ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް އިންޑިއާއަށް ކުރައްވާ ދަތުރުފުޅުގެ ތެރެއިން އިންޑިއާގެ ޑިފެންސް މިނިސްޓަރ ޝްރީ ރަޖްނަތު ސިންގްހާއި ބައްދަލުކުރައްވައިފި އެވެ.

ބުރާސްފަތި ދުވަހު ބޭއްވި މި ބައްދަލުވުމާ ގުޅޭގޮތުން އެމްއެންޑީއެފުން ބުނީ، މި ބައްދަލުކުރެއްވެވުމުގައި ދެ ޤައުމުގެ އަސްކަރީ ގުޅުން އިތުރަށް ތަރައްޤީ ކުރުމާ ގުޅޭގޮތުން މަޝްވަރާތައް ކުރެވުނުކަމަށެވެ. އަދި ދިވެހި އަސްކަރިއްޔާގެ އިންސާނީ ވަސީލަތް ތަރައްޤީކުރުމާ ގުޅޭގޮތުންވެސް ފުޅާ ދާއިރާއެއްގައި މަޝްވަރާތައްކުރެވުނު ކަމަށް އެމްއެންޑީއެފުން ބުންޏެވެ.

އިންޑިއާގެ ޗެއަރމަން އޮފް ދަ ޗީފް އޮފް ސްޓާފް ކޮމެޓީގެ ދައުވަތަކަށް ބުދަ ދުވަހު ހެނދުނު ޗީފް އޮފް ޑިފެންސް ފޯސް ފުރާވަޑައިގެންނެވިއިރު، މި ދަތުރު ނިންމަވާލައްވާނީ ޖޫން މަހުގެ 8 ވަނަ ދުވަހު ކަމަށް އެމްއެންޑީއެފުން ބުނެއެވެ. އެގޮތުން ޝަމާލް ވަނީ އެ ކޮމެޓީގެ ބޭފުޅުންނާ ވެސް ބައްދަލު ކުރައްވައި، ރާއްޖޭގެ އަސްކަރިއްޔާ ވަރުގަދަ ކުރާނެ ގޮތްތަކާ ގުޅޭގޮތުން މަޝްވަރާ ކުރައްވާފައެވެ.

އޭގެ އިތުރުން، ޝަމާލްގެ މި ދަތުރުފުޅުގައި އިންޑިއާގެ ނޭޝަނަލް ޑިފެންސް ކޮލެޖް (އެންޑީއައި) އާއި، އިންޑިއާގެ އިންސްޓިޓިއުޓް ފޮރ ޑިފެންސް ސްޓަޑީޒް އެންޑް އެނަލިސިސް (އައިޑީއެސްއޭ) އަށް ޒިޔާރަތްކުރައްވައި ލެކްޗަރ ދެއްވުމަށް ހަމަޖެހިފައިވާ ކަމަށާއި، މި ދަތުރުފުޅުގައި އިންޑިއާގެ ސްޓާފް ކޮލެޖަށް ވެސް ވަޑައިގަންނަވާ ގޮތަށް ހަމަޖެހިފައިވާ ކަމަށް އެމްއެންޑީއެފުން ބުނެއެވެ.

ޗީފް އޮފް ޑިފެންސް ފޯސްގެ މި ދަތުރުފުޅުގައި އެމްއެންޑީއެފް ސަރވިސް ކޯގެ ބްރިގޭޑިއާރ ޖެނެރަލް ޙާމިދު ސަފީޤާއި، އެމްއެންޑީއެފް ސެނެހިޔާ ހޮސްޕިޓަލުގެ ކޮމާންޑިންގ އޮފިސަރ، ކާނަލް ޑރ. ޢަލީ ޝާހިދު މުޙައްމަދު ވެސް ބައިވެރިވެ ވަޑައިގެންފައިވެއެވެ.