ނިމިގެންދާ ރައްޔިތުންގެ މަޖިލީހުގައި މަކުނުދޫ ދާއިރާ ތަމްސީލް ކުރައްވަމުން ގެންދާވާ އަނާރާ ނައީމް އަންހެނުންނަށް ޚާއްސަ ދަރުސެއް ދެއްވައިފިއެވެ.

ރާއްޖެޓީވީއަށް މައުލޫމާތު ދެއްވަމުން އަނާރާ ވިދާޅުވީ  އަންހެނުންނަށް ޚާއްސަކޮށްގެން "ދުލުގެ ނިއުމަތަށް ޝުކުރު ވެރިވަމާތޯ" ގެ ނަމުގައި ބޭއްވި ދަރުސުގައި ބަލާލާފައިވާނީ ދޫ ރައްކާތެރި ކުރުމުގެ މުހިންމު ކަމާއި ދުލުން ބުނާ ބަހަކުން ސުވަރުގެ ވަނުމަށް މަގުފަހިވެގެންދާއިރު ދުލުން ބުނާ ބަހަކުން ނަރަކައަށް ވަނުމަށް ވެސް މަގުފަހިވެގެން ދާނެ ކަމުގެ މައްޗަށެވެ.

މީގެ އިތުރުން މަޖިލީސް ކެމްޕެއިންގެ ދުވަސްވަރު އަދިވެސް މުޖުތަމައުގައި ވަރަށްބޮޑަށް އިސްލާހު ކުރަންޖެހޭ ގިނަ ކަންކަން ހުރިކަން ފާހަގަ ކުރެވުނު ކަމަށް އަނާރާ ވިދާޅުވިއެވެ. އެކަންތައްތަކުގެ ތެރޭގައި މީހުންގެ ވާހަކަ ދެއްކުމާއި ހަގީގަތާއި ހިލާފަށް ހަގީގަތް އޮޅޭގޮތަށް، އަނެއް މީހާގެ އަބުރާއި އިއްޒަތް ކަތިލެވޭ ފަދަ ގޮތަކަށް ވާހަކަތައް ފަތުރަމުން ދިޔަކަން ފާހަގަ ކުރެވިފައި ވާ ކަމަށް ވިދާޅުވިއެވެ. އެހެން ކަމުން މިކަންކަމަކީ އަދިވެސް އިތުރު ދަރުސްތަކާއި ޕްރޮގްރާމް ތަކުގެ ޒަރިއާއިން ރައްޔިތުނަށް އެކަށީގެންވާ މައުލޫމާތުދީގެން މުޖުތަމައު ގައި ހޭލުންތެރިކުރުވަންޖެހޭ ކަންކަން ކަމަށް އޭނާ ވިދާޅުވިއެވެ. 

އަނާރާ ވިދާޅުވީ ފެށޭ ހަފްތާގެ ދަރުސް ބޭއްވުމަށް ހަމަޖެހިފައިވަނީ ނޫރުމިސްކިތުގައި އަންނަ ހޮނިހިރު ދުވަހުގެ  10:30 އިން 12:00 އަށް ކަމަށެވެ.