ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ އިސްތިއުނާފު ޝަރީއަތުގެ އަޑުއެހުމެއް ބޭއްވުމަށް ހައިކޯޓުގައި ތާވަލް ކޮށްފި އެވެ.

ރައީސް ޔާމީންގެ ގާނޫނީ ވަކީލުންގެ ޓީމުގެ ވަކީލަކު "ރާއްޖެއެމްވީ"އަށް ވިދާޅުވީ، މިމަހުގެ ހައެއްވާ ބުރާސްފަތި ދުވަހު ހައިކޯޓުގައި ރައީސް ޔާމީންގެ އިސްތިއުނާފް ޝަރީއަތުގެ އަޑުއެހުމެއް އޮންނަކަން އެނގިފައިވާ ކަމަށެވެ.

މަނީ ލޯންޑަރ ކުރުމުގެ ކުށް ސާބިތުވާކަމަށް ކަނޑައަޅައި ކްރިމިނަލް ކޯޓުން ރައީސް ޔާމީންގެ މައްޗަށް ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާ ކުރުމަށް ކުރި ހުކުމް، އެމަނިކުފާނުގެ ފަރާތުން ވަނީ ހައިކޯޓުގައި އިސްތިއުނާފް ކޮށްފަ އެވެ.

ރައީސް ޔާމީންގެ ފަރާތުން ހައިކޯޓަށް ހުށަހެޅި އިސްތިއުނާފް މައްސަލައިގެ ފުރަތަމަ އަޑުއެހުން ބާއްވާފައިވަނީ ނިމިދިޔަ ޖެނުއަރީ މަހުގެ 28 ވަނަ ދުވަހު އެވެ. އެދުވަހުގެ އަޑުއެހުމުގައި ކުރިއަށް ގެންގޮސްފައިވަނީ، ރައީސް ޔާމީންގެ ފަރާތުން އެމައްސަލައިގެ ތެރެއިން ހުށަހަޅާފައިވާ، އެމަނިކުފާނުގެ މައްޗަށް ކޮށްފައިވާ ހުކުމް ތަންފީޒުކުރުން ފަސްކުރުމުގެ އަމުރެއް ނެރެދިނުމަށާއި އަދި އެމަނިކުފާނު ކަފާލާތުގެ ދަށުން މިނިވަން ކޮށްދެއްވުމަށް އަމުރެއް ނެރެދިނުމަށެވެ.

އެދުވަހުގެ އަޑުއެހުމުގައި، އެމައްސަލަ ބައްލަވާ ފަނޑިޔާރުންގެ ބެންޗުން ނިންމެވީ، މައުލޫއީ ގޮތުން އެމައްސަލަ ކުރިއަށް ގެންދާނީ، މިމައްސަލައިގެ ތެރެއިން ރައީސް ޔާމީން އެދިވަޑައިގެންފައިވާ އެ ދެ އަމުރާމެދު ގޮތެއް ނިންމުމަށްފަހުގަ ކަމަށެވެ.

ބުރާސްފަތި ދުވަހު ބާއްވާ އަޑުއެހުމުގައި އިތުރުކަމެއް ސާފުކުރަން ނެތްނަމަ، އެ ދެ އަމުރާ މެދު ގޮތެއް ނިންމުމަކީ އެކަށީގެންވާ ކަމެކެވެ. ރައީސް ޔާމީންގެ ފަރާތުން އެދިވަޑައިގެންފައިވާ ދެ އަމުރު ނެރެދިނުމަށް ޕްރޮސެކިއުޓަރ ޖެނެރަލް (ޕީޖީ)ގެ އޮފީހުގެ ވަކީލު ވަނީ ދެކޮޅު ހައްދަވާފަ އެވެ.

ދައުލަތުގެ ވަކީލު ވިދާޅުވެފައިވަނީ، ރައީސް ޔާމީނުގެ މައްޗަށް ކްރިމިނަލް ކޯޓުން ކޮށްފައިވާ ޙުކުމަކީ ޤާނޫނުއަސާސީއާއި ޖިނާޢީ އިޖުރާޢަތުގެ ޤާނޫނާއި މަނީ ލޯންޑަރިންގ އަދި ޓެރަރިޒަމަށް ފައިނޭންސް ކުރުމުގެ ޤާނޫނާ އެއްގޮތަށް ކޮށްފައިވާ ޙުކުމެއް ކަމަށާއި އެހެންކަމުން ކްރިމިނަލް ކޯޓުގެ އެ ޙުކުމް ބާޠިލު ކުރަންޖެހޭ ތަނެއް ނެތް ކަމަށެވެ.

އެހެންކަމުން އެ ޙުކުމް ތަންފީޒު ކުރުން ފަސްކުރަންޖެހޭ ޤާނޫނީ އެއްވެސް ސަބަބެއް ނެތްކަމަށާއި ކްރިމިނަލް ކޯޓުގެ އެޙުކުމުގައި ގޯސްތަކެއް ހެދިފައިވާނަމަ، ނުވަތަ ހައިކޯޓަށް ހުށަހެޅިފައިވާ އިސްތިޢުނާފު މައްސަލައިން ރައީސް ޔާމީނުގެ މައްޗަށް އިއްވާފައިވާ ޖަލު ޙުކުމް ބާޠިލުވާވަރުގެ ގޯސްތަކެއް ފެންމަތިވެފައިވާނަމަ، އިސްތިޢުނާފު މަރުޙަލާ ނިމެންދެން ރައީސް ޔާމީނުގެ މައްޗަށް އިއްވާފައިވާ ޙުކުމް ތަންފީޒުކުރުން ފަސްކުރުމުގެ ޢަމުރެއް ނެރުމުގެ ފުރުޞަތު އޮތްނަމަވެސް، އަދި މިހާތަނަށް އެފަދަ އެއްވެސް ޙާލަތެއް މެދުވެރި ނުވާކަމަށް ދައުލަތުގެ ވަކީލާ ވިދާޅުވި އެވެ.

ނަމަވެސް ރައީސް ޔާމީންގެ ގާނޫނީ ވަކީލުން ވަނީ ރައީސް ޔާމީންގެ މައްސަލާގައި ކްރިމިނަލް ކޯޓުން ގޯސްތަކެއް ހަދާފައިވާކަމަށް ވިދާޅުވެ، އެ ދެ އަމުރު ނެރެދެއްވުމަށް ވަކާލާތު ކުރައްވާފަ އެވެ.

ޕީޖީ އޮފީހުގެ ވަކީލު ވިދާޅުވެފައިވަނީ، ހުކުމެއް ތަންފީޒު ކުރަމުންދާ މީހަކު ކަފާލާތުގެ ދަށުން މިނިވަން ކުރުމަށް ގާނޫނެއް އަދި އުސޫލެއްވެސް ރާއްޖޭގައި ހެދިފައި ނެތް ކަމަށެވެ. އަދި ކުށެއްގެ ތުހުމަތުގައި ބަންދުގައި ހުންނަ މީހަކު ކަފާލާތުގެ ދަށުން މިނިވަން ކުރުމަކީ ރާއްޖޭގައި އަދި ބޭރު ގައުމުތަކުގައި ވެސް ކުރަމުންދާ ކަމެއް ކަމަށެވެ.