނުވާ ކަމަށެވެ. ސަރުކާރުން ހދ.އަތޮޅުގެ ރަށްރަށުގައި ހިންގަން ވައުދު ވެފައިވާ އެއްވެސް ޕްރޮޖެކްޓެއް ނުހިންގާއިރު، ދައުލަތަށް އެންމެގިނަ ފައިސާ ވައްދާ އެއްބަޔަކީ ހދ.އަތޮޅަށް ނިސްބަތްވާ ވިޔަފާރިވެރިންނާއި އާއްމު ރައްޔިތުން ކަމަށެވެ.
ނާޒިމް ވިދާޅުވީ ލާމަރުކަޒީ ނިޒާމު ތަރައްގީ ކުރުމަށާއި ރައްޔިތުން ބާރުވެރި ކުރުމަށް މިހާރު ތައްޔާރުވަމުން މިދާ ލޯކަލް ކައުންސިލް އިންތިހާބު އެމްޔޫއޯގެ ކެންޑިޑޭޓުން ކާމިޔާބު ކުރަންޖެހޭ ކަމަށެވެ.
އެގޮތުން ނާޒިމް ވަނީ މި އިންތިހާބު ކާމިޔާބު ކުރަންޖެހޭ ބައެއް ސަބަބުތައްވެސް ވިދާޅުވެފަ އެވެ. އެގޮތުން އާއްމު ރައްޔިތުން ކާން ބޭނުންކުރާ ކާޑުގެ އަގު ބޮޑު ކުރުމާއި ކަސްޓަމްސް ޑިއުޓީ ބޮޑުކޮށް އިތުރަށް ޓެކްސްވެސް ބޮޑުކޮށް ނަގަމުންދާ ޓެކްސް އާއި ފީތައް އިތުރު ކުރަމުންދާ މައްސަލަ ފާހަގަކުރެއްވި އެވެ.
މިސަރުކާރުން ކޮރަޕްޝަނާއި ހިޔާނާތް އިންތިހާއަށް ހިންގަމުންދާ ކަމަށް ފާހަގަކުރައްވަމުން ނާޒިމް ވިދާޅުވީ އެކަންކަން ހައްލުކުރުމަށް އެމްޔޫއޯގެ ކެނޑިޑޭޓުން އިންތިހާބުކޮށް، އަންނަ ރިޔާސީ އިންތިހާބުގައި މިސަރުކާރަށް ރައްޔިތުން ނިކުމެ ނޫނެކޭ ބުނަންޖެހޭ ކަމަށެވެ.
މީގެއިތުރުން ނާޒިމް ވިދާޅުވީ ހުޅުމާލެއިންވެސް ބިންހިއްކުމަށްފަހު، ބޮޑު އަގުގައި ރައްޔިތުންނަށް ވިއްކަމުންދާއިރު، އަޅާފައިވާ ފްލެޓްތައްވެސް ހުރީ އާއްމު ރައްޔިތުންނަށް އަތްފޯރާ އަގެއްގަ ނޫން ކަމަށެވެ. އަދި ސަރުކާރުން ހުޅުމާލެ ބިން ހިންކުމަށް ދިޔަ ޚަރަދަށްވުރެ، ވަރަށް ބޮޑު ފައިދާއެއްލާފައި ވިޔަފާރީގެ އުސޫލުން ހުޅުމާލެއިން ބިން ވިއްކާއިރު، ބޯހިޔާވަހިކަން ނެތް އެތައް ރައްޔިތުންނެއް ރާއްޖޭގައި ދިރިއުޅެމުންދާ ކަމަށެވެ.
