ލ. އިސްދޫއާ ކަލައިދޫ ރައްޔިތުން ބޭނުން ކުރަމުން އަންނަ ސިއްހީ މަރުކަޒުގެ ހާލަތު ދަށްވުމާ ގުޅިގެން ކަލައިދޫ ކައުންސިލުން ކަންބޮޑުވުން ފާޅުކޮށްފި އެވެ.
ރާއްޖެއެމްވީއަށް މައުލޫމާތުދެެއްވަމުން އެރަށު ކައުންސިލްގެ ނައިބު ރައީސް މުހައްމަދު ޝަރީފު ވިދާޅުވީ އިސްދޫއާ ކަލައިދޫ ރައްޔިތުން ފަރުވާ ހޯދަމުން އަންނަ ސިއްހީ މަރުކަޒުގެ ހާލަތު ވަރަށް ދަށް ކަމަށާއި، ރައްޔިތުން ބޭނުންވާ އެއްވެސް ޚިދުމަތެއް ނުލިބޭ ކަމަށެވެ.
ޝަރީފު ވިދާޅުވީ ސިއްހީ މަރުކަޒު ބާވެ، ތަން ހުރީ އެންމެ ބޭނުންކުރާ ހާލަތުގައި ނޫން ކަމަށާއި، ފުރަތަމަ ކަމަކަށް މަރުކަޒު މަރާމާތުކުރަންޖެހޭ ކަމަށެވެ.
ޝަރީފު ވިދާޅުވީ އާންމު ބަލިތަކަށް ފަރުވާ ދިނުމަށް އެންމެ ޑޮކްޓަރެއް ހުންނައިރު، މަރުކަޒުގެ މުވައްޒަފުން ވަރަށް މަދު ކަމަށެވެ. އަދި ވިދާޅުވީ މަރުކަޒުގައި ވަސީލަތް ވެސް ނެތް ކަމަށާއި، ޚިދުމަތް ދިނުމަށް ވަނީ ވަރަށް ބޮޑު ދަތިތަކާ ކުރިމަތިވެފައިވާ ކަމަށެވެ.
''ވޯޑްގައި ހުރި އެނދުތަށް ހުރީ ވަރަށް ބޮޑަށް ދަބަރަށް ފޮޅި ހަލާކުވެފައި. ތަނެއް ބިއްދާގެން ދިޔަސް އެކްސްރޭ ނެގޭނެ ގޮތެއް ވެސް. އަސްލު ފަރުވާއެއް ނުލިބޭ. ނަމެއްގަ ތަނެއް ހުންނަކަން. ސިއްހީ މައްސަލައެއް ދިމާވާއިރަށް ދާންޖެހެނީ ބޮޑު ހަރަދުކޮށްލައި ލ. ގަމަށް'' ޝަރީފު ވިދާޅުވިއެވެ.
ޝަރީފު ވިދާޅުވީ ސިއްހީ ޚިދުމަތުގެ ފެންވަރު ދަށްވުމަކީ އެރަށުގެ ރައްޔިތުންގެ ވަރަށް ބޮޑު ޝަކުވާ އެއް ކަމަށެވެ.
ޝަރީފު ވިދާޅުވީ މުސްތަގުބަލުގައި އިސްދޫގެ އިތުރުން ކަލައިދޫ އަދި ދަނބިދޫ އަކީ އެއްފަސްތަނަކަށް ވެގެންދާނެ ކަމަށާއި، ތިން ރަށުގެ ރައްޔިތުންނަށް އެކަށީގެންވާ ސިއްހީ ހިދުމަތް ލިބެންޖެހޭ ކަމަށެވެ. އަދި އުންމީދު ކުރަނީ ރައީސް ސޯލިހުގެ މިވެރިކަމުގައި ޓާޝަރީ ފެންވަރުގެ ހޮސްޕިޓަލެއް ގާއިމްވެގެން ދިއުން ކަމަށް އޭނާ ވިދާޅުވިއެވެ.
