އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑް ބަލިކޮށް ލިވަރޕޫލުން ތާވަލުގެ އެއްވަނައިގައި 16 ޕޮއިންޓުގެ ލީޑެއް ނަގައިފިއެވެ.

ލިވަރޕޫލްގެ ދަނޑުގައި ކުޅުނު މި މެޗު ލިވަރޕޫލުން ކާމިޔާބު ކުރީ 2-0 ގެ ނަތީޖާ އަކުންނެވެ.

މި މެޗު ފަށައިގެން ލިވަރޕޫލުން ޔުނައިޓެޑުގެ ހާފަށް ބާރުބޮޑުކޮށް، ޔުނައިޓެޑްގެ ގޯލަށް ހަމަލާތަކެއް ވަނީ ފޮނުވައިލައިފައެވެ. އެގޮތުން މެޗުގެ 8 ވަނަ މިނެޓުގައި ސަޑިއޯ މާނޭ ނުރައްކާތެރި ހަމަލާއެއް ޔުނައިޓެޑުގެ ގޯލަށް ވަނީ ފޮނުވާލާފައެވެ. ނަމަވެސް އޭނާ ފޮނުވާލި ބޯޅަ ގޯލާ ޢަމާޒުނުވެ، އަރިމަތީ ދަނޑި ކައިރިން ދިޔައީ ބޭރަށެވެ. މެޗުގެ 14 ވަނަ މިނެޓުގައި ލިވަރޕޫލުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ވެން ޑައިކް އެވެ. މިއީ އެލެކްސްސެންޑާ އާނޯލްޑުގެ އެހީތެރިކަމާއެކު އޭނާ ކާމިޔާބުކުރި ލަނޑެކެވެ.

މެޗުގެ 25 ވަނަ މިނެޓުގައި ލިވަރޕޫލުގެ ފިރިމީނިއޯ ލަނޑެއްޖެހި ނަމަވެސް ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު އެއީ ލަނޑެއް ނޫންކަމަށް ވަނީ ނިންމާފައެވެ. އޭގެ ދެ މިނެޓު ފަހުން ފިރިމީނިއޯ އަށް ވަނީ ލަނޑު ޖެހުމަށް ރަނުގެ ފުރުސަތެއް ލިބި ބޭކާރުވެފައެވެ. މުހައްމަދު ސަލާހު ތަނަވަސްކޮށްދިން ފުރުސަތުގައި ފިރިމީނިއޯ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ. މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާ އަކުން ލިވަރޕޫލް ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެން ލިވަރޕޫލުން އެޓީމުގެ އެޓޭކްތައް އިތުރަށް ވަރުގަދަ ކުރިއެވެ. އެގޮތުން މެޗުގެ 47 ވަނަ މިނެޓުގައި އިތުބާރު ފޯވަރޑް ސަލާހަށް ވަނީ ލަނޑު ޖެހުމަށް ރަނުގެ ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ބޯޅަ ދިޔައީ އަރިމަތި ދަނޑި ކައިރިން ބޭރަށެވެ. މެޗުގެ 59 ވަނަ މިނެޓުގައި ޔުނައިޓެޑަށް ވަނީ ނަތީޖާ ހަމަހަމަ ކުރުމަށް ރަނުގެ ފުރުސަތެއް ލިބި ބޭކާރުވެފައެވެ. ޔުނައިޓެޑްގެ މާޝިއާލް ފޮނުވާލި ބޯޅަ ގޯލުގެ ހުރަސް ދަނޑި މަތިން ދިޔައީ ބޭރަށެވެ. މެޗުގައި ލިވަރޕޫލުން ކާމިޔާބު ކުރި ދެވަނަ ލަނޑު މެޗުގެ ފަހު މިނެޓުގައި އެޓީމަށް ކާމިޔާބު ކޮށްދިނީ ސަލާހެވެ.

މެޗަށް ފަހު ވާހަކަދައްކަމުން ލިވަރޕޫލްގެ ކޯޗު ޔާގެން ކްލޮޕް ބުނީ މި މެޗުގައި ފެނިގެންދިޔައީ ލިވަރޕޫލް ކުޅުންތެރިންގެ ބުރަ މަސައްކަތް ކަމަށާއި، މި މެޗުގައި ލިވަރޕޫލް ކުޅުންތެރިން ކުރި ހިތްވަރަށް ސާބަސް ދޭ ކަމަށެވެ. އަދި މި މެޗުގައި ލިވަރޕޫލް ކުޅުންތެރިންނަށް ލަނޑު ޖަހަން ގިނަ ފުރުސަތުތަކެއް ލިބި، އެއާއި އެއްވަރަށް ލަނޑު ޖަހާފައި ނުވިނަމަވެސް، މި ނަތީޖާއާއި މެދު ހިތްހަމަ ޖެހޭ ކަމަށް ކްލޮޕް ބުންޏެވެ.

މި ނަތީޖާއާ އެކު ލިވަރޕޫލުން ތާވަލުގެ އެއްވަނައިގައި އޮތީ 22 މެޗުން ލިބުނު 64 ޕޮއިންޓާއެކުގައެވެ. ދެވަނައިގައި އެންމެ ފަހުގެ ޗެމްޕިއަން މެންޗެސްޓަރ ސިޓީ އޮތީ 23 މެޗުން ލިބުނު 48 ޕޮއިންޓާއެކުގައެވެ. މި މެޗުން ބަލިވި މެންޗެސްޓަރ ސިޓީ އޮތީ 23 މެޗުން ލިބުނު 34 ޕޮއިންޓާއެކު ތާވަލުގެ ފަސް ވަނައިގައެވެ.