ރައްޔިތުންގެ މަޖިލީހުގެ ރައީސް ޢަބްދުﷲ މަސީހަށް އެމަނިކުފާނުގެ މަޤާމަށްވުރެ މުހިއްމު އެއްވެސް އެއްޗެއް ނޯންނަ ކަމަށް ހެންވޭރު މެދު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ
އާޒިމް މިހެން ވިދާޅުވީ ރާއްޖެ ޓީވީން ބުދަދުވަހުގެރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުންނެވެ.
އާޒިމް ވިދާޅުވީ މަޖިލީހުގެ ރައީސް މަސީހުގެ މައްސަލައަކީ މާބޮޑު ބާރެއް ނެތުން ކަމަށާއި މަސީހު އަމިއްލައަށް ކަންކަން ނިންމަވާ ތަނެއް ނުފެންނަ ކަމަށެވެ. މަސީހުގެ މައްޗަށް އިތުރު މީހަކު ކޮންޓްރޯލް ކުރާކަން ހާމަވާ ކަމަށާއި އެހެންކަމުން މަސީހުއަށް މަސީހުގެ ޒިންމާ އެންމެ ފުރިހަމަ ގޮތުގައި އަދާކުރެވޭކަމަކަށް ނުފެންނަ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެހެން ވާން ޖެހެނީ ހަމައެކަނި މަޤާމް މުހިއްމު ވެގެން އުޅުއްވާތީ ކަމަށާއި މަސީހުގެ ފަރާތުން ފެންނަނީ ހަމައެކަނި މަޤާމަށް އުޅުއްވާތަން ކަމަށެވެ.
"އަސްލު އަމިއްލަ ނަފްސު މުހިއްމުވަނީ. ރައްޔިތުންނަށްވުރެ ޤައުމަށްވުރެ އަމިއްލަ ނަފްސު މުހިއްމުވަނީ.ވަޒީފާ މުހިއްމު ވަނީ. ރައްޔިތުންގެ މަޖިލީހުގެ ރައީސް އެމަޤާމުގައި އެހުންނައިރު އެކާރުކޮޅާ، ވަޑައިގެން ތިބޭ ބޮޑީގާޑުންނާ، އަޅުގަނޑަށް ފީލްވަނީ އެމާމުހިއްމޭ. އަޅުގަނޑުމެންނަށް ވޯޓު ދޭ މީހުންނަށް ވުރެ މުހިއްމޭ. އެމީހާއަށް ހެވޭ ކިތައްމެ ނިކަމެތިކަމެއް ލިބުނަސް. އެމައްސަލައެއް ނެތޭ. ތިމަންނާއަށް ހެވޭ ތިމަންނާ މަޤާމް ދިފާއު ވަނިކޮށް. އެކަން ފެންނަނީ. މަޖިލީހުގެ ރައީސަކީ މަޤާމަށްވުރެ މުހިއްމު އެއްވެސް އެއްޗެއް ނެތް ބޭފުޅެއްގެ ގޮތުގައި އަޅުގަނޑަށް އިހްސާސް ކުރެވެނީ" އާޒިމް ވިދާޅުވިއެވެ.
އަބަދުވެސް ރައްޔިތުންގެ މަޖިލީސް ވާންވާނީ، އާޒިމް ވިދާޅުވި ގޮތުގައި، ރައްޔިތުންގެ ދިފާއުގައި ކަންކުރާ ތަނަކަށް ކަމަށާއި ރައްޔިތުންނާ ގުޅޭގޮތުން ކުރާ ހުރިހާ ކަމެއްގައި ރައްޔިތުންނަށް ފައިދާހުރި ގޮތް ބުނެދޭން ތިބޭ ރައްޔިތުންގެ މަންދޫބުން ކަމަށެވެ. އާޒިމް ވިދާޅުވީ ރައްޔިތުންނާއި ދެކޮޅަށް ސަރުކަރުން ކުރާ ކަންކަން ހުއްޓުވުމަށް ތިބި ބަޔަކީ ރައްޔިތުންގެ މަޖިލީހުގެ މެމްބަރުން ކަމަށާއި އެކަންކަމާ ދެކޮޅަށް އަޑުއުފުލަން ތިބޭ ބަޔަކީވެސް ރައްޔިތުންގެ މަޖިލީހުގެ މެމްބަރުން ކަމަށެވެ. ނަމަވެސް އެކަންކަންވެސް ރައްޔިތުންގެ މަޖިލީހުގެ މެމްބަރުންނަށް ނުކުރެވޭ ކަމަށް އޭނާ ވިދާޅުވި އެވެ.
ރައްޔިތުންގެ މަޖިލީހުގެ މެމްބަރުންނާއި ސަރުކާރާ ހިޔާލު ތަފާތުވުންތައް ހުންނާނެކަން ފާހަގަ ކުރައްވަމުން އާޒިމް ވިދާޅުވީ ރައްޔިތުންގެ މަޖިލީހުގެ މެމްބަރުންނަކީ ރައްޔިތުންގެ ހައްޤުގައި ބަސް ބުނަން ތިބޭ ބަޔަކަށް ވާތީ ރައްޔިތުންނަށް މަގުފަހިކޮށްދޭން ތިބޭ ބަޔަކީވެސް ރައްޔިތުންގެ މަޖިލީހުގެ މެމްބަރުން ކަމަށެވެ. ނަމަވެސް އެ ހުރިހާ ކަމަކަށް ހުރަސްއަޅާ ބޭފުޅަކަށް ހުންނަވަނީ ރައްޔިތުންގެ މަޖިލީހުގެ ރައީސް ކަމަށާއި އެ ސަބަބަށްޓަކައިވެސް މަސީހު މަގާމުން ދުރުކުރަންޖެހޭ ކަމަށް އާޒިމް ވިދާޅުވިއެވެ.
