ސުޕްރީމް ކޯޓުގެ އަމުރަކީ ފަނޑިޔާރެއްގެ މައްސަލަ ބެލުމަށް ހުރަސް އެޅުމުގެ ގޮތުން ނެރުނު އަމުރެއް ނޫން ކަމަށް ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
ޖޭއެސްސީ އަށް ހުށައެޅިފައިވާ މައްސަލައަކާ ގުޅިގެން މަގާމުގެ މަސްއޫލިއްޔަތުތަކުން ދުރުކޮށް ސަސްޕެންޑްކުރެވުނު ސުޕްރީމް ކޯޓުގެ ގާޒީ އަބްދުﷲ ދީދީގެ މައްސަލަ އެއްވެސް ގޮތަކަށް ކުރިޔަށް ނުގެންދިޔުމަށް ސުޕްރީމް ކޯޓުން އަމުރުކޮށްފައި ވަނިކޮށް ދީދީގެ ސަސްޕެންޝަން ދެމިއޮންނާނެ ކަމަށް ޖޭއެސްސީން ބުނެފައިވާއިރު، އަންގާރަ ދުވަހު ނޫސްވެރިންނާ ބައްދަލުކުރައްވައި ޖުޑީޝަލް އެކަޑަމީގެ ޗާންސެލަރ އަހުމަދު މާޖިދު ވިދާޅުވީ، ސުޕްރީމް ކޯޓުގެ އަމުރަކީ އެއްވެސް ފަނޑިޔާރެއްގެ މައްސަލަ ބެލުމަށް ހުރަސް އެޅުމުގެ ގޮތުން ނެރުނު އަމުރެއް ނޫން ކަަމަށެވެ.
މާޖިދު ވިދާޅުވީ، މިހާލަތުގައި އުފެދިގެން އުޅޭ މައްސަލައަކީ ޖޭއެސްސީން ޑިއު ޕްރޮސަސްއާ ޚިލާފަށް އަމަލުކޮށްފައިވާތީ ފަނޑިޔާރު އަބްދުﷲ ދީދީ ހުށައެޅުއްވި ދުސްތޫރީ މައްސަލައެއް ކަމަށާއި، އެއްވެސް މީހެއްގެ އަސާސީ ހައްޤު ނުވަތަ ޤާނޫނީ ރައްކާތެރިކަން ގެއްލޭ ގޮތަށް ކަމެއް ހިނގައިގެން ޚުސޫމާތެއް (ޑިސްޕިއުޓެއް) އުފެދިއްޖެނަމަ އެކަން ބެލުމަކީ ކޯޓުތަކުގެ ޒިންމާއެއް ކަމަށާއި، ކޯޓުގެ އިހުތިސާސްގް ތެރޭގައި ހިމެނޭ ކަމެއް ކަމަށެވެ. އަދި އެއްވެސް ހާލެއްގައި ޑީޖޭއޭއިން ޖޭއެސްސީގެ އިހްތިސާސަށް އަރައިގަތުމަށް މަސައްކަތް ނުކުރާ ކަމަށް ވެސް މާޖިދު ވިދާޅުވިއެވެ.
މާޖިދު އެހެން ވިދާޅުވިއިރު، ސުޕްރީމް ކޯޓްގެ ފަނޑިޔާރު އަބްދުﷲ ދީދީގެ ސަސްޕެންޝަން މަޑުޖައްސާލުމަށް، އެ ކޯޓުން ނެރުނު އަމުރާ ޚިލާފަށް ދައުލަތުގެ އެއްވެސް މުއައްސަސާއަކުން ނިންމާ ނިންމުމަކީ ބާތިލް ނިންމުމެއް ކަމަށް ބުނެ، ސުޕްރީމް ކޯޓުން ނެރުނު އަމުރަކީ ޤާނޫނު އަސާސީއާ ޚިލާފް އަމުރެއް ކަމަށް އަންގާރަ ދުވަހު އޮތް މަޖިލިސް ޖަލްސާ އިން ވަނީ ނިންމާފައެވެ.
އެކަމާ ގުޅޭ ގޮތުން މާޖިދު ވިދާޅުވީ، ޤާނޫނު އަސާސީއާއި ޤާނޫނު މާނަ ކުރުމުގައި އަދި ޝަރީއަތުން ބަލާ އެ ނޫން ވެސް މައްސަލަތަކުގައި ސުޕްރީމް ކޯޓުން ނިންމާ ނިންމުމަކީ އެންމެ ފަހުގެ ނިންމުން ކަަމަށް ޤާނޫނުއަސާސީގެ 145 ވަނަ މާއްދާގެ (ނ) ގައި ވެސް ބަޔާންކޮށްފައިވާ ކަމަށެވެ.
ޖުޑީޝަލް ސަރވިސް ކޮމިޝަނުން މިވަގުތު ފަނޑިޔާރު އަބްދުﷲ ދީދީގެ ފަސް މައްސަލައެއް ބަލަމުންދާ ކަމަށް އެ ކޮމިޝަނުން ބުނެފައި ވެއެވެ. އެގޮތުން ފަނޑިޔާރު އަބްދުﷲ ދީދީ ބޭނުންފުޅުވާ ނަމަ އެ ފަސް މައްސަލަ ވެސް ކުރިޔަށް ގެންދާނީ ހުޅުވާލައިގެން ކަމަށް އެ ކޮމިޝަނުން ބުނެފައި ވެއެވެ.
