ދަނޑުވެރިކަމުގެ ސިނާޔަތަށް ބޭނުންވާ ފީލްޑް އޮފިސަރުން ތަމްރީނު ކުރުމުގެ ޕްރޮގްރާމް ފެށުމަށް ހަމަޖެހިފައިވާ ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.
ބުރާސްފަތި ދުވަހު ފިޝަރީޒް މިނިސްޓްރީގައި ބޭއްވި ރަސްމިއްޔާތެއްގައި މި ޕްރޮގްރާމްގެ ބައިވެރިންނާ މިނިސްޓަރ ބައްދަލު ކުރައްވާފައިވާއިރު، ފުރަތަަމަ ޕްރޮގްރާމް ޖުލައި 29 ވާ ހޯމަ ދުވަހު އިންޑިއާގެ ޓެމިލްނާޑޫ އެގްރިކަލްޗަރަލް ޔުނިވާރސިޓީގައި ފެށިގެންދާނެއެވެ. އެގޮތުން އެކަމާ ގުޅޭގޮތުން ބައިވެރިންނާ މުހާތަބުކޮށް މިނިސްޓަރ ދެއްކެވި ވާހަކަފުޅުގައި ވަނީ މި ޕްރޮގްރާމްގެ ދަށުން ތަމްރީނުވާ ބައިވެރިންގެ އެހީތެރިކަމާއެކު ދަނޑުވެރިކަމުގެ ސިނާޔަތު އިތުރަށް ފުޅާވެ ކުރިއަރައިގެން ދާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.
އެގޮތުން އަތޮޅު ތެރޭގައި ޤާއިމުވެ ތިއްބަވާނެ ފީލްޑް އޮފިސަރުން ތަމްރީނު ކުރެވިގެންދާނެ ކަމަށް މިނިސްޓަރ ވިދާޅުވިއެވެ.
އަޅުގަނޑުމެންގެ އަމާޒަކީ މިހާރު މި ލާމަރުކަޒީ އުސޫލުން ރަށްތައް ބާރުވެރި ކުރުވާއިރު، ދަނޑުވެރި ކަމުގެ ތަމްރީނު ލިބިފަ ތިބި މީހުން ރަށްރަށުގެ ކައުންސިލާ ގުޅިވަޑައިގަތުން، އަދި އެބޭފުޅުންނާއެކީގައި މަސައްކަތްކޮށް ރަށްރަށުގެ ހާލަތު ރަނގަޅު ކުުރުމަށްޓަކައި އެބޭފުޅުންގެ އެހީތެރިކަން ލިބުންމިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު
މި ޕްރޮގްރާމްގައި މިނިސްޓްރީގެ މުވައްޒަފެއްގެ އިތުރުން ހއ.ކެލާ، ހދ.ނެއްލައިދޫ، ރ.ވާދޫ، ގއ.މާމެންދޫ، އަދި ފުވައްމުލަކުން ޖުމުލަ 6 ބޭފުޅަކު ބައިވެރިވާއިރު، މި ޕޮރޮގްރާމް ސްޕޮންސަރ ކޮށްފައިވަނީ މުހައްމަދު އުމަރު މަނިކު ފައުންޑޭޝަނުންނެވެ. އަދި މިފަދަ ހަރަކާތްތަކުގައި ޕްރައިވެޓް ސެކްޓަރުން ލިބޭ އެހީތެރިކަމަށް މިނިސްޓަރ ވެސް ވަނީ ޝުކުރު އަދާކުރައްވާފައެވެ.
