ޗައިނާއިން ހުކުރު ދުވަހު އާ ކޭސްގެ ގޮތުގައި ރިޕޯޓުކޮށްފައިވާ 54 ކޭސްއަކީ ޗައިނާގެ ސިޓީއަކުން ފެނިގެން ރިޕޯޓުކޮށްފައިވާ ކޭސްތަކެއް ނޫންކަމަށް އެ ޤައުމުގެ ސަރުކާރުން ހާމަކޮށްފިއެވެ.

ޗައިނާގެ ނޭޝަނަލް ހެލްތް ކޮމިޝަނާއި ހަވާލާދީ މީޑިއާ ރިޕޯޓުތައް ބުނާ ގޮތުން، ޗައިނާއިން ހުކުރު ދުވަހު ރިޕޯޓުކޮށްފައިވާ 54 ކޭހަކީ އެހެން ގައުމުތަކުން އެތެރެވެފައިވާ މީހުންގެ ފަރާތުން ކޮވިޑް-19 އިން ރިޕޯޓުކޮށްފައިވާ ކޭސްތަކެވެ. މިނިސްޓްރީން ވަނީ އެއީ ޗައިނާއިން ފެނިފައިވާ ކޭސްތަކެއް ނޫންކަން މީޑިއާތަކަށް ކަށަވަރުކޮށްދީފައެވެ.

ދުނިޔޭގެ ހުރިހާ ކަންކޮޅުތަކެއްގައި ވައިރަސް އެ ގައުމުން ނައްތާލުމަށްޓަކައި ހަނގުރާމަކުރަމުންދާއިރު، އެންމެ ފުރަތަމަ މި ވައިރަސް ފެތުރެން ފެށި ޗައިނާއިން ވަނީ ހަރުދަނާ ފިޔަވަޅުތަކެއް އަޅައިފައެވެ. އެންމެ ފަހުގެ ތަފާސްހިސާބުތަކަށް ބަލާއިރު ޗައިނާގައި ވައިރަސްޖެހިގެން ރިޕޯޓުކޮށްފައިވަނީ، 81،394 މީހުންނެވެ. އިތުރަށް އެ ގައުމުން އިއްޔެގެ ނިޔަލަށް މަރުވެފައިވަނީ 3 މީހުންނެވެ.

ޗައިނާއިން ދަނީ ކޮވިޑް-19 އާއި ހަނގުރާމަކުރުމަށް ނުކުޅެދިފައިވާ ގިނަ ގައުމުތަކަށް އެހީތެރިވަމުންނެވެ. އޭގެތެރޭގައި އީރާން، އިޓަލީ އަދި ވައިރަސް އެންމެ ގިނައިން މިހާރު ޖެހިފައިވާ އެމެރިކާ ހިމެނެއެވެ.