ޗައިނާގެ ހުބެއި ޕްރޮވިންސްގައި ހުންނަ ޕްރައިމަރީ ސްކޫލެއްގެ ބޭރަށް ދިން ހަމަލާއެއްގައި އަށް ދަރިވަރުން މަރުވެއްޖެއެވެ.
އެގައުމުގެ ފުލުހުން ބުނެފައިވާ ގޮތުގައި މި ހަމަލާ ދިންކަމުގެ ތުހުމަތުގައި 40 އަހަރުގެ ފިރިހެނަކު ވަނީ ހައްޔަރު ކޮށްފައެވެ. އޭނާ ހައްޔަރުކޮށްފައިވަނީ ހަމަލާ ދިން ތަނުގައި ހަރަކާތްތެރިވަމުން ދަނިކޮށް ކަމަށްވެސް ފުލުހުން ބުނެފައިވެއެވެ.
އެ ދަރިވަރުން މަރުވީ ކިހިނެއް ކަމެއް އަދި ހަމަލާ ދިން މީހާގެ މަގުސަދަކީ ކޮބާ ކަމެއް އަދި އެނގިފައެއް ނުވެއެވެ. އަދި ހަމަލާގެ ޝިކާރައަކަށްވީ ކުދިންގެ އުމުރުވެސް ކަނޑައެޅިގެން ބުނާކަށް ނޭނގެއެވެ. ނަމަވެސް އެ ސްކޫލުގައި ކިޔަވަމުންދަނީ ހަ އަހަރާއި 13 އަހަރާއި ދެމެދުގެ ކުދިންނެވެ.
ފާއިތުވި އަހަރުތަކުގައިވެސް ޗައިނާގެ ސްކޫލު ދަރިވަރުންނަށް މިފަދަ ހަމަލާތައް ދީފައިވާކަން ފާހަގަކޮށްލެވެއެވެ. 2018 ވަނަ އަހަރުގެ އެޕްރިލް މަހު ނުވަ ދަރިވަރުންގެ ގަޔަށް ތޫނު އެއްޗަކުން ހަމަލާދީ މެރި ހާދިސާއެއްވެސް ފެންމަތިވެފަވެއެވެ.
މުގުރާއި ޝީލްޑް އަދި ހެލްމެޓް ފަދަ ތަކެއްޗާއެކު ސްކޫލު ފެށޭ ގަޑީގައި އަދި ނިމޭ ގަޑީގައި ޗައިނާގެ ބައެއް ސްކޫލްތަކުގެ ގޭޓުކައިރީގައި ގާޑުން ހަރަކާތްތެރިވަމުންދެއެވެ.
