ސޯޝަލް މީޑިއާ މެދުވެރިކޮށް މުޖުތަމައު ތެރޭގައި ބިރުވެރިކަން އުފައްދައި އަނިޔާވެރިކަމަށް ހިތްވަރަދެމުންދާކަމުގެ ތުހުމަތުގައި ފުވައްމުލަކުން މީހަކު ހައްޔަރުކޮށްފިއެވެ.

އެމްޑީއެންގެ ރިޕޯޓުގެ މައްސަލައިގައި އާންމުންގެ ތެރޭގައި ވަގުތުގެ ބޭނުންކޮށްގެން މުޖްތަމައުގައި ރުޅިވެރިކަމާއި ނަފްރަތު ނުއުފެއްދުމަށް ފުލުހުން އިލްތިމާސްކޮށްފައިވާ ދަނޑިވަޅެއްގައި ފުލުހުން ވަނީ ހޮނިހިރު ދުވަހުގެ ވަގުތެއްގައި ސޯޝަލް މީޑިއާގައި މީހުންނަށް މަރުގެ އިންޒާރުދީ، މުޖުތަމައުގައި ބިރުވެރިކަން އުފެދޭގޮތަށް އަނިޔާވެރިކަމަށް ހިއްވަރު ދެމުންދާ މައްސަލައެއްގައި 19 އަހަރުގެ ދިވެހި ފިރިހެނެއް ފުވައްމުލަކުން ހައްޔަރުކޮށްފައެވެ.

މިއީ ޓެރަރިޒަމްގެ ގާނޫނަށް އިސްލާހު ގެނައުމަށްފަހު ފުލުހުން މިފަދަ މައްސަލައެއްގައި ހައްޔަރުކުރި 2 ވަނަ މީހާއެވެ. މީގެ ކުރިން މި މަހުގެ 12 ވަނަ ދުވަހު މުޖުތަމައުގެ ތެރޭގައި ބިރުވެރިކަން އުފެދޭ ގޮތަށް މީހުންގެ ފުރާނައަށް ގެއްލުން ދިނުމަށާއި އަނިޔާވެރިކަމުގެ އަމަލު ހިންގުމަށް ގޮވާލި ކަމުގެ ތުހުމަތުގެ އިތުރުން ޓެރަރިސްޓު ޖަމާއަތްތަކުގެ ނިޝާންތަކާއި، ލިޔެ ކިޔުންތައް ޝޯޝަލް މީޑިއާގައި އާއްމުކުރުމާއި ގުޅިގެން އުމުރުން 27 އަހަރުގެ ފިރިހެން މީހެއް ހައްޔަރުކޮށްފަ އެވެ. އަދި އެ މީހާގެ ބަންދަށް 15 ދުވަސް ޖަހާފައެވެ.

އިސްލާހްކުރެވުނު ޓެރަރިޒަމްގެ ޤާނޫނުގެ ދަށުން ފުލުހުންނަށް ވަނީ ބޮޑެތި ބާރުތަކެއްދީފައިވާއިރު، ފުލުހުން ބުނެފައިވަނީ މި މައްސަލަ އިތުރަށް ތަހުގީގު ކުރަމުންދާކަމަށެވެ.