ނޭޕާލުގައި ކުރިޔަށްދާ ސައުތު އޭޝިއަން ގޭމްސްގެ ފުޓުބޯޅަ އިވެންޓުގައި ރާއްޖެއާއި ސްރީލަންކާ ބައްދަލުކުރި މެޗު އެއްވަރު ވެގެން ނިމިއްޖެއެވެ.
ނޭޕާލުގެ ދަސްރަތު ސްޓޭޑިއަމުގައި ކުޅުނު މި މެޗު ނިމުނީ 0-0 ގެ ނަތީޖާ އަކުންނެވެ.
މެޗުގެ ފުރަތަމަ ހާފު ފަށައިގެން ރާއްޖެއިން އެޓޭކިން ގޭމެއް ކުޅުނުއިރު، މެޗުގެ ވަރަށް ކުރީ ކޮޅު ރާއްޖޭގެ ނާއިޒް ހަސަން (ދާދު) އަށް ލަނޑު ޖަހަން ރަނުގެ ފުރުސަތެއް ލިބިގެންދިޔައެވެ. ނަމަވެސް ލަންކާ ކުޅުންތެރިއެއް ކަޓުވައިލުމަށްފަހު އޭނާ ފޮނުވާލި ބޯޅަ ލަންކާ ކީޕަރު ސުޖަން ޕެރޭރާ ވަނީ ދިފާއު ކޮށްފައެވެ. ދާދުގެ އިތުރުން މެޗުގެ ފުރަތަމަ ހާފުގައި އިބްރާހީމް މަހްދީ ހުސެއިން (ފޭދޫ އިއްބެ) އަށް ވެސް ވަނީ ފުރުސަތެއް ލިބި ބޭކާރުވެފައެވެ.
މެޗުގެ ދެވަނަ ހާފު ފަށައިގެން ރާއްޖެ ޓީމުން އެޓޭކްތައް އިތުރަށް ވަރުގަދަ ކުރިއިރު، ދެވަނަ ހާފުގައި ހަމްޒާ މުހައްމަދު (ހަމްޕު) ފޮނުވާލި ހިލޭ ޖެހުން އަމާޒުވީ ގޯލުގެ މަތީ ދަނޑިއަށެވެ. އޭގެ ފަހުން ވެސް ރާއްޖެ ކުޅުންތެރިން ދިޔައީ ލަންކާގެ ގޯލަށް ފުލުފުލުގައި ހަމަލާތައް އުފައްދަމުންނެވެ. އެގޮތުން މެޗުގެ ފަހު ހާފު ނިމެނިކޮން ރިހާމް އަބްދުލް ޣަނީ (ބޮބީ) އަށް ވަނީ ހުސް ފުރުސަތެއް ލިބި ބޭކާރުވެފައެވެ. އޭރިޔާ ތެރޭ ހުސްކޮށްހުރެ، ބޮބީ ފޮނުވާލި ބޯޅަ ގޯލާ އަމާޒުވެފައެއް ނުވެއެވެ.
މެޗަށްފަހު ރާއްޖެ ކޯޗު ޕީޓަރ ސެގާޓް ބުނީ މި މެޗުގައި ގިނަ ވަގުތު ބޯޅަ ކޮންޓްރޯލްކޮށް، މޮޅަށް ކުޅުނީ ރާއްޖެއިން ކަމަށާއި މެޗުގައިލަނޑު ޖަހަން ރާއްޖެއިން ގިނަ ފުރުސަތު ތަކެއް ހޯދިކަމަށެވެ. މީގެ އިތުރުން ސެގާޓް ބުނީ މިއަދުގެ މެޗުގައި ލަނޑު ޖެހުމަށް ދިމާވި މައްސަލަތައް ހައްލުކުރުމަށް ޕްރެކްޓިސް ކުރުމަށް ވަގުތު ނެތް ކަމަށާއި އަންގާރަ ދުވަހު ބަންގްލަދޭޝާ ދެކޮޅަށް މެޗު ކުޅޭއިރު ޖެހޭނީ އެނަލައިޒް ކޮށްގެން މެޗަށް ނިކުންނަން ކަމަށެވެ.
މި މުބާރާތުގައި ރާއްޖެއިން އަންގާރަ ދުވަހު ހަވީރު ބަންގްލަދޭޝް އާއި ދެކޮޅަށް ނިކުންނައިރު ޑިސްމްބަރ 5 ވަނަ ދުވަހު ނިކުންނާނީ ބޫޓާން އާއި ދެކޮޅަށެވެ. އަދި މި މަހު 7 ވަނަ ދުވަހު މުބާރާތް ބާއްވާ ގައުމު ކަމަށްވާ ނޭޕާލާއި ދެކޮޅަށް ރާއްޖެއިން ކުޅޭނެއެވެ. މި މުބާރާތުގެ ފައިނަލްގައި ވާދަކުރާނީ އެންމެ މަތިން ޕޮއިންޓް ހޯދާ ދެ ޓީމެވެ.
