ގޭންގް ތަކުގެ ޝިކާރައަކަށްވެ ކުށުގެ ވެށިން ބޮޑުވާ ޒުވާނުން އަނބުރާ މުޖުތަމައަށް ގެންނަން ޖެހޭކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީ ޔޫތް ކޮންގްރެސްގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، ބޯހިޔާވަހިކަމަކީ ރާއްޖެއަށް ކުރިމަތިވެފައިވާ އެންމެ ބޮޑު އެއް މައްސަލަ ކަމަށާއި، އޭގެ އެންމެ ބޮޑު އަސަރެއް ކުރާ އެއް ބަޔަކީ ޒުވާނުން ކަމަށެވެ.
އެގޮތުން ގޭންގް ތަކުގެ ޝިކާރައަކަށްވެ ކުށްކުރާ ޒުވާނުންނާއި، ކުށުގެ ވެށިން ބޮޑުވާ ޒުވާނުން އަނބުރާ މުޖުތަމައަށް ގެންނަންޖެހޭ ކަަމަށާއި، އުމުރަށް ޖަލަށް ލުމަކީ ހައްލެއް ނޫން ކަމަށްވެސް ރައީސް ވިދާޅުވިއެވެ. އަދި އޭގެ ބަދަލުގައި ޖަލުތަކުގައި ރިހެބިލިޓޭޓް ކުރެވިގެންދާނެ ނިޒާމެއް ޤާއިމުކުރަންޖެހޭ ކަމަށް ރައީސް ވިދާޅުވިއެވެ.
ބޯހިޔާވަހިކަމަކީ މުޅި ރާއްޖެއަށް ދިމާވެފައިވާ ބޮޑު މައްސަލައެއް، މިކަމުގެ ސަބަބުން އެންމެ ބޮޑު ނޭދެވޭ އަސަރުކުރާ އެއްބަޔަކީ ޒުވާނުން، ތޮއްޖެހިފައިވާ މާހައުލުގައި ނިދުމަށް ގަޑިބަހައިގެން ބޮޑެތިވާ ކުދިން މިއަދު މާލޭގައި މަދެއް ނޫން، އެކުދިން ކަންމަތީ ގްރޫޕުތަކާއެކު ބޮޑެތިވަމުން އައިތަން އަޅުގަނޑުމެން ދެކެން، ސުކޫލަށް ނުދެވި އާއިލާއިން ދޭންޖެހޭ ސަމާލުކަން ނުދެވި ޒުވާން އުމުރު ހޭދަކުރަންޖެހެނީ މަގުތައްމަތީގައި، ގޭންގް ތަކުގެ ޝިކާރައަކަށްވެ ކުށްކުރުމާ، ކުށުގެ ވެށިން ބޮޑުވާ ޒުވާނުން އަނބުރާ މުޖުތަމައަށް ގެންނަންއެބަޖެހޭ، ހައްލަކީ އުމުރު ދުވަހަށް ޖަލުގައި ބަންދުކުރުމެއްވެސް ނޫން، ޖަލުތައްވެސް ބަދަލުވާންޖެހެނީ ރިހެބިލިޓޭޓް ކުރެވޭ ތަންތަނަށް،ރައީސް ސޯލިހު
ރައީސް އިތުރަށް ވިދާޅުވީ، ފަރުވާއަށް ބޭނުންވާ ޒުވާނުންގެ އަދަދު 800 އަށްވުރެ ގިނަވާނެ ކަމަށާއި، ޖަލުތަކުގެ އާބާދީގެ 67 އިންސައްތައަކީ ޑްރަގް މައްސަލަތަކުގައި ޖަލަށް ލެވިފައިވާ މީހުން ކަމަށެވެ. އަދި އޭގެ ތެރެއިންވެސް ގިނައީ ޒުވާނުންކަމަށާއި، އަމާޒަކީ އެ ނިޒާމަށްވެސް ރިހެބިލިޓޭޝަން ތައާރްފްކޮށް ޒުވާނުންނަކީ އިޖުތިމާއީ ގޮތުން ބެނުންހިފޭ ބަޔަކަށް ހެދުން ކަމަށް ރައީސް ވިދާޅުވިއެވެ.
ރައީސް ސޯލިހު އިތުރަށް ވިދާޅުވީ، އެމްޑީޕީއަކީ އަބަދުވެސް ޒުވާނުންނަށް ފުރުސަތުދީ އަދި ފުރުސަތު ހޯދައިދޭ ޕާޓީއެއް ކަމަށާއި، އެމްޑީޕީގެ ޑިމޮކްރަސީ ދަތުރުގައި ޒުވާނުންނަށް ގިނަ ފުރުސަތުތަކެއް ހޯދައި ދިނުމަށް އަމާޒު ކުރައްވާ ކަމަށެވެ.
އެގޮތުން އެމްޑީޕީގެ ޒުވާނުންގެ ކޮންގްރެސްއަކީ އެ މަސައްކަތަށް އިތުރުވެގެންދާ ބޮޅެއް ކަމަށާއި، ކުރިމަގުގައި ޕާޓީގެ ލީޑަރޝިޕާ ހަވާލުވާންތިބީވެސް މިއަދުގެ ޒުވާން ލީޑަރުން ކަމަށް ރައީސް ވިދާޅުވިއެވެ.
މީގެ އިތުރުން، ޕާޓީގެ ކެމްޕެއިން ހަރަކާތްތަކާއި، މަގުމަތީގެ ހަރަކާތްތައް ހިންގުމުގެ އިތުރުން، ސިޔާސަތުތައް އެކުލަވާލުމުގައިވެސް ޒުވާނުން މުހިއްމު ރޯލެއް އަދާ ކުރާ ކަމަށާއި، ކުރިއަށް އޮތް ތަނުގައިވެސް ޕާޓީން ކުރިއަށްދާނީ ޒުވާނުންގެ ބައިވެރިވުން ހިމަނައިގެން ކަމަށްވެސް ރައީސް ވިދާޅުވިއެވެ.
