އެމެރިކާގެ ރައީސް ޑޮނަލްޑް ޓްރަމްޕަށް އިނގިރޭސި ވިލާތުން އަރުވާފައިވާ ދައުވަތު ކެންސަލް ކުރުމަށް ގޮވާލައި އިނގިރޭސިވިލާތުގެ ގާނޫނުހަދާ މަޖިލީހުގެ ކައިރީގައި އެތައް ހާސްބަޔަކު މުޒާހަރާކޮށްފިއެވެ.
ކޮންޒަވެޓިވް ސަރުކާރުގެ ބޮޑުވަޒީރު ތެރޭސާ މޭއަށް ފާޑުކިއުންތައް އިތުރުވެގެން ދިޔައީ މިދިޔަ މަހު ވޮޝިންގޓަނަށް ދަތުރުކުރައްވައި ރައީސް ޓްރަމްޕްއާ ބައްދަލުކުރެއްވުމަށް ފަހު އަންނަ ހޫނު މޫސުމުގައި ޓްރަމްޕް އިނގިރޭސި ވިލާތަށް ވަޑައިގަންނަވާނެ ކަމަށް ވިދާޅުވުމާ އެކުއެވެ.
މޭއަކީ ޓްރަމްޕް މަގާމާ ހަވާލުވެ ވަޑައިގަތުމާއެކު އެންމެ ފުރަތަމަ ބައްދަލުކުރެއްވި ލީޑަރެވެ.
ހޮނިހިރު ދުވަހު އިނގިރޭސިވިލާތުގެ ވެރިރަށުގައި ބޭއްވި މި އެއްވުމުގައި އެމެރިކާ އެމްބަސީން ފެށިގެން ގާނޫނު ހަދާ މަޖިލީހާ ހިސާބަށް ތިން ކިލޯމީޓަރު ދިގު ސަރަހަދެއްގައި ހިނގާލުމުގެ ބައިވެރިން އޮތެވެ.
ހިނގާލުމުގެ ބައިވެރިން ދިޔައީ "މޭގެ ލަދު ކޮބައިތޯ" ގޮވަމުންނެވެ.
ޓްރަމްއަށް އިނގިރޭސިވިލާތަށް ވަޑައިގަތުމަށް ދައުވަތުދެއްވުމާ ބެހޭ ގޮތުން މި މަހުގެ ފަހުކޮޅު ބަހުސްކުރާނެ ކަމަށް ބެލެވެއެވެ.
ޓްރަމްޕް ވަޑައިގަތުމަށް މޭ ދެއްވި ދައުވަތު އަނބުރާ ގެންދިއުމަށްގޮވާލައި ކުރިޔަށް ގެންދާ އޮންލައިން ޕެޓިޝަނަށް ބޮޑު ތާއީދެއް ލިބެމުން އަންނައިރު މޭ ގެންދަވަނީ ޓްރަމްޕަށް މަރުހަބާ ކިޔުމަށް ބާރުއަޅުއްވަމުންނެވެ.
