ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަތުހުﷲ ޖަމީލްއާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އަސްމާ ޝަފީއު އައްޔަންކުރުމަށް ރައްޔިތުންގެ މަޖިލީހުން ރުހުންދީފިއެވެ.

ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަތުހުﷲ ޖަމީލް އައްޔަނު ކުރުމަށް މަޖިލީހުން ރުހުންދީފައިވަނީ 82 މެމްބަރުންގެ ވޯޓުންނެވެ. ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އަސްމާ ޝަފީއު އައްޔަނު ކުރުމަށް މަޖިލީހުން ރުހުން ދިނުމަށް ވޯޓުދެއްވީ 81 މެމްބަރުންނެވެ.

ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަތުހުﷲ އާއިއެކު ފޮނުއްވާފައިވާ ދެވަނަ ނަމަކީ ހ. ސެނާ، އިސްމާއިލް ނާޝިދު ނަމެވެ.

ފަތުހުﷲ އަކީ މިހާރު ދިރާގުގެ އިސްމަގާމެއް ފުރުއްވަމުން ގެންދަވާ، މީގެކުރިން މީރާގައި ވެސް އިސްމަގާމުތަކެއް ފުރުއްވި ބޭފުޅެކެވެ. ކުރީގެ ރައީސް މުހައްމަދު ނަޝީދުގެ ސަރުކާރުން ޓެކްސް ނިޒާމް ތައާރަފް ކުރިއިރު، ޓެކްސާ ގުޅޭ ކަންކަމުގައި މީހުން ހޭލުންތެރި ކުރުމާއި، މީޑިއާތަކަށް މައުލޫމާތު ދެއްވުމުގައިވެސް ފަތުހުﷲ ވަނީ އިސްދައުރެއް އަދާކުރައްވާފަ އެވެ.

ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް 6 ބޭފުޅަކު ކުރިމަިލެއްވިއިރު އެ މަގާމަށް އައްޔަނު ކުރުމަށް ކޮމެޓީއިން ރުހުން ދީފައިވަނީ 2 ބޭފުޅަކަށެވެ. އެއީ އަސްމާ ޝަފީއު އާއި އިސްމާއިލް ސާޖިދުއެވެ.