ދިވެހިރާއްޖެއަކީ ލެޕްރަސީ ނުވަތަ ޖުޒާމު ބަލި ނެތް ގައުމެއްގެ ގޮތުގައި ކަނޑައެޅުމުގެ ފްރޭމްވޯކް އިފްތިތާހު ކޮށްފިއެވެ.
ހޯމަ ދުވަހު ހޯޓެލް ޖެންގައި ބޭއްވި ރަސްމިއްޔާތެެއްގައި މި ފްރޭމްވޯރކް އިފްތިތާހު ކޮށްފައިވާއިރު، މި މިބައްދަލުވުން ޝަރަފުވެރި ކޮށްދެއްވީ ދުނިޔޭގެ ޞިއްޙަތު ޖަމިއްޔާގެ ރީޖަނަލް ޑިރެކްޓަރ ޑރ. ޕޫނަމް ކެތްރަޕަލް ސިންގް އެވެ. އޭގެ އިތުރުން، ހެލްތު މިނިސްޓަރ އަބްދުﷲ އަމީނާއި، ދުނިޔޭގެ ޞިއްޙަތު ޖަމިއްޔާއިން ރާއްޖެއަށް ކަނޑައަޅުއްވާފައިވާ ސަފީރު ޑރ. އަރްވިންދް މާތުރް އަދި މިނިސްޓްރީ އޮފް ހެލްތުގެ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންނާއި، އިސްވެރިން ބައިވެރިވެ ވަޑައިގެންނެވިއެވެ.
މިބައްދަލުވުމުގައި މިނިސްޓަރ އޮފް ހެލްތު އަބްދުﷲ އަމީން ވާހަކަފުޅު ދައްކަވާފައިވާއިރު، މިނިސްޓަރ ގެ ވާހަކަފުޅުގައި ވަނީ ލެޕްރަސީ ކޮންޓްރޯލް ކުރުމަށް ކުރިން ކުރެވިފައި ހުރި މަސައްކަތްތަކާއި މިފަދަ ފްރޭމްވާރކްއެއް އެކުލަވާލުމުގެ މުހިއްމު ކަމަށް އަލިއަޅުވާލާފައެވެ.
އޭގެ އިތުރުން، މި މަސައްކަތްކޮށް، "ފްރޭމްވޯކް ފޯ ޒީރޯ ލެޕްރަސީ" ގައިވާ ލަނޑުދަނޑިތައް ހާސިލްކުރުމަށް ރާއްޖެއިން އަބަދުވެސް އެއްބާރުލުން ދެއްވާނެ ކަމަށް މިނިސްޓަރ ވަނީ ވިދާޅުވެފައެވެ.
ރާއްޖެއިން ޖުޒާމް ބަލި ނައްތާލުމުގެ މަސައްކަތް ޤައުމީ ފެންވަރެއްގައި ފަށާފައިވަނީ 1974 ވަނަ އަހަރުއެވެ. އޭގެ ނަތީޖާއެއްގެ ގޮތުން 1997 ގައި އެ ލަނޑުދަނޑި ރާއްޖެއަށް ހާސިލުވެފައިވީ ނަމަވެސް އަހަރަކު ކޮންމެވެސް ވަރަކަށް އަދިވެސް މި ބަލީގެ ކޭސްތައް ރިޕޯޯރޓްކުރެވޭ ކަމަށް ހެލްތު މިނިސްޓްރީން ބުނެއެވެ. ނަމަވެސް މި ފްރޭމްވޯރކްގެ ދަށުން ރާއްޖެއިން ޖުޒާމްބަލި މުޅިން ނައްތާލުމަށް މިނިސްޓްރީން ވަނީ އަމާޒުހިފާފައެވެ.
