ބޭރުގެ ފަރާތްތަަކަށް ބިން މިލްކުކުރެވޭ ގޮތަށް ގާނޫނު އަސާސީ އިސްލާހުކުރި އިރު، އެކަން ކުރަނީ ވަކި ބަޔަކަށް ދިނުމަށް ކަމަށް މެންބަރުންގެ ގާތުގައި ބުނެފައިނުވާ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ޕީޕީއެމް މެންބަރު މުހައްމަދު އަމީތު ވިދާޅުވެއްޖެ އެވެ.
އާދިއްތަ ދުވަހު އަމީތު ކުރެއްވި ޓްވީޓެއްގައި ވިދާޅުވީ ގާނޫނު އަސާސީ އިސްލާހުކުރަނީ ވަކި ތަނެއް ވަކި ބަޔަކަށް ދިނުމަށް ކަމަށް އެއިރު މެންބަރުންނާ ހިއްސާ ނުކުރާ ކަމަށާއި، ކަން ހިނގީ އެގޮތަށް ނަމަ އެއީ އޮޅުވާލުމެއް ކަމަށެވެ.
QA islaah kurany raajjeyge vaki thaneh vaki bayakah dhinumah kamah eyru memberunna hissaa nukurey.Kan hingee egothah nama e ee olhuvaalumeh.
— ᗰᴏʜᴀᴍᴇᴅ ᗩᴍᴇᴇᴛʜ (@MohamedAmeeth) March 19, 2017
އަމީތު މިފަދައިން ވިދާޅުވެފައި މިވަނީ، ބޭރުގެ ފަރާތްތަކަށް ބިން މިލްކުކުރެވޭ ގޮތަށް ގާނޫނު އަސާސީ އިސްލާހުކުރީ ސައުދީ އަރަބިއްޔާގެ ޝާޚީ އާއިލާގެ ބޭފުޅަކަށް ފ. އަތޮޅު ހިމިތި ހިމެނޭ ސަރަހައްދު މިލްކުކުރެވޭ ގޮތް ހެދުމަށް ކަމަށް ޕީޕީއެމް ޕާލިމެންޓްރީ ގްރޫޕުގެ ލީޑަރު އަހުމަދު ނިހާން ވިދާޅުވާ އޯޑިއޯ ލީކުވެފައިވަނިކޮށެވެ.
އެ އޯޑިއޯގައި ނިހާނު ވިދާޅުވެފައިވަނީ ބޭރުގެ ފަރާތްތަކަށް ބިން މިލްކުކުރެވޭ ގޮތަށް ގާނޫނު އަސާސީ އިސްލާހުކުރަންޖެހުނީ އެ ހިސާބުގަނޑު ސައުދީ ވަލީއަޚުދަށް މިލްކުކުރެވޭ ގޮތް ހެދުމަށް ކަމަށެވެ. އަދި ގާނޫނު އަސާސީ ބަދަލުކޮށް ކުރި ކަންތައް ނުވަތަ ޖެހި މަޅި ރައްޔިތުންނަށް ނޭނގޭނެ ކަމަށާއި ރައްޔިތުންނަށް މިވީގޮތް އެނގޭނީ މިލްކުކުރަނީ ފ. އަތޮޅުކަން އެނގޭ ދުވަހަކުން ކަމަށް ވެސް ނިހާނު ވިދާޅުވެފައިވެ އެވެ.
ފ. އަތޮޅު ވިއްކާލުމުގެ އަޑުތައް ގަދަވެފައިވަނިކޮށް މިމަހުގެ 6 ވަނަ ދުވަހު ވެސް އަމީތު ވަނީ ޓްވީޓެއް ކުރައްވާފަ އެވެ. އަމީތު ވަނީ ލިބިދާނެ މާލީ ފައިދާއަށްޓަކައި ގައުމުގެ އިސްތިގުލާލު ގުރުބާން ކޮށްގެން ނުވާނެ ކަމަށް ވިދާޅުވެ، ބޭރުގެ ފަރާތްތަކަށް ރާއްޖޭގެ ބިން މިލްކުުކުރުމާ ދެކޮޅު ހައްދަވާފަ އެވެ.
މިމަހުގެ 6 ވަނަ ދުވަހު އަމީރު ކުރެއްވި އެ ޓްވީޓަކީ ސަރުކާރުގެ ސިޔާސަތަކާ ދެކޮޅަށް އަމީތު ވާހަކަ ދެއްކެވި ފުރަތަމަ ފަހަރެވެ.
ބޭރުގެ ފަރާތްތަކަށް ރާއްޖޭގެ ބިން މިލްކުކުރެވޭ ގޮތަށް ގާނޫނު އަސާސީ އަށް ހުށަހެޅި އިސްލާހަށް ޕީޕީއެމް ޕާލިމެންޓްރީ ގްރޫޕުގެ ގިނަ މެންބަރުންތަކެއް ދެކޮޅު ހެއްދެވި އެވެ. ނަމަވެސް، އެ އިސްލާހަށް މެންބަރުން ވޯޓް ދެއްވީ އެކަމުގެ ސަބަބުން 8 ބިލިއަން ޑޮލަރު ރާއްޖެ ވަންނާނެ ކަމަށް ރައީސް އަބްދުﷲ ޔާމީން ވިދާޅުވުމުންނެވެ. ނަމަވެސް، އެކަމުގެ ތަފްސީލު ހިއްސާކޮށްފައިވަނީ މަދު މެންބަރަކާ އެވެ.
