ފުލުހުން ބަލަމުންދާ މައްސަލައަކާއި ގުޅިގެން ދަރުމަވެރިޔާ އަހުމަދު ހިޝާންގެ ޕާސްޕޯޓް ހިފަހައްޓައިއެވެ.

ރާއްޖެއެމްވީއަށް މައުލޫމާތު ދެމުން ފުލުހުން ބުނެފައިވަނީ، ފުލުހުން ބަލަމުންދާ މައްސަލައަކާއި ގުޅިގެން ކުރީގެ ޑިސްއެބިލިޓީ އެމްބެސެޑަރުކަންވެސް ކުރައްވާފައިވާ ހިޝާާންގެ ޕާސްޕޯޓް ހިފަހައްޓާފައިވާކަމަށެވެ. ނަމަވެސް ޕާސްޕޯޓް ހިފަހައްޓާފައިވަނީ ކޮން މައްސަލައަކާއި ގުޅިގެންކަމެއް ފުލުހުން ހާމައެެއް ނުކުރެއެވެ.

ހާއްސައެހީއަށް ބޭނުންވާ ކުދިންގެ ހައްގުތައް ކަށަވަރުކުރުމަށް އެތައް މަސައްކަތްތަކެއް ކޮށްފައިވާ ހިޝާންއަށް ސޯޝަލް މީޑިއާ މެދުވެރިކޮށް ޖިންސީ ގޯނާ ކުރިކަމުގެ ތުހުމަތާއި އޭގެއިތުރުންވެސް ނުފޫޒުގެ ތުހުމަތުކޮށްފައިވާއިރު ޖެނުއަރީ 31 ވަނަ ދުވަހު ރާއްޖެއިން ބޭރަށް ފުރަން އުޅެނިކޮށް ހިޝާން ހިފަހައްޓާފައިވާކަމަށްވެސް ވަނީ މައުލޫމާތު ލިބިފައެވެ.

ފުލުހުންނަށް ހުށަހެޅިފައިވާ މައްސަލައަކާއި ގުޅިގެން ސުވާލުކުރުމަށް ހިޝާން ވަނީ ފުލުހުންގެ އިދާރާއަށް މީގެކުރިން ހާޒިރުކޮށްފައެވެ.