ހޮނިހިރު ދުވަހުގެ ރޭ މާލޭގައި ހިނގި ނުރައްކާތެރި އެކްސިޑެންޓްގައި ޒަހަމްވި ދެމީހުންގެ ތެރެއިން ސައިކަލް ދުއްވަންއިން މީހާގެ ބޮލަށް ބޮޑު ގެއްލުމެއް ލިބިފައިވާ ކަމަށް އައިޖީއެމްއެޗުން ބުނެފި އެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވީ އެކްސިޑެންޓްގައި ޒަހަމްވެގެން އައިޖީއެމްއެޗަށް ގެނެސްފައިވަނީ 26 އަހަރުގެ ފިރިހެނެއް ކަމަށާއި އޭނާގެ ބޮލުގެ ދެ ތަނަކުން ފަޅައިގެންގޮސް ބޮލުގެ ނާށިގަނޑަށް ވެސް ގެއްލުން ލިބިފައިވާ ކަމަށެވެ.
އޮފިޝަލް ވިދާޅުވީ އޭނާއަށް ސާރޖިކަލް ވޯޑުގައި އެޑްމިޓްކޮށްގެން ފަރުވާ ދެމުންދާ ކަމަށެވެ.
ހޮނިހިރު ދުވަހުގެރޭ، ބޮޑުތަކުރުފާނު މަގުގައި ބޭންކް އޮފް ސިލޯން އާއި ބޭންކް އޮފް މޯލްޑިވްސް ހިމެނޭ ސަރަޙައްދުގައި ހިނގި އެ އެކްސިޑެންޓްގައި ދެ ފިރިހެނަކަށް އަނިޔާވެފައިވާއިރު، އެތަނުން އެކަމަށް ފަރުވާ ދެމުންދަނީ އޭޑީކޭ ހޮސްޕިޓަލުގައެވެ.
ރާއްޖެއެމްވީއަށް މަޢުލޫމާތުދެމުން، މަންޒަރު ދުށް މީހަކު ބުނީ އެކްސިޑެންޓް ހިނގަން މެދުވެރިވީ ބޮޑުތަކުރުފާނު މަގުން ބާރު ދުވެލީގައި ދުއްވާފައި ދިޔަ ސައިކަލެއް، ބޭންކް އޮފް ސިލޯން ކައިރީގައި ބަހައްޓާފައި ހުރި ސައިކަލެއްގައި ޖެހިގެން ކަމަށެވެ.
