ފާއިތުވެދިޔަ ފަސް އަހަރު ރާއްޖެއަށް ނަވާރަ ޤައުމަކުން މަސްތުވާތަކެތި އެތެރެކޮށްފައިވާކަމަށް ކަސްޓަމްސްގެ ރިކޯޑުތަކުން ހާމަވެއްޖެއެވެ.
މޯލްޑިވްސް ކަސްޓަމްސް ސަރވިސަސްގެ ރަސްމީ ޓްވިޓަރ އެކައުންޓުގައި ޢާއްމުކޮށްފައިވާ ރާއްޖެއަށް މަސްތުވާތަކެތި އެތެރެ ކުރާ ގޮތް ދައްކުވައިދޭ ޗާރޓުން ފެންނަގޮތުގައި ދުނިޔޭގެ 4 ބަައްރެއްގެ 19 ޤައުމަކުން ރާއްޖެއަށް މަސްތުވާތަކެތި އެތެރެކޮށްފައިވެއެވެ.
2013 ވަނަ އަހަރުން 2018 އާއި ދޭތެރޭގެ މުއްދަތުގައި ރާއްޖެއަށް މަސްތުވާތަކެތި އެންމެ ގިނައިން އެތެރެކޮށްފައިވަނީ އޭޝިއާ ބައްރުގެ ޤައުމުތަކުންނެވެ. އެގޮތުން އެއްގަމާއި ކަނޑުމަގުން ރާއްޖެއަށް މިޞަރަޙައްދުގެ 10 ޤައުމަކުން މަސްތުވާތަކެތި އެތެރެކުރިކަން މި ޗާޓުން ހާމަވެއެވެ. ރާއްޖެއަށް މިމުއްދަތުގައި މަސްތުވާތަކެތި އެތެރެ ކުރި ޤައުމުތަކަކީ:
- ސްރީލަންކާ
- އިންޑިއާ
- ޕާކިސްތާން
- އީރާން
- ބަންގްލަދޭޝް
- ޔުނައިޓެޑް އަރަބް އެމިރޭޓްސް
- ޤަތަރު
- މެލޭޝިޔާ
- އުޒްބަކިސްތާން
- ކަޒަޚަސްތާން
- ތައިލޭންޑް
މި ޗާޓުން ފެންނަގޮތުންނަމަ ދެވަނައަށް އެންމެ ގިނަ ޢަދަދަކަށް ރާއްޖެއަށް މަސްތުވާތަކެތި އެތެރެކޮށްފައިވަނީ ވިލާތު ޤައުމުތަކުންނެވެ. އެ ޤައުމުތަކަކީ:
- ބެލްޖިއަމް
- ޖަރުމަން ވިލާތް
- އިގިރޭސި ވިލާތް
- ނެދަލޭންޑް
- ސްޕެއިން
އެފްރިކާ ބައްރުގެ ތިން ޤައުމެއްކަމަށްވާ އިތިއޯޕިއާއާއި، ބެނިންއާއި ޓެންގޯއިންވެސް ރާއްޖެއަށް މަސްތުވާތަކެތި އެތެރެކޮށްފައިވާއިރު، ރާއްޖެއާއި އެންމެ ދުރުން ބްރެޒިލް އާއި ޓްރިނިޑާޑް އެންޑް ޓޮބޭގޯއިންވެސް ރާއްޖެއަށް މަސްތުވާތަކެތި އެތެރެކޮށްފައިވާކަން ކަސްޓަމްސްގެ ޗާޓުން ދައްކައެވެ.
ކަސްޓަމްސްއިން އާދީއްތަދުވަހު އާއްމުކުރި ޗާޓުގައި ރާއްޖެއަށް އެއްގަމާއި ކަނޑުމަގުން މަސްތުވާތަކެތި އެތެރެކުރާ ޤައުމުތައް ދައްކުވައިދިން ނަމަވެސް، އެޤައުމުތަކުން މަސްތުވާތަކެތި އެތެރެ ކުރި މިންވަރާއި އެތެރެކުރި ގޮތުގެ ތަފްޞީލެއް ހާމަކޮށްފައެއް ނުވެއެވެ.
