ރައީސް އަބްދުﷲ ޔާމީންގެ ވެރިކަމުގެ ތިން އަހަރުގައި ކަންކަން ހިނގާދިޔަ ގޮތާމެދު ފުންކޮށް ވިސްނާލުމަށް ފަހު ޕިޕީއެމަށް ނިސްބަތްވާ މަޖިލީހުގެ މެމްބަރުންގެ ސިޔާސީ ކުރިމަގާމެދު ގޮތެއް ނިންމެވުން މުހިންމު ކަމަށް ހެންވޭރު އުތުރު ދާއިރާގެ މެމްބަރުން އަބްދުﷲ ޝާހިދު ވިދާޅުވެއްޖެއެވެ.
ލާމަރުކަޒީ ރާއްޖެ ނަމުގައި ރ އަތޮޅު އިންނަމާދޫގައި ހޮނިހިރު ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ރައްޔިތުންގެ މަޖިލީހުގެ ކުރީގެ ރައީސް ޝާހިދު ވިދާޅުވީ ސިޔާސީ ޕާޓީތަކުން އެކުގައި މަސައްކަތް ކުރަން އެއްބަސްވުމާއެކު ރާއްޖެ ވަނީ ހަމަމަގަށް އެޅެން ފަށާފައިވާ ކަމަށެވެ. ޕީޕީއެމްގެ މަޖިލީހުގެ މެމްބަރުން މިކަމާ ވިސްނާ ފިކުރުކުރުމަށް ފަހު ކުރިއަށް އޮތް ތަނުގައި ރާއްޖޭގެ ރައްޔިތުންގެ ޙައްގުގައި މަސައްކަތް ކުރައްވަން ބޭނުންފުޅުވާނަމަ އިދިކޮޅު ފަރާތަކާއި ގުޅުމަށް ޝާހިދު ވަނީ ގޮވާލާފައެވެ.
"މިހާރު މިއޮތީ ، ދިވެހިރާއްޖެ އެއްފަރާތަށް އެރިއެރީނުން ރާއްޖެ ހަމަމަގަށް އަޅަން ފަށާފައި، އަޅުގަނޑާއެކު މަސައްކަތް ކުރާ ޕީޕީއެމްގެ މެމްބަރުންނަން އަޅުގަނޑު މިދަންނަވާލަނީ، ތިޔަބޭފުޅުނަން މިހާރު ތިޔަ ތިއްބެވި ތަން ރަނގަޅެން ނޫނޭ، ރާއްޖެއާއި ރައްޔިތުންނަންޓަކައި މަސައްކަތް ކުރަން ބޭނުންވާ ފަރާތަށް ވަޑައިގެން އަޅުގަނޑުމެންނާ ހިތާއި ހިތް ގުޅާލަން" އަބްދުﷲ ޝާހިދު ވިދާޅުވެއްޖެއެވެ.
ޝާހިދު ޕީޕީއެމްގެ މެމްބަރުންނަން މިފަދަ މެސެޖެއް ދެއްވީ އަންނަ ހޯމަ ދުވަހު ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ ވޯޓަށް އިޝާރަތް ކުރައްވައެވެ. ޝާހިދު ވަނީ ރައީސް ޔާމީންގެ ވެރިކަމުގައި ވޭތެވެދިޔަ ތިން އަހަރުގައި ކަންތަށް ހިނގާދިޔަ ގޮތާއި މެދު ޕީޕީއެމްގެ މެމްބަރުން ވިސްނާލުމަށް އެދިލައްވާފައެވެ.
ޝާހިދު ވިދާޅުވި ގޮތުގައި ރައީސް ޔާމީންގެ ވެރިކަމުގައި އިހްލާސްތެރިކަމާއެކު މަސައްކަތް ކުރެއްވި ގިނަ ބޭފުޅުން މިއަދު ގެންދަވަނީ އެމަނިކުފާންގެ އަނިޔާވެރިކަމުން ޖަލުގައި ދުވަސްތައް ހޭދަކުރަމުން ކަމަށެވެ. އެގޮތުން ކުރީގެ ނައިބް ރައީސް އަހުމަދު އަދީބާއި، އަދާލަތު ޕާޓީގެ ރައީސް ޝެއިހް އިމްރާންގެ އިތުރުން ކުރީގެ ޑިފެންސް މިނިސްޓަރު ކާނަލް ނާޒިމް ފަދަ ބޭފުޅުންގެ ވާހަކަ ފާހަގަކުރެއްވިއެވެ.
" ސަރުކާރުގެ ތަޖުރިބާތަކަށް ބަލާލާއިރު، ވޭތެވެދިޔަ ތިން އަހަރުގެ ތަޖްރިބާއަށް ބަލާލަމުން އެގޭނޭ ސަރުކާރުގެ އެކި ހިސާބުތަކުގައި މަސައްކަތް ކުރާ ބޭފުޅުން އެދަނީ ލިނބޯފޮތްޗެއް ގޮތަށް ނޮޅާލަމުން ، މާޒިން އެކަން ހެކިވާނެ ، ދެ ނައިބް ރައީސުން އެވަނީ މަގާމުން ވަކިކޮށްފަ" ޝާހިދު ވިދާޅުވިއެވެ.
ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އަހްމަދު ނާޒިމް އިހްލާސްތެރިކަމާއެކު ރައީސް ޔާމީނާއި އެހާމެ ގާތްކޮށް މަސައްކަތް ކުރެއްވުމުނ، މިވަގުތު އެބޭފުޅާ ހުންނަވަންޖެހިފައި ވަނީ ކުރީގެ ނައިބް ރައީސް މުހައްމަދު ޖަމީލް ފަދައިން ރާއްޖެއިން ބޭރުގައި އިނގެރޭސިވިލާތުގައި ކަމަށް ޝާހިދު ވިދާޅުވިއެވެ.
"ރައްޔިތުންގެ މަޖިލީހުގެ ކުރީގެ މެމްބަރު ނާޒިމް އެ ވަނީ ޖަލަށް ލާފައި ، އެބޭފުޅާއަކީ ރައީސް ޔާމީނާއި ވަރަށް ގާތް ބޭފުޅެން ، އެހެންނަމަވެސް މިއަދު ކޮބައިތޯ، އެހެންވެ މި ދަންނަވަނީ ވަގުތު ފާއިތު ނުވަނީސް އަޅުގަނޑުމެންނާއި އެކު މަސައްކަތް ކުރަން އަންނާށޭ" ޝާހިދު ވިދާޅުވިއެވެ.
ކުރިއަށް އޮތް ލޯކަލް ކައުންސިލް އިންތިހާބު އަންނަ މެއި މަހުގެ 6 ވަނަ ދުވަހު ނުބާއްވާ ފަސްކުރި ނަމަވެސް އެމްޑީޕީން ލާމަރުކަޒީ ރާއްޖެ ހޯދުމަށް ކުރާ މަސައްކަތަށް ހުއްޓުމެން ނާންނާނެ ކަމަށާއި މި އިންތިހާބު އިދިކޮޅު އިއްތިހާދުގެ ފަރާތުން ބޮޑުތަނުން ކާމިޔާބު ކުރާނެ ކަމަށް ވެސް ޝާހިދު ވިދާޅުވިއެވެ.
