ލުބްނާނުގައި ކުރިޔަށްދާ މުޒާހަރާގެ މަންޒަރުތައް ޤާނޫނާއި ޤަވާއިދާއި ޚިލާފަށް އިސްރާއީލުގެ މީޑިއާއަކަށް ކަވަރު ކުރަމުން ދިޔަ އެމެރިކާގެ ނޫސްވެރިއަކު ލުބްނާނުން ހައްޔަރުކޮށްފިއެވެ.
ލުބްނާނުގެ ޤައުމީ ސަލާމަތާއި ބެހޭ މައި އިދާރާއާއި ޙަވާލާދީ ބައިނަލްއަޤުވާމީ މީޑީއާތަކުން ރިޕޯޓުކުރާގޮތުގައި، ވެރިރަށް ބެއިރޫތުގައި ކުރިޔަށްދާ މުޒާހަރާގެ ތެރޭގައި ހިނގަމުންދާ ހަމަނުޖެހުންތައް އެމެރިިކާގެ ނޫސްވެރިއަކު ޤަވާއިދާއި ޚިލާފަށް، ލައިވް ސްޓްރީމް ކުރަމުންދަނިކޮށް، އެޤައުމުގެ ސަލާމަތީ ބާރުތަކުން ހައްޔަރުކޮށްފައިވާ ކަމަށެވެ. އަދި މިހާތަނަށް ބެލި ބެލުމުން އެއީ އިސްރާއީލުގެ ދުވަހު ނޫހެއް ކަމަށްވާ "ހާރިޓްޒް" އަށް ޢޭނާ ކޮށްދިން ކަމެެއްކަން ކަށަވަރުވެފައިވާކަމަށް ރިޕޯޓުތައް ބުނެއެވެ.
މިކަމާއި ބެހޭ އިތުރު ތަފުޞީލު ހާމަކޮށް ލުބްނާނުގެ ޤައުމީ ސަލާމަތާއި ބެހޭ މައި އިދާރާއިން ބުނެފައިވަނީ، ބެއިރޫތުގައި ކުރިޔަށްދާ މުޒާހަރާ ސޯޝަލް މީޑިއާ މެދުވެރިކޮށް ލައިވް ސްޓްރީމް ކުރަމުންދާތީ، އެއިދާރާއިން އެމީހަކު ހޯދަން ކުރި މަަސައްކަތުން އޭނާ ޓްރެކް ކޮށްފައިވާކަމަށެވެ. އަދި އޭނާ ދިރިއުޅޭ ތަން ހޯދާ ސުވާލު ކުރަން ގެނައިކަމަށެވެ. ލައިވް ސްޓްރީމް ކުރުމުގެ އިތުރުން "ހާރިޓްޒް" ނޫހުގައި އޭނާ ނަގާފައިވާ ފޮޓޯތައް ޗާޕުކޮށްފައިވާކަމަށްވެސް އެއިދާރާއިން ބުނެއެވެ.
އެއިދާރާއިން ބެލި ބެލުމުން އެއީ "ހާރިޓްޒް" ނޫހަށް ފްރީލާންސްކޮށް މަސައްކަތްކުރާ ނިކޮލަސް ފްރޭކްސް ނަމަކަށް ކިޔާ ނޫސްވެރިއެއްކަން ހާމަވުމާއި ގުޅިގެން، ލުބްނާނުގެ އަސްކަރިއްޔާގެ ޖާސޫސީ އިދާރާއަށް އޭނާ ހާޒިރުކޮށް ތަހްޤީޤަށް ބޭނުންވާ ސުވާލުތައް އޭނާއާއި ކޮށްފައިވާކަމަށްވެސް އެއިދާރާއިން ބުނެއެވެ. އަދިވެސް އޭނާ ހުރީ އެއިދާރާގެ ބެލުމުގެ ދަށުގައެވެ.
ލުބްނާނުގައި މުޒާހަރާތައް ކުރިޔަށްދާތާ ތިންމަސް ދުވަސްވެއްޖެއެވެ. މުޒާހަރާގެ ޙަރަކާތްތައް އެންމެ ވަރުގަދައަށް ކުރިޔަށްދާ އެޤައުމުގެ ޤާނޫނު ހަދާ މަޖިލީހުގެ ކުރިމަތީގައި ގިނަ ޢަދަދެއްގެ ނޫސްވެރިން މުޒާހަރާ ކަވަރު ކުރަން ޙަރަކާތްތެރިވެއެވެ. މީގެ ތެރޭގައި ބައިނަލްއަޤުވާމީ ނިއުސް އޭޖެންސީގެ ކޮރޮސްޕޮންޑެންޓުންވެސް ހިމެނެއެވެ. ފާއިތުވެދިޔަ ދެދުވަހު މުޒާހަރާގެ ޚަބަރުތައް ގިނަވެފައިވަނީ، މުޒާހަރާތައް ހޫނުވެ ސަލާމަތީ ބާރުތަކާއި، މުޒާހަރާގެ ބައިވެރިންނާއި ދެމެދު ކުރިމަތިލުންތަކެއް ކުރިޔަށްދާތީކަމަށް ބައިނަލްއަޤުވާމީ މީޑިއާތަކުން ރިޕޯޓުކުރެއެވެ.
