ނޭޕާލުގައި ކުރިޔަށްދާ 13 ވަނަ ސައުތު އޭޝިއަން ގޭމްސްގައި ނެރުނު ދަށް ނަތީޖާ ތަކާއި އެކު ގައުމީ ކޯޗު ޕީޓަރ ސެގާޓް މަގާމުން ވަކި ކޮށްފިއެވެ.
ޕީޓާ ސެގާޓް މަގާމުން ވަކި ކުރިކަން ފުޓުބޯޅަ އެސޯސިއޭޝަނުން ވަނީ ކަށަވަރު ކޮށްދީފައެވެ. އެފްއޭއެމުން ނެރުނު ބަޔާނުގައި ބުނެފައިވަނީ، ގައުމީ ކޯޗު ޕީޓަރ ސެގާޓާއި، އެފްއޭއެމް އާއި މަޝްވަރާ ކުރުމަށްފަހު ކޯޗާއި އެކު ހެދިފައިވާ އެއްބަސްވުން ބާތިލު ކުރުމަށް ނިންމައިފައިވާ ކަމަށެވެ. އަދި ސެގާޓް ގައުމީ ޓީމަށް ހޯދައިދިން ކާމިޔާބީ އާއި ކުރިއެރުމަށް އެފްއޭއެމުން ވަނީ ޝުކުރު ދަންނަވާފައެވެ.
ގައުމީ ޓީމު ކޯޗު ސެގާޓް މަގާމުން ވަކި ކޮށްފައި މިވަނީ މިހާރު ކުރިޔަށްދާ ސައުތު އޭޝިއަން ގޭމްސްގައި މެޗަކުން މޮޅުނުވެވި، މުބާރާތް ނިންމާލަން ޖެހުމާއި ގުޅިގެންނެވެ. ރަނަށް އަމާޒު ހިފައިގެން އައި ޓީމުން މި މުބާރާތް ނިންމާލީ މިހާތަނަށް ގައުމީ ފުޓުބޯޅަ ޓީމަކުން ނެރުނު އެންމެ ދަށް ނަތީޖާ އާއި އެކުގައެވެ. މި މުބާރާތުގައި ރާއްޖެއިން ކުޅުނު ފުރަތަމަ މެޗުގައި ސްރީލަންކާ އަތުން އެއްވަރު ވެފައިވާއިރު، ދެވަނަ އަށް ކުޅުނު މެޗުން ބަންގްލަދޭޝް އަތުން ވެސް ވަނީ އެއްވަރު ވެފައެވެ. އަދި ބޫޓާނާއި، ނޭޕާލް އަތުން ބަލިވެ ރާއްޖެއިން މުބާރާތް ނިންމާލާން ޖެހުނީ ހުސް އަތާއެވެ.
މިދިޔަ އަހަރު މާރޗް މަހުގެ 14 ވަނަ ދުވަހު ގައުމީ ޓީމުގެ ކޯޗު ކަމުގެ މަގާމާއި ހަވާލުވި ޕީޓަރ ސެގާޓް މަގާމާއި ހަވާލު ވުމަށްފަހު ބުނެފައިވަނީ އޭނާގެ އަމާޒަކީ ދިވެހި ފުޓުބޯޅައަށް ބަދަލު ތަކެއް ގަނައުން ކަމަށެވެ. އޭގެ ފަހުން މިދިޔަ އަހަރު އޮތް ސާފް ސުޒުކީ ކަޕް ވަނީ ސެގާޓްގެ ކޯޗު ކަމުގެ ދަށުން ރާއްޖެއިން ހޯދައިފައެވެ.
ސެގާޓް އަށް އެންމެ ބޮޑަށް ފާޑު ކިޔުން އަމާޒު ވެފައިވަނީ އޭރުގެ ގައުމީ ޓީމުގެ ކެޕްޓަން އަލީ އަޝްފާގް ސްކޮޑުން ބޭރު ކުރުމާއި ގުޅިގެންނެވެ. އަޝްފާގް ސްކޮޑުން ބޭރުކޮށްފައިވަނީ ނޫސްވެރިންގެ ބައްދަލުވުމަށް ހާޒިރު ނުވުމުންނެވެ. އޭގެ ފަހުން ސެގާޓް ވަނީ އަޝްފާގާއި ބެހޭ ގޮތުން މީޑިއާގައި އެކި ފަހަރު އެކި ގޮތް ގޮތަށް ވާހަކަ ދައްކާފައެވެ.
އޭޝިއަން ކަޕަށް ކޮލިފައިވުމުގެ އަމާޒުގައި ސެގާޓާއި މަގާމު ހަވާލު ކުރި އިރު، ކޮލިފިކޭޝަނުގައި މިހާތަނަށް ރާއްޖެއަށް މޮޅު ވެވިފައިވަނީ ދެ މެޗުންނެވެ. ކޮލިފިކޭޝަނުގައި ރާއްޖެ ގްރޫޕުގެ ހަތަރު ވަނައިގައި އޮތް އިރު އެއް ވަނައިގައި އޮތީ ސީރިއާއެވެ.
