އައިޖީއެމްއެޗުން ތާޖުއްދީން ސްކޫލުގައި ގާއިމްކޮށްފައިވާ ފްލޫ ކްލިނިކަށް ބުދަ ދުވަހުގެ ހަވީރު ހައެއްގެ ނިއަލަށް 1،200 އަށް ވުރެ ފަރާތްތައް ޑޮކްޓަރަށް ދައްކާފައިވާ ކަމަށް އެ ހޮސްޕިޓަލުން ހާމަކޮށްފި އެވެ.

އައިޖީއެމްއެޗްގެ މީޑިޔާ އޮފޝަލް އަހްމަދު މައުސޫމް ވިދާޅުވީ އެ ހޮސްޕިޓަލުގެ ފްލޫ ކްލިނިކަށް ޑޮކްޓަރަށް ދައްކާ މީހުން އިތުރުވަމުން ދާ ކަމަށެވެ. ތާޖުއްދީންގައި ގާއިމްކޮށްފައިވާ ފްލޫ ކްލިނިކު އަދިވެސް ކުރިއަށްގެން ދިއުމަށް ހަމަޖެހިފައިވާ އިރު، ޑޮކްޓަރަށް ދައްކަން އަންނަ މީހުންގެ ރޭޓަށް ބަލާ، ގެންނަން ޖެހޭ ބަދަލުތައް ގެންނާނެ ކަމަށް އޭނާ ވިދާޅުވި އެވެ.

މައުސޫމް ވިދާޅުވީ ހޮނިހިރު ދުވަހު ހުޅުވި ފްލޫ ކްލިނިކުން އަންގާރަ ދުވަހުގެ ނިއަލަށް 1،068 ބަލިމީހުން ޑޮކްޓަރަށް ދައްކާފައިވާ ކަމަށެވެ. އިއްޔެ ޑޮކްޓަރަށް ދެއްކި މީހުންގެ ތަފާސް ހިސާބަށް ބަލާ އިރު ވިލިމާލޭ ހޮސްޕިޓަލުގައި ފަސް އަހަރުން ދަށުގެ 19 ކުދިން ޑޮކްޓަރަށް ދައްކާފައިވާ އިރު ފަސް އަހަރުން މަތީގެ 126 ބަލިމީހުން ބަލާފައި ވެއެވެ.

ޑޮކްޓަރަށް ދެއްކުމަށް ފްލޫ ކްލިނިކު ހުޅުވާފައިވާ އިރު އެ ކްލިނިކުން ތަހުލީލުތައް ކުރުމުގެ އިތުރުން އެޑްމިޓް ކުރެވޭނެ އިންތިޒާމްތައް ވެސް ވަނީ ހަމަޖެހިފައެވެ. ތާޖުއްދީން ސްކޫލުގައި ގާއިމްކޮށްފައިވާ ފްލޫ ކްލިނިކްގައި ދުވާލުގެ ވަގުތުތަކުގައި ފަހެއް ނުވަތަ ހަ ޑޮކްޓަރުން ބަލިމީހުން ބެލުމުގައި ހަރަކާތްތެރިވާނެ ކަމަށް އައިޖީއެމްއެޗުން ބުނެއެވެ.