ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އޭސް ޓްރެވެލްސްއަށް ދޭން ޖެހޭ ފައިސާ ނުދައްކައިގެން އެ ކުންފުނިން އެފްއޭއެމްއާއި ދެކޮޅަށް ސިވިލް ކޯޓަށް މައްސަލަ ހުށަހަޅައިފިއެވެ.
މައުލޫމާތު ލިބިފައިވާ ގޮތުގައި އެފްއޭއެމުން އޭސް ޓްރެވަލްސްއަށް 8 ލައްކައެއްހާ ރުފިޔާ ދައްކަންޖެހެއެވެ. މިއީ ގައުމީ ފުޓުބޯޅަ ޓީމުގެ ދަތުރުތަކަށް އެފްއޭއެމުން ގަތް އެއަރ ޓިކެޓުތަކަށް ދައްކަންޖެހޭ ފައިސާއެވެ.
މި މައްސަލައިގައި ސިވިލް ކޯޓުން ނެރުނު ކޯޓަށް ހާޒިރުވުމުގެ ޗިޓުގައިވަނީ އެފްއޭއެމްގެ މައްޗަށް އޭސް ޓްރެވަލްސް ޕްރައިވެޓް ލިމިޓެޑުން ދަޢުވާ ކުރާ ޗެކުން ލިބެންޖެހޭ ފައިސާ ހޯދުމަށް އެދި ހުށަހަޅައިފައިވާ މައްސަލައިގެ ބޭނުމަށް އަންނަ އަހަރު ޖަނަވަރީ މަހުގެ އަށްވަނަ ދުވަހު ކޯޓަށް ހާޒިރުވާން އަންގައިފައެވެ. މި މައްސަލަ އޮތީ ސިވިލް ކޯޓުގެ ޑިސްޕިއުޓް ރިޒޮލިއުޝަން މަރުޙަލާގައެވެ.
އެފްއޭއެމާއި ދެކޮޅަށް އޭސް ޓްރެވެލްސްއިން ކޯޓަށް މައްސަލަ ހުށަހެޅި އިރު އެފްއޭއެމުން އިންތިޒާމުކޮށް ބާއްވާ ދިރާގު ދިވެހި ޕްރިމިއަރ ލީގުގެ މެޗުތައް ދައްކަމުން އަންނަ ވީ މީޑިއާގެ ވީ ސްޕޯޓްސްއާ އެކު ވެފައިވާ އެއްބަސްވުމާއި އެއްގޮތަށް ފައިސާ ނުދައްކާތީ މެޗުތައް ލައިވް ކުރުން ވީ މީޑިއާއިން ވަނީ ހުއްޓާލާފައެވެ.
މި މައްސަލައިގަ ވީ މީޑިއާއިން ބުނީ ދިރާގު ދިވެހި ޕްރިމިއަރ ލީގުގެ މެޗުތަކަކީ އެފްއޭއެމާއެކު ވެފައިވާ އެއްބަސްވުމެއްގެ ދަށުން މަހުން މަހަށް ބިލު ކުރާ އުޞޫލުން ވީޓީވީން ލައިވް ކުރާގޮތަށް ކާމިޔާބުކުރި ބިޑެއްކަމަށާއި، ލީގުގެ ދެވަނަ ބުރުގެ ކުޅުން މިހާރު ކުރިއަށްދާއިރު، މިހާތަނަށްވެސް އެފްއޭއެމުން އެއްވެސް ފައިސާއެއް ވީ މީޑިއާއަށް ދައްކާފައި ނުވާކަމަށެވެ.
