ނަވާރަ ވަނަ މަޖިލިސް އިންތިހާބަށް ކުރިމަތިލުމުގެ މުއްދަތު އިތުރު ކުރުމަކީ ސުޕްރީމް ކޯޓަށް ކުރެވޭނެ ކަމެއް ނޫން ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހޯމަ ދުވަހު ނަޝީދު ކުރެއްވި ޓްވީޓެއްގައި ވިދާޅުވީ، ރާއްޖޭގެ ކޯޓުތަކުގެ އަގު ވެއްޓި, ކޯޓުތަކުގެ އިތުބާރު ގެއްލޭ އެންމެ ބޮޑު އެއް ސަބަބަކީ ކޯޓުތަކުން އިންތިހާބުތަކަށް ނުފޫޒު ފޯރުވުން ކަމަށާއި، 19 ވަނަ މަޖިލިސް އިންތިހާބުގެ މުއްދަތު އިތުރު ކުރުމަކީ ސުޕްރީމް ކޯޓަށް ކުރެވޭނެ ކަމެއް ނޫން ކަމަށެވެ.
Raajjeyge court thakuge aguvetti ithubaaru gellidhaa enme bodu eh sababakee court thakun inthikhaab thakah nufooz foaruvaa kamun. 19 vana majileehuge inthikhaabuge kurimathi lumuge muhdhathu ithuru kurumakee SC ah amudhun kureveyne kamehnoon
— Mohamed Nasheed (@MohamedNasheed) February 25, 2019
ޕްރައިމަރީ އިން ބަލިވިޔަސް އިންތިޚާބުގައި ވާދަކުރެވޭނެ ކަމަށް ސުޕްރީމް ކޯޓުން ކަނޑައަޅައި ހޯމަ ދުވަހު ވަނީ ސިޔާސީ ޕާޓީތަކުގެ ގާނޫނުގެ 10 ވަނަ މާއްދާ ބާތިލުކޮށްފައެވެ. އަދި ޕްރައިމަރީން ބަލިވި މީހުންގެ ތެރެއިން، ކުރިއަށް އޮތް މަޖިލިސް އިންތިހާބުގައި ވާދަކުރަން ބޭނުންވާ މީހުންނަށް އިންތިހާބަށް ކުރިމަތިލުމުގެ ފުރުސަތު އަންނަ މަހުގެ ހަތަރު ވަނަ ދުވަހުގެ މެންދުރު ފަހު 4:00 އާ ހަމަށް ދިނުމަށް އިލެކްޝަންސް ކޮމިޝަންގެ މައްޗަށް ވަނީ އަމުރުކޮށްފައެވެ.
އެކަމާ ގުޅިގެން އިލެކްޝަންސް ކޮމިޝަނުގެ ރައީސް އަހުމަދު ޝަރީފު ކުރެއްވި ޓްވީޓެއްގައި ވިދާޅުވީ ސުޕްރީމް ކޯޓުގެ ހުކުމާއި ގުޅިގެން ޕްރައިމަރީ އިން ބަލިވި ފަރާތްތަކަށް ކުރިމަތިލުމުގެ ފުރުސަތު އަންނަ މަހުގެ 4 އާއި ހަމައަށް ހުޅުވާލާފައިވާ ކަމަށާއި، ނަމަވެސް އިންތިޚާބު ބޭއްވުމަށް ޝެޑިއުލް ކޮށްފައިވާ ތާރީޚަށް އިންތިޚާބު ބާއްވާނެ ކަމަށެވެ.
