އެމްއެމްޕީއާރްސީން ކުރިއަށްގެންދާ އެންމެ މޮޅު ވީޑިއޯ ހުށަހަޅާ ފަރާތަކަށް އެއްލައްކަ އަށްވުރެ ގިނަ ރުފިޔާ ލިބޭ މުބާރާތުގައި ވޯޓްލުމަށް ފުރުޞަތު ހުޅުވާލައިފިއެވެ.
އެމްއެމްޕީއާރުސީ އިން ނެރުނު ބަޔާނެއްގައި ބުނެފައިވަނީ އެ މުބާރާތަކީ ރެޑް ބުލް އާއި ގުޅިގެން ބާއްވާ ދެ ވަނަ ފޭސްބުކް ވީޑިއޯ މުބާރާތް ކަމަށާއި އެ މުބާރާތަކީ ރާއްޖޭގައި ފަތުރުވެރިންނަށް ތަޖުރިބާ ކުރުމުގެ ފުރުސަތު ލިބޭ ތަފާތު ކަންކަމުގެ މައްޗަށް ތައްޔާރު ކުރާ 1 މިނެޓުގެ ވީޑިއޯ ކްލިޕް ހުށައެޅުމަށް ބާއްވާ މުބާރާތެއް ކަމަށެވެ.
މިމުބާރާތަށް ވޯޓްލުމަށް މިހާރު ހުޅުވާލާފައިވާއިރު، ވޯޓް ލުމުގެ އެންމެ ފަހުގެ މުއްދަތަކީ ޖެނުއަރީ 10 އެއްގެ ދޭއް ޖެހުމާއި ހަމައަށް ކަމަށެވެ. އެގޮތުން މިހާރު އެމްއެމްޕީއާރްސީގެ ފޭސްބުކް ޕޭޖުން ވީޑިއޯތައް ފެންނަން ހުންނާނެ ކަމަށާއި ވޯޓް ގުނުމަށް ހަމަޖެހިފައިވަނީ ފޭސްބުކް ރިއެކްޓިންއިން ކަމަށް އެމްއެމްޕީއާރްސީން ބުންޏެވެ. އެގޮތުން ލަވް، ލައިކް، އަދި ވާއޮ ރިއެކްޓްތައް ވޯޓްގެ ގޮތުގައި ބަލާނެ ކަމަށް އެމްއެމްޕީއާރްސީން ބުންޏެވެ.
މި މުބާރާތް ބޭއްވުމުގެ މަޤްސަދަކީ ފަތުރުވެރިންނަށް ތަޖުރިބާ ކުރެވެން ހުރި ކަންކަން މާކެޓް ކުރުން ކަމަށް ވެސް އެމްއެމްޕީއާރްސީ އިން ބުނެއެވެ.
އެންމެ މޮޅު ވީޑިއޯ ތައްޔަރުކޮށް ހުށައަޅާ ފަރާތަކަށް އެއްލައްކަ ވިހި ހާސް ރުފިޔާ ހުށައަޅާފައިވާ އިރު، އެންމެ މޮޅު 10 ވީޑިއޯ އެމްއެމްޕީއާރުސީގެ އޮފިޝަލް ޓުވިޓަރ ޕޭޖުގައި ފީޗާ ކުރުމަށް ވަނީ ނިންމާފައެވެ.
އެމްއެމްޕީއާރްސީގެ ފަރާތުން މިދިޔަ އަހަރު ވެސް މި މުބާރާތް ބާއްވާފައިވާއިރު އޭރު މުބާރާތަށް 46 ވީޑިއޯ އާންމުން ވަނީ ހުށައަޅާފައެވެ.
