ނޮން-އެލައިންޑް މޫވްމަންޓް (ނާމް) ގައި ދިވެހިރާއްޖެއިން ބައިވެރިވުމުން ތަރައްޤީއާ އިޤްތިޞާދުގެ ގިނަ ކަންކަން ކުރުމަށް ވަރަށް ބޮޑަށް ފަސޭހަވެގެންދާނެ ކަމަށް ފޮރިންގ މިނިސްޓްރީގެ ޑިރެކްޓަރު ޝިއުނީން ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޝިއުނީން ވިދާޅުވީ ނާމްއަކީ އދ ޖެނަރަލް އެސެމްބްލީ ނެގުމަށްފަހު، ދުނިޔޭގައި އޮންނަ އެންމެ ބޮޑު ޕޮލިޓިކަލް ފޯރަމް ކަމަށާއި، ނާމްގައި 135 ގައުމުން ބައިވެރިވެފައިވާ ކަމަށެވެ. އަދި މިއީ ސިޔާސީ ޖަމިއްޔާއެއް ކަމަށެވެ. އެހެންކަމުން ބައިނަލްއަޤުވާމީ ބޮޑެތި ސިޔާސީ މައްސަލަތަކަށް ޙައްލު ހޯދުމަށް ގިނަ މަޝްވަރާތަކެއް ކުރެވި، އެނިންމާ ނިންމުންތަކަކީ ބައިނަލްއަޤުވާމީ ސިޔާސީ ބަހުޘްތަކުގަ ބަރުދަންހުރި ބަލައިގަނެވޭނެ ކަންކަން ކަމަށް ޝައުލީން ވިދާޅުވިއެވެ.
ޝިއުނީން ވިދާޅުވީ ނާމްގައި ރާއްޖެއިން ބައިވެރިވެ އެކްޓިވްކޮށް އުޅުމުން އެކަމުގެ ރަނގަޅު ނަތީޖާ ފެންނާނެ ކަމަށާއި، ބޭނުންވާ ކަންކަން ކުރުމަށް ފަސޭހަވެގެންދާނެ ކަމަށެވެ. ނާމްގައި ބައިވެރިވުމުން ރާއްޖެ ފަދަ ކުދި ޖަޒީރާ ޤައުމުތަކަށް ގިނަ ގުނަ ފައިދާ ލިބޭ ކަމަށް ޝައުލީން ވިދާޅުވިއެވެ.
މިސާލަކަށް ޔޫއެންގެ ތެރޭގައި ދިވެހިރާއްޖެއިން ވަކި އިޝޫއެއް ނަގައި އެކަމެއް ޕްރޮމޯޓް ކުރުމަށް ބޭނުންވާ ނަމަ ނާމްގެ ތެރެއިން ދޭދޭ ގައުމުތަކުގެ ގުޅުންތަކުގެ ތެރެއިން އެކަމެއް ޕްރޮމޯޓް ކުރުމަށްފަހު ޖެނަރަލް އެސެމްބްލީއަށް ހުށަހެޅުން އެ ކަމެއް ފާސްވުމަށް ފަސޭހަކަމަށް ފާސްވުމުގެ ފުރުސަތު ބޮޑުވޭ.ޝިއުނީން- ފޮރިން މިނިސްޓްރީގެ ޑިރެކްޓަރު
އަޒަރުބައިޖާންގެ ވެރިރަށް ބާކޫގައި ކުރިއަށްދިޔަ ނަން-އެލައިންޑް މޫވްމަންޓް( ނާމް) ސަމިޓްގައި މިނިސްޓަރު ޢަބްދުﷲ ޝާހިދު ދެއްވި ތަޤުރީރަށް އަލިއަޅުއްވާލައްވާ ޝައުލީން ވިދާޅުވީ ރައީސް އިބްރާހިމް މުޙައްމަދު ޞާލިޙުގެ ސިޔާސަތާއި، ޑިމޮކްރަސީ ، އިންސާނީ ޙައްޤުތައް ޙިމާޔަތްކުރުން، ޤާނޫނީ ވެރިކަން ދެމެހެއްޓުމާއި، ކޮރަޕްޝަން ނައްތާލުން، ދެމެހެއްޓެނިވި ތަރައްގީގެ މަސައްކަތުގައި ރާއްޖެއިން ކުރަމުންދާ މަސައްކަތްތަކާ ބެހޭ ގޮތުން މުހިންމު ގިނަ ކަންކަން ފާހަގަކުރެއްވި ކަމަށެވެ. އަދި ޓެރަރިޒަމާއި މޫސުމަށް އަންނަ ބަދަލުތަކާއި، ފަލަޞްޠީނާއި އިސްރާއީލުގެ މައްސަލާގެ މައްޗަށް ވާހަކަފުޅު ދެއްކެވިއެވެ.
ނާމްގެ ސަމިޓްގައި މިނިސްޓަރު ގިނަ ޤައުމުތަކުގެ ވެރިންނާ ބައްދަލުކުރައްވާ ރާއްޖޭގެ ކަންކަން ކުރިއަށް ގެންދާނެ ގޮތްތާކާ ބެހޭ ގޮތުން ޚިޔާލުބަދަލުކޮށްފައިވާ ކަމަށާއި، ސަމިޓްގައި ދެއްވި ތަޤުރީރުގައި ފާހަގަކުރެއްވި މައްސަލަތަކަށް ހެޔޮ ބަދަލުތަކެއް އަންނާނެ ކަމަށް ޝިއުނީން ވިދާޅުވިއެވެ.
އޮކްޓޯބަރު 25 އިން 26 އަށް ބޭއްވި 18ވަނަ ނާމް ސަމިޓު 135 ގައުމަކުން ބައިވެރިވިއެވެ.
ނޮން-އެލައިންޑް މޫވްމަންޓް (ނާމް)އަކީ ދުނިޔޭގެ ބާރުތައް ޙިއްސާކުރުމާ ގުޅޭގޮތުން ދުނިޔޭގެ ބޮޑު ދެބާރު ކަމުގައިވާ އެމެރިކާއާއި ސޯވިއެޓް އިއްތިހާދާ ދެމެދު ހިނގައިދިޔަ އަރާރުންތަކުގެ ތެރޭގައި ފިތިބާރުވާންޖެހި އެކަމުގެ ހިތްހަމަނުޖެހުމުގައި، އެއްވެސް ފަރާތަކަށް ނުޖެހި ތިބުމަށް 1961 ވަނަ އަހަރު އުފެއްދި އިއްތިހާދެކެވެ. މިއިއްތިހާދު އުފެއްދުމަށް އެންމެ މައިގަނޑު ދައުރެއް އަދާކުރެއްވީ އިންޑިއާގެ ފުރަތަމަ ބޮޑުވަޒީރު ޖަވާހަރްލާލް ނެހްރޫއެވެ.
