ސަރުކާރުގެ ކުންފުނިތަކުން ޚިޔާނާތާއި ކޮރަޕްޝަން ހުއްޓުވައި، ހިންގުން ހަރުދަނާ ކުރެވިދާނެ ކަންކަމާގުޅޭގޮތުން ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް (އެސްއޯއީ) ކޮމެޓީން އޮޑިޓް އޮފީހުގެ ވެރިންނާ މަޝްވަރާ ކުރައްވައިފި އެވެ.
އެމްއެމްޕީއާރުސީގެ ޚާއްޞަ އޮޑިޓް ރިޕޯޓުގައި ފާހަގަކޮށްފައިވާ މުހިއްމު ކަންތައްތައް ހިނގާދިޔަ ގޮތާއި، ގުޅުންހުރި އިދާރާތަކުގެ ނިޒާމުގައިހުރި މައްސަލަތަކުގެ ޚުލާސާ ރިޕޯޓް އަދި ދައުލަތުގެ އިދާރާތަކާއި ކުންފުނިތަކުގެ މާލީ ކަންކަމާ ގުޅޭގޮތުން އޮޑިޓަރ ޖެނެރަލް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ހުށަހެޅި ކަރުދާހުގައިވާ ކަންކަން ހިމަނުއްވައި އެސްއޯއީ ކޮމެޓީއަށް ހުށަހަޅުއްވާފައިވާ ރިޕޯޓާ ގުޅޭގޮތުން އޮޑިޓް އޮފީހުގެ އިސްވެރިންނާއެކު ބޭއްވި ކޮމެޓީގެ ބައްދަލުވުމަށް ވަޑައިގެން އެސިސްޓަންޓް އޮޑިޓަރ ޖެނެރަލް އިބްރާހީމް އައިމަން ވިދާޅުވީ އެމްއެމްޕީއާރުސީގައި ހިންގުމުގައި ވެސް ރަނގަޅު ނިޒާމުތަކެއް އެބަހުރި ކަމަށާއި ޒިންމާދާރު މަގާމުތަކަށް އައްޔަންކުރަންވީ އިޚުލާސްތެރި ވެރިން ކަމަށެވެ.
"އެމްއެމްޕީއާރުސީގެ ހިޔާނާތުގައި ހިމެނޭ ރަށްތަށް ދޫކޮށްފައިވަނީ ދޫކުރަން އޮންނަ އުސޫލަކުން ނޫން. ފަތުރުވެރިކަން ތަރައްގީ ކުރުމަށް ރައީސުލްޖުމްހޫރިއްޔާ ކަނޑަނާޅުއްވާ 25 ހަކަށް ފަޅާއި ރަށް އެބައޮތް ޓޫރިޒަމް މިނިސްޓްރީ ދޫކޮށްފަ،"އިބްރާހީމް އައިމަން / އޮޑިޓަރ ޖެނެރަލް
އައިމަން ވިދާޅުވީ ޓޫރިޒަމް ޤާނޫނުގެ ދަށުން ސަރުކާރު ހިއްސާވާ 100 ޕަސެންޓް ކުންފުނިތަކަށް އިޢުލާން ކުރުމެއްނެތި ރަށްތަކެއް ދޫކުރެވިދާނެ ކަމަށް އޮންނާތީ، އެ މާއްދާގެ ބޭނުންހިފައިގެން، ފުރަތަމަ އެރަށް ތަކުގެ އެގްރީމަންޓްތައް ހަދާފައިވަނީ އެމްއެމްޕީއާރުސީއަށް ކަމަށެވެ. ނަމަވެސް އެމްއެމްޕީއާރުސީން އެހެން ފަރާތްތަކަށް އެރަށްތައް ދޫކުރަމުންދިޔައީ ކަމަށެވެ.
"ފައިސާގެ ކަންތައްތައް، ލިބޭ އިކުއިޒިޝަން ކޮސްޓް، ބަލައިގަތުމުގައި އެމްއެމްޕީއާރުސީގައި ވެސް ފައިސާ ބަލައިގަތުމެ ނިޒާމެއް ގައިމުކޮށްފައި އޮތް. އެހެންނަމަވެސް އޭގެ ބޭރުން ހަމަ މެނޭޖިން ޑިރެކްޓަރ ސޮއިކުރައްވާފަ ރިސިޓްތަކެއް ހަދާފަ ޕޭމަންޓްތައް ފޮނުވަނީ. އެހެންވީމާ އަސްލު ހަގީގަތުގައި އެމްއެމްޕީއާރުސީގައިވެސް އޭރު މަސައްކަތްކުރެއްވި ބޭފުޅުންނަކަށް މިކަންތައްތަކެއް ހިނގާކަމެއް އެނގިވަޑައި ނުގަންނަވާ. އެމްއެމްޕީއާރުސީގެ ފައިނޭޝަލް ސްޓޭޓްމަންޓް އޮޑިޓެއް ކުރިއަސްވެސް އެ ފެންނާނެ އެއްވެސް ލިޔެކިޔުމެއްވެސް ނެތް. ރަށެއް ދޫކުރާކަންވެސް، ސަބް ލީޒް ކުރެވޭކަން ވެސް، މިމުއާމަލާތާއި ގުޅޭ އެއްވެސް ލިޔެކިޔުމެއް އެމްއެމްޕީއާރުސީގެ ރެކޯޑްސްތަކުން ފެންނާކަށް ނެތް،"އިބްރާހީމް އައިމަން / އޮޑިޓަރ ޖެނެރަލް
އައިމަން ވިދާޅުވީ ޓޫރިޒަމް މިނިސްޓްރީން އިޢުލާން ކޮށްގެން ދޫކުރަންޖެހޭ ރަށްތަކެއް، އޭރުގެ ޓޫރިޒަމް މިނިސްޓްރީން ދޫކުރީ އޮފަރ ލެޓާސްތަކެއް އެކިއެކި ކުންފުނިތަކަށް ފޮނުވައިގެން ކަމަށެވެ.
"އެކިއެކި ޕާޓީތަކަށް އޮފާ ލެޓަރސްތަކެއް ފޮނުވުމަށްފަހު، މިވެނިރަށެއް، މިވެނި އިކުއިޒިޝަން ކޮސްޓެއްގައި އޮފާ އެބަކުރަމޭ، ނަގަން ބޭނުންނަމަ މިވެނި ޑޭޓެއްގެ ކުރިން އިކުއިޒިޝަން ފީ ދެއްކީމަ އެގްރީމަންޓްގައި ސޮއިކުރެވޭނޭ، އެހެންވީމާ ބައިވަރު އޮފާ ލެޓާސްތަކެއް ފޮނުވައިގެން، އޭގެ ތެރެއިން އެ އޮފާ ގަބޫލުކުރި ފަރާތްތަކަށް މިހުރީ ރަށްތައް ދީފަ،"އިބްރާހީމް އައިމަން / އޮޑިޓަރ ޖެނެރަލް
އައިމަން ވިދާޅުވީ އެމްއެމްޕީއާރުސީގެ ޚިޔާނާތުގައި އިކުއިޒިޝަން ކޮސްޓްގެ ގޮތުގައި 65 މިލިއަން ޑޮލަރު ނަގާފައިވާ ކަމަށާއި، ޑޮލަރު ގަތުމުގެ ނަމުގައި 6.3 މިލިއަން ޑޮލަރާއި ލޯނު ދިނުމުގެ ނަމުގައި ކުންފުނިތަކަށް 6 މިލިއަން ޑޮލަރު ދީފައިވާ ކަމަށެވެ. އަދި ވަކިކަމެއް ނޭނގި 1.9 މިލިއަން ޑޮލަރާއެކު، ޖުމްލަ 79.37 މިލިއަން ޑޮލަރު އެމްއެމްޕީއާރުސީގެ ޚިޔާނާތުން ދައުލަތަށް ގެއްލިފައިވާ ކަމަށްވެސް އައިމަން ވިދާޅުވި އެވެ.
