ހުއްދަ ނެތި ވެކްސިން ރާއްޖެއަށް އެތެރެ ނުކުރުމަށާއި އަދި އެފަދަ ވެކްސިން ބޭނުން ނުކުރުމަށް ހެލްތް މިނިސްޓްރީން އިލްތިމާސް ކޮށްފިއެވެ.
އިންފްލުއެންޒާ ވެކްސިން ރާއްޖެއަށް އެތެރެކުރުމާ ގުޅޭ ގޮތުން ހެލްތް މިނިސްޓްރީން އަންގާރަ ދުވަހު ނެރުނު އިއުލާނުގައި ބުނެފައި ވަނީ ރާއްޖޭގައި މިދުވަސްވަރު އަރިދަފުސް ރޯގާ އާއި އިންފުލުއެންޒާ ފަދަ ނޭވާލާ ނިޒާމުގެ ބަލިތައް އިތުރުވަމުން ދިއުމާ ގުޅިގެން އިންފްލުއެންޒާ ވެކްސިން، ރާއްޖެއަށް ދަތުރުން އިތުރުވަމުން އަންނަ ކަމަށެވެ. މި ވެކްސިން ވަކިވަކި ފަރުދުން ވެސް ގެންނަ ކަމަށް މިނިސްޓްރީން ބުނެފައިވެ އެވެ.
ހެލެތް މިނިސްޓްރީގެ އިއުލާނުގައި ބުނެފައިވާ ގޮތުގައި އިންފްލުއެންޒާ ވެކްސިންއަކީ އުފައްދާ ވަގުތުން ފެށިގެން ވެކްސިން ބޭނުން ކުރުމާ ހަމައަށް ދެ ޑިގްރީ ސެލްސިއަސް އާއި އަށް ޑިގްރީ ސެލްސިއަސްއާ ދެމެދު ފިނިހޫނު މިން ހުންނަ ތަނެއްގައި ބަހައްޓަން ޖެހޭ އެއްޗެކެވެ. މި ނޫން ގޮތަކަށް ގެންގުޅެފިނަމަ ވެކްސިން އަކީ ހަލާކުވާނެ އެއްޗެއް ކަމަށް މިނިސްޓްރީގެ އިއުލާނުގައި ބުނެފައިވެއެވެ،
އެހެން ކަަމުން މިފަދަ ވެކްސިން ބޭނުންކުރުމަކީ އޭގެ ސަބަބުން ސިއްހަތަށް ނޭދެވޭ އަސަރު ކޮށްފާނެ ކަމެއް ކަމެއް ކަމަށް ވެސް އިއުލާނުގައި ބުނެފައިވެއެވެ،
ވެކްސިން ގެނައުމުގައި އަމަލުކުރަންޖެހޭ މިންގަނޑުގައިވާ ގޮތުން، ޕެކްކުރުމާއި ގެންގުޅުމުގެ އެއްވެސް މަރުހަލާ އެއްގައި ވެކްސިން އަށް ގެއްލުމެއްވާ މިންވަރަކަށް ފިނިހޫނުމިނަށް ބަދަލު އަތުވެއްޖެނަމަ، އެކަން އެނގޭނެ ޑިވައިސްއެއް އެޕެކްގައި ނުވަތަ ކޮންޓެއިނަރ ގައި ހިމެނެންވާނެ ކަމަށް ހެލެތް މިނިސްޓްރީގެ އިއުލާނުގައި ބުނެފައިވެއެވެ، އެހެންކަމުން، ވެކްސިންގެ ރައްކާތެރިކަން ކަށަވަރުނުވާ ފަދަ ގޮތްގޮތަށް އަދި އެކަމުގެ ހުއްދަ ނެތި ވެކްސިން ރާއްޖެއަށް އެތެރެ ނުކުރުމަށާއި މިފަދަ ވެކްސިން ބޭނުން ނުކުރެއްވުމަށް އިލްތިމާސް ކުރާ ކަމަށް ހެލްތް މިނިސްޓްރީގެ އިއުލާނުގައި ބުނެފައިވެއެވެ.
