ކޮވިޑް-19 ދުނިޔޭގައި ހަލުވިމިނެއްގައި ފެތުރެމުންދާއިރު ސިއްހަތާއި ބެހޭ މާހިރުން ގޮވާލަމުންދަނީ "ސޯޝަލް ޑިސްޓެންސިންގް" އަށެވެ. އިޖްތިމާއީ ގައިދުރުކަން ދެމެހެއްޓުމަށެވެ. މި ވައިރަހަކީ ގައިން ގަޔަށް އަރާ ބައްޔަކަށް ވާއިރު ކަމާބެހޭ ފަރާތްތަކުން އާދޭސްކުރަމުން އެގެންދަނީ މިދުވަސްކޮޅު ބޭރަށް ނުނިކުމެ، ގޭގައި މަޑުކޮށްދިނުމަށެވެ.

ރާއްޖޭގައި މިހާތަނަށް ކޮވިޑް-19 އިގެ 13 ކޭސްއެއް ފެނިފައިވާއިރު އޭގެ ތެރެއިން 9 މީހަކު މިވަނީ މިބަލިން ފަސޭހަވެފައެވެ. މިއާއި އެކު ބޭރަށް ނުނިކުމެ ގޭގައި މަޑުކުރުމަށް ކަމާބެހޭ ފަރާތްތަކުން ދެއްވަމުންގެންދަވާ އިރުޝާދުތައް ބައެއް ފަރާތްތަކުން ލުއިކޮށް ނެގުމަކީ އެކަށީގެންވާ ކަމެވެ. މިހާރަކަށް އައިސް މަގުމަތީގައި ކަމެއް ނެތި، ހަވީރަށް ސައިކަލު ބުރު ޖަހަން ނުކުންނަ މީހުންގެ އަދަދު އިތުރުވަނީ މި ސަބަބާއި ހުރެ ކަމަށްވެސް ވެދާނެއެވެ.

މުޅި ރާއްޖެ އެކީއެކައްޗަކަށް ލޮކްޑައުން ކުރުމަށް ސަރުކާރަށް ގޮވާލަމުން ދިޔަ ދުވަސްކޮޅެއްވެސް ދިޔައެވެ. ނަމަވެސް ހަގީގަތަކީ މާލެ ''ލޮކްޑައުން'' ކުރަން ގޮވާލަމުން ދިޔަ މީހުންގެ ބަހާއި ޢަމަލާއި ދިމާނުވާކަމެވެ. ލޮކްޑައުން ކުރުމަށް އަޑުން އަޑު ނަގާ ގޮވުމަށްފަހު ނުކުންނަނީ މަގުމައްޗަށް ކަމެވެ.

ސޯޝަލް ޑިސްޓެންސިންގެ މުހިއްމުކަން ކޮންމެ ނޫސްވެރިންގް ބައްދަލުވުމުގައި ހުރިހާ ފަރާތްތަކުން މިދަނީ ފާހަގަކުރަމުންނެވެ. ނަމަވެސް، ހަނދާންކޮށްދިނުމަކީ މުހިއްމުކަމެއް ކަމުގައި ދެކެތީ މިސާލަކުން އޭގެ މުހިއްމުކަން ހާމަކޮށްދެވޭތޯ ބަލާލާނަމެވެ.

ސޯޝަލް ޑިސްޓެންސިންގެ މުހިއްމުކަމުގެ މިސާލު ނަގާއިރު، ހުރިހާ ފަރާތްތަކުންވެސް ފާހަގަކުރާނީ މިހާރު މިވައިރަސް އެންމެ ބޮޑަށް ފެތުރެމުންދާ އިޓަލީގެ "ޕޭޝަންޓް ވަން"ގެ ވާހަކައެވެ. މި 38 އަހަރުގެ މީހާ ބަލީގެ އަލާމާތްތަކާއި އެކު އެތައް ތަނަކަށް ގޮސް، އެތައް ސަތޭކަ ބަޔަކަށް މިބަލި ޖެއްސީއެވެ. އެތައް ކެއުމަކަށާއި ފުޓުބޯޅަ މެޗުތަކަށާއި، އެހެނިހެން ކުޅިވަރުތައް ކުޅެން އެމީހާ އުޅުނީ އަަވަދިނެތިއެވެ. އޭނާގެ ފުށުން ބަލި އެރި މީހުންގެ ފުށުންވެސް އެތައް ބަޔަކަށް މި ވައިރަސް ޖެހިފައިވެއެވެ. ބައެއް ފަރާތްތަކުން ބުނާގޮތުގައި މި ބަލީގެ އަލާމާތްތައް ފެނުމާއި އެކު އިޖުތިމާއީ ގައިދުރުވެ، "ޕޭޝަންޓް ވަން" ގޭގައި މަޑުކޮށްލިނަމަ، އެތައް ސަތޭކަ މީހުންނަކަށް މި ބަލި ނުޖެހުނީހެވެ.

މިވާހަކަތަކުން އެނގިގެންދަނީ އެންމެ މީހެއްގެ އަމަލުތަކުގެ ސަބަބުން މުޅި ގައުމު ނުރައްކަލުގެ ތެރެއަށް ހުށެހެޅޭކަމެވެ. އެއްވެސް މީހަކު އެމީހެއްގެ ސަބަބުން އަނެކާ ނުރައްކަލުގެ ހާލަތަށް ވައްޓާލާން ބޭނުމެއް ނުވާނެއެވެ. އަންގާ އެންގުންތަކާއި ޚިލާފުވުމުން ތިމާގެ މީހުންނާއި ލޯބިވާ އެންމެން މި ވައްޓާލެވެނީ ކިހާވަރެއްގެ ނުރައްކަލަކަށްކަން ހަނދާން ކުރުންމުހިއްމެވެ. ވީމާ، މިދުވަސްކޮޅު ގޭގައި މަޑުކޮށްލައްވާށެވެ. އާއިލާއާއި ލޯބިވާ މީހުންނަށްޓަކައެވެ.

މަގުމައްޗަށް ނުނިކުމެ، މަޑުކޮށްލަންޖެހެނީ މާދިގު މުއްދަކަށްވެސް ނޫނެވެ. ކަމާއި ބެހޭ ފަރާތްތަކުން ގޮވާލާ ކަންކަމަށް ބޯނުލެނބޭ ނަމަ، އެފަރާތްތަކުން އަޅަމުންދާ ފިޔަވަޅުތައް އެޅުމުގެ ބޭނުމަކީ ކޮބާތޯއެވެ.؟ އެހެން ނުހައްދަވާށެވެ. ގޭގައި މަޑުކޮށްލައްވާށެވެ. އެ ފަރާތްތަކުން އަންގާ ކޮންމެ އެންގުމެއް ވެސް އެ އަންގަނީ ހަމަ ރައްޔިތުންގެ ރައްކާތެރިކަމަށްޓަކާ އެއް ނޫންތޯއެވެ؟

ގަބޫލުކުރަންޖެހޭ ހަގީގަތަކީ ރާއްޖޭގެ ހާލަތު ގޯސްނުވެ، މިއަދު މިއޮތީ ދިވެހި ސަރުކާރުން ދުރާލާ އެޅި ފިޔަވަޅުތަކުގެ ސަބަބުންކަމެވެ. ސިއްހީ ދާއިރާގައި މަަސައްކަތްކުރާ ފަރާތްތަކުގެ މިންނެތް މަސައްކަތްތަކުންކަމެވެ. އާއިލާއާއި ދުރުގައި، އަމިއްލަ ފުރާނަ އަތް މައްޗަށް ލައިގެން ފްރޮންޓްލައިންގައި މިއަދު ހަރަކާތްތެރިވަނީ ކިތައް މީހުންނެއްތޯއެވެ.؟

މިވަގުތު ކޮވިޑް-19 ޖެހިފައިވާ މީހުންނަށް ފަރުވާދެމުންގެންދާ ޑޮކްޓަރުންނާއި ނަރުހުންނާއި، ޓާސްކްފޯސްގެ ފަރާތްތަކުން އެކުރަނީ ނިމުމެއް ނެތް ޝުކުރު ހައްގު މަސައްކަތްތެކެވެ. ހޮސްޕިޓަލުގައާއި ކަރަންޓީނު ފެސިލިޓީތަކުގައި ހަރަކާތްތެރިވަމުންދާ ފަރާތްތަކުން އެކުރަމުން ގެންދާ މަސައްކަތް އަގުވަޒަން ކުރުން މުހިއްމެވެ.

އެހެންކަމުން، އެފަރާތްތަކުން ދެއްވާ އިރުޝާދަށް ބޯލަނބައި، ގޭގައި މަޑުކޮށްލައްވާށެވެ. ފްރޮންޓްލައިންގައި މަސައްކަތް ކުރަމުންދާ މީހުންނަށްޓަކައެވެ. ރެއާއި ދުވާލު ޚިދުމަތުގައި ތިއްބެވި ޑޮކްޓަރުންނާއި ނަރުހުންނަށްޓަކައެވެ. ސާމްޕަލްތައް ނަގާ، ޓެސްޓުކުރުމުގެ މަސައްކަތް ކުރަމުންދާ ޓެކްނީޝަނުންނަށްޓަކައެވެ. އަދިވެސް، ފަރުދާގެ ފުރަގަހުގައި މަސައްކަތް ކުރަމުންދާ މީހުންނަށްޓަކައެވެ.

ފަރުދީ ޒިންމާއަދާކުރައްވާށެވެ. ހެޔޮނުވާނެއެވެ. ގޭގައި މަޑުކޮށްލައްވާށެވެ.