އާސެނަލްގެ މުސްލިމް ކުޅުންތެރިޔާ މެސިޓް އޮޒިލް އަކީ އާސެނަލް އަށް މުހިންމު ކުޅުންތެރިޔެއް ކަމަށް އެ ކްލަބްގެ ކޯޗު ކަމާއި ދާދިފަހުން ހަވާލުވި މިކެލް އާޓެޓާ ބުނެފިއެވެ.
އާޓެޓާ ބުނީ އޮޒިލް އަކީ މިވަގުތު އާސެނަލްގައި ތިބި ކުޅުންތެރިންގެ ތެރެއިން އެންމެ މުހިންމު އެއް ކުޅުންތެރިޔާ ކަމަށާއި އޭނާ އަކީ ތަޖުރިބާކާރު މޮޅު މިޑްފިލްޑަރެއް ކަމަށެވެ. އޮޒިލް ދިފާއު ކޮށް ވާހަކަދައްކަމުން އާޓެޓާ ބުނީ ކޮންމެ ކުޅުންތެރިއަކަށް ވެސް އެކުޅުންތެރިޔާގެ އަމިއްލަ ހިޔާލު ފާޅު ކުރެވެން ވާނެ ކަމަށެވެ.
އާޓެޓާ އިތުރަށް ބުނީ އޭނާގެ ގޭމް ޕްލޭންގައި އޮޒިލް ވެގެންދާނީ މުހިންމު ދައުރެއް އަދާކުރާނެ ކުޅުންތެރިއަކަށް ކަމަށާއި އޮޒިލް އަކީ އޭނާ އަށް ލިބޭ ކޮންމެ ފުރުސަތެއްގައި ލަނޑު ޖެހުމަށް ތަނަވަސް ކޮށްދޭ ކުޅުންތެރިއެއް ކަމަށެވެ.
އުއިގަރ މުސްލިމުންނާ މެދު ޗައިނާއިން ކަންތައްކުރާ ގޮތާއި ބެހޭ ގޮތުން ނުރުހުން ފާޅުކޮށް އޮޒިލް ވަނީ އޭނާގެ އިންޓަގްރާމް އެކައުންޓުގައި ޕޯސްޓެއް ލިޔެފައެވެ.
ތުރުކީގެ މުސްލިމް ދަރިފަސްކޮޅަށް ނިސްބަތްވާ އޮޒިލްގެ ޕޯސްޓުގައި އޭނާ ބުނެފައިވަނީ، ޝިންޖިއާން ގައި ދިރިއުޅޭ މުސްލިމުންގެ މިސްކިތްތައް ބަންދުކޮށް، ކީރިތި ޤުރުއާން އަންދައި، ދީނީ ޢިލްމުވެރިން ބަންދުކުރަމުންދާއިރު އެއްވެސް އެއްޗެއް ބުނަން ނުކެރި މުސްލިމު އުއްމަތް ތިބެނީ ހަނުކަމަށެެވެ
އޮޒިލްގެ އެ ވާހަކަތާކާއި ގުޅިގެން ޗައިނާގައި ތިބޭ އާސެނަލް ފޭނުން ތިބީ ރުޅިގަދަވެފައެވެ. ބައެއް ފޭނުން ބުނަނީ އެމީހުން ތާއިދުކުރާ ކްލަބެއްގެ ކުޅުންތެރިއަކު އެފަދަ ''ދޮގު'' ވާހަކަތަކެއް ދައްކާނެ ކަމަށް ހީނުކުރާ ކަމަށެވެ.
މައްސަލަ ހޫނުވުމުން އާސެނަލުން ބަޔާނެއް ނެރެ ބުނެފައިވަނީ، އޮޒިލް ފާޅުކޮށްފައިވަނީ އޭނާގެ އަމިއްލަ ޝުޢޫރުތައް ކަމަށެވެ. ޕްރިމިއަރލީގުގައި އާދިއްތަ ދުވަހު އާސެނަލް އާއި މެންޗެސްޓަރ ޔުނައިޓެޑް ކުޅެން ހަމަޖެހިފައިވާ މެޗުގެ ލައިވް ކަވަރޭޖް ޗައިނާގެ ސީސީޓީގެ ޕްރޮގުރާމް ގައިޑުން ނަގާފައިވާއިރު، އެ ކްލަބުން އޮޒިލް ވަކިކުރަން ޗައިނާގެ ފޭނުން ދަނީ ގޮވާލަމުންނެވެ.
