ބިދޭސީއަކު ރަހީނުކުރި މައްސަލައެއްގައި ދެ ބިދޭސީއަކު ހައްޔަރުކޮށްފި އެވެ.

ފުލުހުން ބުނީ، މާފަންނުގައި ހުރި ބިދޭސީން ދިރިއުޅޭ ގެއެއްގައި ބަންގްލަދޭޝް މީހަކު ރަހީނުކޮށް އޭނާ އަތުން ފައިސާ ހޯދަން އުޅޭކަމުގެ މައުލޫމާތު ބުރާސްފަތި ދުވަހު ހަވީރު ލިބުމާއި ގުޅިގެން އެގެއަށް ގޮސް ރަހީނުކޮށްފައި ހުރި ބިދޭސީ މީހާ ސަލާމަތް ކޮށްފައިވާ ކަމަށެވެ. އެ މައްސަލާގައި ހައްޔަރު ކޮށްފައިވާ ދެ ބިދޭސީންނަކީވެސް ބަންގްލަދޭޝް މީހުންނެވެ.

އެއީ ކޮން ގެއެއްކަމެއް ފުލުހުން ހަމާކޮށްފައި ނުވާއިރު، ފުލުހުން ދަނީ މިހާރު އެ މައްސަލަ ތަހުގީގު ކުރަމުންނެވެ.

މާފަންނު ގެއަކުން ރަހީނުކުރި ބިދޭސީއަކު ސަލާމަތް ކޮށްފައިވާއިރު، މި މަހުގެ ފަސްވަނަ ދުވަހުވެސް މާފަންނުގައި ހުރި ގެއަކުން ބިދޭސީއަކު ރަހީނު ކޮށްފައި ހުއްޓާ ފުލުހުން ވަނީ އެމިހާ ސަލާމަތްކޮށް ފަސް ބިދޭސީން ހައްޔަރުކޮށްފައެވެ.