ގައުމުގެ ކުރިމަގު ހެޔޮގޮތުގައި ބައްޓަން ކުރުމަށް ބޮޑެތި ވަމުން އަންނަ ޖީލު ހޮޔޮގޮތުގައި ތަރުބިއްޔަތުކުރުން ވަރަށް މުހިއްމު ކަމަށް މިނިސްޓަރ އޮފް ހޯމްއެފެއާރޒް އިމްރާން އަބްދުﷲ ވިދާޅުވެއްޖެއެވެ.
ކުދަ ކުދިންގެ އަދުލުގެ ނިޒާމާ ގުޅޭގޮތުން ހޭލުންތެރިކުރުމަށް ބޭއްވި 27 ވަނަ މަސައްކަތު ބައްދަލުވުން ނިންމުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ޤައުމުގެ އުފާ ފާގަތިކަން ދެމިއޮންނާނީ ކުޑަކުދިންނާއި ޒުވާނުންގެ ޢިލްމީ ޤާބިލުކަމާއި، ހުނަރުވެރިކަމާއި ފަންނުވެރިކަން އިތުރުކުރުމަށް ސީދާ މުޖުތަމަޢަށް އަމާޒުކޮށްގެން ޙަރަކާތްތަކެއް ހިންގިގެންކަމަށެވެ.
އިމްރާން އިތުރަށް ވިދާޅުވީ، ކުށަށް އަރައިގަންނަ ކުޑަކުދިންގެ ނިސްބަތް ރާއްޖޭގައިވެސް ކަންބޮޑުވާ ދަރަޖައަކަށް އިތުރުވެފައިވާކަމަށާއި މިޙާލަތު ރަނގަޅުކުރުމަށް ސަރުކާރުގެ އަމާޒުތަކަކާއި ސިޔާސަތުތަކެއް ކަނޑައެޅިފައިވާކަމަށާ، ނަމަވެސް އެކަންކަން ތަންފީޒުކުރެވޭނީ އެންމެން ގުޅިގެންކުރެވޭ މަސައްކަތުގެ ނަތީޖާއިންކަމަށެވެއަދި ޢާއިލާއެއްގެ މުއްސަނދިކަން ނުވަތަ ފަޤީރުކަމަކީ އެ އާއިލާގެ ފަރާތުން ކުއްޖާއަށް ދެވޭ ލޯތްބާއި އަޅާލުމަށް އަސަރުކޮށްގެންވާނެކަމެއް ނޫންކަމަށްވެސް މިނިސްޓަރ ޢިމްރާން ވިދާޅުވިއެވެ.
"ކުށުގެ ވެއްޓާށް ކުދިން ދުރުކުރުމުގައި އާއިލާގެ ޒިންމާ ވަރަށް ބޮޑު. އާއިލާގެ މުއްސަނދިކަމާއި ފަޤީރުކަމަކީ ކުއްޖާއަށްދެވޭ ލޯތްބާއި އަޅާލުމަށް އަސަރުކޮށްގެންވާނެކަމެއްނޫން. އެކި އާއިލާތަކުގެ ފުދުންތެރިކަން ހުންނާނީ އެކި މިންވަރަށް، ނަމަވެސް ކުއްޖާ ތަރުބިއްޔަތުކުރުމުގައި އެކަންކަމުގެ އަސަރުކޮށްގެން ނުވާނެ. ކުއްޖާގެ ދީންވެރިކަމާއި، އަޙްލާޤާއި، އުޅުންކަމަށްވިޔަސް ހުރިހާކަމެއް ބިނާވާނީ އެ އާއިލާއެއްގެ މެދުގައި އޮންނަ ބަދަހިކަމެއްގެ މައްޗަށް."މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲ
އެ ތަމްރީން ޕްރޮގްރާމާއި ބެހޭގޮތުން ވާހަކަ ދައްކަމުން ޖުވެނައިލް ޖަސްޓިސް ޔުނިޓްގެ އެގްޒެކެޓިވް ޑިރެކްޓަރ ޙާމިދު ޔޫސުފް ވިދާޅުވީ، މިޕްރޮގްރާމުގައި ކުޑަކުދިންގެ ޢަދުލުގެ ނިޒާމާ ބެހޭގޮތުންނާއި ކުށުގެ ވެށިން ގެނެވޭ ކުދިންނާމެދު މުޢާމަލާތުކުރާނެ ގޮތް ބައިވެރިންނަށް ކިޔާދީފައިވާނެކަމަށެވެ.
އަދި މައިގަނޑު ގޮތެއްގައި ކުޑަކުދިންގެ އަދުލުގެ ނިޒާމާގުޅޭގޮތުން ހެދިފައިވާ ޤާނޫނުތަކާއި، ކުށުގެ ވެށިން ގެނެވޭ ކުދިންނާ މުޢާމަލާތުކުރާނެ ގޮތާއި، ކަމާގުޅޭ މުއައްސަސާތަކުން މަސައްކަތް ކުރަމުންދާގޮތާއި ގުޅޭގޮތުން ވާނީ މަޢުލޫމާތުދީފައިވާނެ ކަމަށް ވެސް ހާމިދުގެ ވާހަކަގައި ފާހަގަކުރެއްވިއެވެ.
27 ވަނަ ތަމްރީން ޕްރޮގްރާމްގައި ބައިވެރިވި ފަރާތްތަކަށް ވަނީ ސެޓްފިކޭޓް ހަވާލުކޮށްފައެވެ.
ދެހާސް އެގާރަވަނަ އަހަރުން ފެށިގެން މިހާތަނަށް އެ ތަމްރީން ޕްރޮގްރާމް މެދުވެރިކޮށް 700 އަށް ވުރެއް ގިނަ ފަރާތް ކުޑަކުދިންގެ އަދުލުގެ ނިޒާމަށް ހޭލުންތެރި ކޮށްފައިވާއިރު މިފަހަރު ބޭއްވުނު 27 ވަނަ ތަމްރީން ޕްރޮގްރާމްގައި ފުލުހުންނާއި ޕްރޮސެކިއުޓަރ ޖެނެރަލްގެ އޮފީހާއި ޑްރަގް ކޯޓާއި ނެޝެނަލް ޑްރަގް އެޖެންސީއާއި ޖުވެނައިލް ކޯޓާއި ޖުވެނައިލް ޖަސްޓިސް ޔުނިޓާއި މޯލްޑިވްސް ކަރެކްޝަނަލް ސަރވިސްގެ އިތުރުން 3 ސްކޫލެއް ހިމެނޭހެން ޖުމްލަ 31 ފަރާތަކުން ބައިވެރިވެފައިވެއެވެ.
