އިޓާލިއަން ލީގުގައި ރޮނާލްޑޯ ކާމިޔާބުކުރި ފުރަތަމަ ހެޓްރިކާއެކު ކަލިއާރީ އަތުން ޔުވެންޓަރސް މޮޅުވެއްޖެއެވެ.

ޔުވެންޓަރސް ދަނޑުގަ، ކުޅުނު މި މެޗު ޔުވެންޓަރސްއިން ކާމިޔާބުކުރީ 4-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގަ، ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މި ހާފުގައި ޔުވެންޓަރސްއަށް ވަނީ ލަނޑު ޖަހަން ރަނުގެ ފުރުސަތުތަކެއް ލިބި ބޭކާރުވެފައެވެ. އެގޮތުން މެޗުގެ 28 ވަނަ މިނެޓުގައި ޔުވެންޓަރސްގެ ޕައުލޯ ޑިބޭލާ އަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. މީގެ އިތުރުން ޔުވެންޓަރސްގެ ކްރިސްޓިއާނޯ ރޮނާލްޑޯ އަށް ވެސް ވަނީ މި ހާފުގައި ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ. މި ހާފުގަ، ކަލިއާރީގެ ޑިފެންޑަރުން ވަނީ ޔުވެންޓަރސްގެ ގިނަ ހަމަލާތަކެއް ހުއްޓުވާފައެވެ.

މެޗުގެ ފުރަތަމަ ހާފު ނިމިގެން ދިޔައީ 0-0 ގެ ނަތީޖާއަކުން އެއްވަރުވެގެންނެވެ.

ދެވަނަ ހާފު ޔުވެންޓަރސްއިން ފެށީ ވަރުގަދަ ކޮށެވެ. އެގޮތުން ޔުވެންޓަރސްއިން ވަނީ މިހާފުގަ، އެޓީމުގެ އެޓޭކްތައް އިތުރުކޮށް ފުލުފުލުގައި ކަލިއާރީގެ ގޯލަށް ހަމަލާތައް ފޮނުވާލާފައެވެ. މެޗުގެ 49 ވަނަ މިނެޓު ޔުވެންޓަރސްއިން ވަނީ ލަނޑު ޖަހާ ލީޑު ނަގާފައެވެ. ކަލިއާރީގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ މި ލަނޑު އެޓީމަށް ކާމިޔާބުކޮށް ދިނީ އިތުބާރު ފޯވަރޑް ރޮނާލްޑޯއެވެ.

ޔުވެންޓަރސްގެ ދެވަނަ ލަނޑު މެޗުގެ 67 ވަނަ މިނެޓުގައި ރޮނާލްޑޯ ކާމިޔާބުކުރި އިރު މިއީ އޭނާ ޕެނަލްޓީއަކުން ކާމިޔާބުކުރި ލަނޑެކެވެ. މިއީ ޑިބޭލާ އަށް އޭރިޔާ ތެރެއިން ކަލިއާރީގެ ކުޅުންތެރިން ކުރި ފައުލްއަކާއި ގުޅިގެން ލިބުނު ޕެނަލްޓީއެކެވެ. މެޗުގެ 81 ވަނަ މިނެޓުގައި ޔުވެންޓަސްއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ހިގުއެންއެވެ. މި ލަނޑު އޭނާ ކާމިޔާބު ކުރީ ރޮނާލްޑޯގެ އެހީތެރިކަމާއިއެކުގައެވެ. އަދި އޭގެ ދެ މިނެޓު ފަހުން ރޮނާލްޑޯ ވަނީ އިތުރު ލަނޑެއް ޖަހާ އޭނާގެ ހެޓްރިކް ފުރިހަމަ ކޮށްފައެވެ.

މި މެޗުން ލިބުނު މޮޅާއެކު ޔުވެންޓަރސް އޮތީ 18 މެޗުން ލިބުނު 45 ޕޮއިންޓާއެކު، ލީގު ތާވަލުގެ ދެވަނައިގައެވެ. ތާވަލުގެ އެއްވަނައިގަ އޮތް އިންޓަރ މިލާނަށް ވެސް ލިބިފައިވަނީ 18 މެޗުން 45 ޕޮއިންޓެވެ. ލީގު ތާވަލުގެ ތިންވަނައިގަ އޮތް ލާޒިއޯއަށް 17 މެޗުން ލިބިފައިވަނީ 39 ޕޮއިންޓެވެ.